Okolobya ọhẹ ká ẹnyị nyamwụ ri Will yẹkẹẹ: “ỊBayịbụụ ọwawa ka jẹ́-ẹ chaga kori ká jẹ́ ụgbẹyị ọlẹ á ka bwu wọọ ka.”

 À tịtọ nyọka jẹ́ ijẹẹhị ọlẹ kọ ka dang ụbwọ ká ịBayịbụụ ọwawa ka kpụng ịpyọ? Egbeju ẹla ọlẹ ka dang ụbwọ.

•  Họ kọ lala o-ri à juwa kpẹhị yẹ ẹla ọlẹ ká wẹẹ wa ụka kọ họ

•  Kụ ẹhị yẹ ẹla cheri-chẹrị!

•  Ẹla ọlẹ ká aliko nyang ya

 Ya ịlọng ju ka ẹpwụ nya ẹla ọlẹ ká wẹẹ wa. À ka jẹ́-ẹ kpa ụgbẹyị ọlẹ:

1.   Chụ ẹga ọlẹ ká tịtọ nyọka jẹ́. À ka jẹ́-ẹ chụ ẹla ọlẹ kọ họ ị-ịBayịbụụ lee ụpa ọhẹ bwu apwụ nya Ẹrụ Ọnyịịla, lee ụpa nya ịBayịbụụ ịlẹ kị wa la abwụma nya ịdịrama ịị jw.org.

2.   Wọọ. À ka jẹ́-ẹ wọọ lịlọng, lee ọ-wọọ gboo bala oligu lee ọngọhẹ ugbiyegu nyang. Ọngọhẹ ka jẹ́-ẹ wa ụpa nya oja ojaja ọlụwa, ká ọngọkịla ka wa ụpa ịlẹ ká angịnyị ya ẹla myị́.

3.   Kpa ẹla ookpokpo lee ịmanyị-ịmanyị họ ụkụrwọ bwu ẹgẹlẹ:

   •   Gba arụrụ nyọka chabwọ nya ẹla ọlẹ ká wa. Lee gba arụrụ ịlẹ kị chabwọ nya abwọlẹ ká ẹla họ hi tawụlẹ. Da ang baa ọ-ọka nyaa nyọka ya ẹla ọlẹ kọ wẹẹ họ ụ-ụwa.

   •   Gbile ọya. Ọ-chụ pwokwita, jaabwo ká wẹẹ wa ịBayịbụụ u-uhye nya ọngịnyị, gbile ọya bwu abwẹla ọnyịịla nyamwụ lee ang ọlẹ kọ họ kaka wu ahị ọwawa ịlẹ kọ yé.

   •   Da ẹla ọlẹ ká wẹẹ wa lala oja. Ya ẹla ọwẹ ẹkpẹ imiiye, ká họ kọ lala o-ri à juwa tọ angị lẹpwụ nyamwụ ịtọ ẹla wo.

   •   Kori ká ọngọhẹ ẹ-ẹpwụ nya oja ọwẹ á cheje ọtịpyọ, kụ irya nya abwọlẹ ká ang ka la ịnọ kori kọ họ ẹla ụ-ụgbẹyị ọkịla. Ọ-chụ pwokwita, kụ irya nya ụka ọlẹ ká iPita pwa iJisọsị rwarụ wẹẹ. (ỊMakị 14:66-​72) Ányị iPita à tị́ ka họ ịnọ ẹ-ẹpwụ nya iwe-ahụrụ ọwẹ?

   •   Kori ká tị tịtọ nyọka họ gụ ọwẹ, à ka jẹ́-ẹ da ịdịrama nyịlọng ju ang u-uhye nya oja ọlẹpwụ nya ịBayịbụụ ọwẹ. Da ang ịlẹ ká ka jẹ́-ẹ jẹ́ bwu oja ọwa.​—Romans 15:4.

 Kori ká kụ ẹhị yẹ ẹla chẹrị-chẹrị, à ka jẹ́-ẹ yé ang ụdụ ịlam-ịlam bwu ẹpwụ nya oja. Ụka ọhẹ, omyi ẹla ookpokpo lee imiiye bwu ẹpwụ nya oja, kaa la ang lụmẹ-lụmẹ ẹ-ẹp̣wụ nyamwụ.

 Ọ-chụ pwokwita, kụ ẹhị yẹ ịMatiyu 28:7 bala ịMakị 16:7.

•    Ịyẹ tị́ du ká ịMakị da nyori iJisọsị nyị juwa ka mẹ ịlọmwụ jẹ angịjụgbẹyị nyamwụ “bala iPita”?

•  Ụbwọ ọdada: ỊMakị á kpẹhị yẹ ẹla ọlẹ kọ họ ka, lẹ ọhẹka o wo ẹla ọọwa bwu ẹga nya iPita ayịdang.

•  Ang-ụdụ ọ-kpịbaa: Ịyẹ tị́ du kọ ka myị̀ iPita lẹhị nyọlẹ kọ wo nyori iJisọsị nyị tịtọ nyọka yọwa myịmyị? (ỊMakị 14:66-​72) Ányị iJisọsị à tị́ bwu mẹjẹ nyori o ri oligu ọlam nya iPita? Ányị a tị́ ka bwu gbịla iJisọsị bala o-ri oligu ọlam ẹ-ẹga nya angịkịla?

 Kori ká họ kọ lala o-ri à juwa i-ijata bala ọ-kụ ẹhị yẹ ẹla chẹrị-chẹrị, ịBayịbụụ ọwawa ka kpụng ịpyọ gụ ọwọwa!