“M̀ maga nyọka wa ịBayịbụụ ụka ọhẹ lẹ, ma m̀ kaa juhi chajị nyọlẹ kọ lụmẹ!”​—Briana, 15.

 Ọ lang ịnyị ụka ọhẹ lẹ? Egbeju ẹla ọlẹ ka jẹ́-ẹ dang ụbwọ!

•  Ịyẹ tị́ du ká ka wa ịBayịbụụ?

•  Ányị m tị́ ka bwu wa ịBayịbụụ?

•  Ẹla ọlẹ ká aliko nyang ya

 ỊBayịbụụ ọwawa á kaa kpụng ịpyọ ka? Kori kọ lịnyị aalẹ, ang odudu la gbagbịlaa. À ka yẹ ịBayịbụụ lala ụpwụ ọlẹ kọ ju ẹbẹ gụ ụnọ ookpokpo, kị da ang yịngẹ-yịngẹ, la ụrụrụ ọlẹlẹhẹ o-juwa ka myị́. Ifim bala arụrụ ịkịla ka jẹ́-ẹ kpahị irya rụ myị́ ahyaahị!

 Tị kụ ẹhị yọọ ị-ịlẹ wẹẹ: Kori ká gbachị akpa nya ang-ụdụ nya alene ọhẹ, à ka tịtọ nyọka jẹ́ ang ọlẹpwụ nyamwụ?

 Ang ụdụ ọlịnyị ịBayịbụụ à ri lẹ. Ọ la ang ịnyịịla lụmẹ-lụmẹ ịlẹ kị ka dang ụbwọ nyọka

•   Cheje ọnyịịla

•   Hụ la okpunyi ta adang bala ịnang

•   Yé aligu ịlẹ kị há gụ wuu

•   Kụrụ ịnyịrọ ọ-chị́ pyẹpyẹ

 Ányị ụpwụ onyogo ọwẹ à tị́ ka bwu ju apyobwuna hahị alẹ? Chajị “Ohe Oluhye a kpa angịnyị ehe bwula Olegu Ịgọgọ nyamwụ da ẹla myị́ ẹla ọlẹpwụ nya Ụpwụ Ịgọgọ lẹ.” (2 iTimoti 3:​16) Ọọwa ri, ẹla ọmẹjẹ ọlẹpwụ nya ịBayịbụụ bwu ẹga nya ọngọlẹ kọ jẹ́ ẹla gụgụ wuu.

 Ụgbẹyị ọhẹ ri ọ-ka wa ịBayịbụụ bwu ọmwụ ọdada ka pwụ ocheju. Ọwẹ ka dang ụbwọ nyọka wo ẹla ọlẹ ká ịBayịbụụ lẹpwụ-lẹpwụ wẹẹ mẹjẹ. Agbẹyị lụmẹ-lụmẹ ji kahị ka jẹ́-ẹ bwu wa ịBayịbụụ. Kụ ẹhị yẹ ọ-chụ pwokwita imiiye lẹẹ wẹẹ:

•    À ka jẹ́-ẹ wa apwụ 66 ịwẹ wuu myị́ bwu Ọmwụ Ọdada ka pwụ Ọwụrụụ-wụrụ, jaabwọ kị la ẹ-ẹpwụ nya ịBayịbụụ.

•    À ka jẹ́-ẹ wa ịBayịbụụ jaabwọ ká ẹla ọlẹpwụ nyamwụ họ myị́ ịnyịnyịịnyị.

 Ang ọlẹ kọ ka dang ụbwọ: Appendix A7 nya New World Translation gba ẹla ọnyọnyọọnyị kpehe jaabwọ kọ họ ọ-ọhịhị nya iJisọsị ụka ko jam odehe.

 Ụgbẹyị oheeye ọlẹ ká ka jẹ́-ẹ wa ịBayịbụụ ri ọ-ka chụ oja ọlẹpwụ nya Ụpwụ Ịgọgọ ọlẹ kọ gu akama ọhẹ ọlẹ ká la lẹẹlẹẹ. Ọ-chụ pwokwita:

•   À tịtọ nyọka la aligu i-ju ọdahịhile? Wa oja nya iJonatan bala iDevidi. (1 ịSamwẹlụ, egbeju 18-​20) Ká jẹ́ ang ịkpọnchị bwu oja ọwẹ ụpa ọlẹ ko ri, “Jaabwọ Á ka Bwu Yé Aligu ị-Chịla o-Hu Ọkịlẹtụ ha.”

•   À tịtọ á ka la ọngịrị nyọka kụrụ ọmayẹ gụ olene? Wa oja nya abwọlẹ ká iJosẹfụ bwu kụrụ ọmayẹ. (Ọmwụ Ọdada, egbeju 39) Ká jẹ́ ang ịkpọnchị bwu oja ọwẹ ụpa ọlẹ ko ri, “Jaabwọ Á ka Bwu Kụrụ Ọmayẹ . . . IJosẹfụ​—Ụpa 1” bala “Ị Chị Ẹla Bọọ Kịrọrọ! IJosẹfụ—Ụpa 2.”

•   À tịtọ á ka jẹ́ jaabwọ ká abwọ ọrịrị ka jẹ́-ẹ dang ụbwọ? Wa oja nya iNehemaya. (INehemaya, egbeju 2) Ká jẹ́ ang ịkpọnchị bwu oja ọwẹ ụpa ọlẹ ko ri, “Ohe Wẹ Abwọ Ọrịrị Nyamwụ.”

 Ang ọlẹ kọ ka dang ụbwọ: Wa ịBayịbụụ ẹ-ẹga ọlẹ ká ọmọnyọ ji ka, chajị ká irya nyang ka jẹ́-ẹ nọ ẹ-ẹga ookpokpo.

 Ụgbẹyị ọhata ọlẹ ká ka jẹ́-ẹ wa ịBayịbụụ ri ọ-ka chụ oja lee eje ọhẹ, wọọ, bala ọ-kụ irya jaabwọ ká ẹla ọọwa gung. Ụka ká wa kpá, à tịlọng ịtọ ẹla lala ịlẹ:

•   Ịyẹ tị́ du ká iJihova da ẹla ọlẹ ju ị-ịBayịbụụ?

•   Ẹlịyẹ ọ tị́ mẹjẹ u-uhye nya abwụma nya iJihova bala ụgbẹyị ọlẹ kọ kaa bwu họ ang?

•   Ányị m tị́ ka bwu kpa ẹlẹwẹ họ ụkụrwọ ọ-ọhịhị nyam?

 Ang ọlẹ kọ ka dang ụbwọ: Wa ịBayịbụụ nya New World Translation ọ-kpa jẹ́ ang nyọka yẹ ifim, ịmapụ, bala ang abwọ ịkịla ịlẹ kị ka dang ụbwọ nyọka yé apyobwuna yẹẹyẹẹ bwu ịBayịbụụ ọwawa nyang.