“Jaabwọ kam wẹẹ nwà, uya ọlẹ kọ kaa dam la ọngịrị-ọngịrị gụgụ wuu à ri imyi nyọka họ ụya ta alẹng ịkịla ẹẹ. M̀ me ịnọ kọ ri ụpa nya ọnwànwa ọlẹ kọ ka chịpwụrụ wẹẹ, ma irya ọwẹ jam daalẹ wẹẹ.”—David, ko gu ẹka 23.

 David ri ọngịnyị nya ịKịrayịsị ọlẹ kọ tịtọ nyọka họ ẹla kpụ Ohe ịpyọ. Ọ ka jẹ́-ẹ họ ẹla kpụ Ohe ịpyọ ịnyịlẹhị kọ tị la irya nyọka họ ụya ta alẹng ịkịla? Ányị Ohe à tị́ kaa yẹ anyang-anyang lee alẹng-alẹng ọ-họ ụya ta awụlẹ?

•  Ẹlịyẹ ịBayịbụụ à tị́ ya?

•  Ọọwa ri . . . ?

•  Ma kori ká . . . ?

 Irya ọlẹ ká angịnyị la u-uhye nya ẹlẹwẹ ụpa nya odehe ọhẹ ka datị hi ịnya alụpa nya odehe ọkịla myị́. Jaabwọ ká ụka tị wẹẹ chịpwụrụ ịnyịnyị, irya nya angịnyị kaa yẹda u-uhye nyamwụ. Ma i-irya ọlẹ ká iru nya angịnyị la u-uhye nya ẹla à kaa kpa angịnyị nya ịKịrayịsị ụgbẹyị, kpu “kahị ka juwa da ọhụ-ogo da ọhụ-amwụ ẹ-ẹpwụ nya ọmyịmyị ọlala nyahị” ka. (Ala Efesọsị 4:14) Ọkọkọ nya ọọwa lẹ, ẹla ọlẹ ká ịBayịbụụ ya u-uhye nya alẹng-alẹng lee anyang-anyang ọ-họ ụya tawụlẹ (bala ẹla ọkịla ọnyị myị́ ọnyị kpong-kpong) angịnyị nya ịKịrayịsị nyịlẹhị à kaa myị la lẹ.

 Ẹla ọlẹ ká ịBayịbụụ ya u-uhye nya alẹng-alẹng lee anyang-anyang ọ-họ ụya tawụlẹ la gbagbịla. Omyi ẹla nya Ohe yẹkẹẹ:

•  “Alẹng-alẹng ā ka ẹga nya awụlẹ koo.”—Ala iLivayị 18:22.

•  “Chajị nyọlẹ ká angịnyị ehe chị́ uchi lụmẹ ịnyị, a du ká Ohe Oluhye hwaa ujiji ẹ-ẹpwụ nya imyi nya ang nya ịnyịrọ ọlẹpwụ nya ọkịlẹtụ nyaa ọlẹ kọ chịrị lụmẹ . . . lẹlẹ. . . . Chajị nyọlẹ ká angịnyị ehe chụ irya nya ịlaa hi irya nya Ohe Oluhye ịịwẹ, a du ká Ohe Oluhye hwaa ujiji ẹ-ẹpwụ nya uhila nya ụya oloyoyi lụmẹ nyaa ọlẹ kị juwa họ lẹlẹ. Ọọwa lẹ, anyang nyaa a mwọọgịlẹ, juwa yẹ ụgbẹyị ọlẹ, ịnọ, kọ chịla kịịwa bala alẹng ka bwu nọ ta awụlẹ da abwọ ọkịla lẹ, ị mwọọgịlẹ juwa nọ ta awụlẹ la ụgbẹyị ohideeji ọlẹ kọ pwoku kpong-kpong kaka, lẹlẹ.”—Ala iRom 1:24, 26.

•  “Anụ myị kị pịrịịnụ ju koo! Angịlẹ kị ri angị juwa họ ụya wuu lee angị juwa kpụ́ ijiga wuu lee angị juwa da ẹla-ahụ wuu lee alẹng ịlẹ kị kaa juwa họ ụya ta alẹng aanaa wuu, lee, angị ri aleyi wuu lee angị ri alimajẹ wuu lee angị ri angị nwa ere juwa ya wuu lee angị ri angị juwa do angịnyị ido wuu lee angị ri alagbụrụ wuu lẹ aalẹ, ị́ ka jẹ́-ẹ ri ugu nya ịpyị Adịrahụ nya Ohe Oluhye myị́ kpong-kpong kaka!”—1 Ala ịKọrịntị 6:9, 10.

 Ẹla ọlẹ kọ juwa ri, ehile nya Ohe gu ọng myị́ ọng wuu, kori kọ ri ọlẹng ọlẹ kọ la irya nyọka nọ ta ọlẹng lee ọ-nọ ta ọnyang, lee kori ko ri ọnyang ọlẹ kọ la irya nyọka nọ ta ọnyang lee ọ-nọ ta ọlẹng. Ọng myị́ ọng wuu ka wu ịlọmwụ kpa ẹ-ẹga nya abwẹla ọlẹ kọ wụ́ Ohe ẹjẹ.—Ala iKolosi 3:5.

 Ọọwa ri, ịBayịbụụ myị ọnụ nyori alẹng ị-nọ ta alẹng bala anyang ị-nọ ta anyang nyị wụụhị ẹjẹ mẹ?

 Ehe. ỊBayịbụụ-ụ́ myị ọnụ nya ọngọngọhẹ ọ-ka wụụhị ẹjẹ ka—tụ́ angịlẹ kị la irya ọlịịwẹ bala angịlẹ kị la ka. Ọkọkọ nya ọọwa lẹ, o juhi ọhụ nyọka “hụ la okpunyi ta angịnyị ehe wuu,” ọhịhị ụma ọnyị myị́ ọnyị kị la. (Ala iHiburu 12:14) Lẹ ọ tịpyọ nyọka daa ido, haa ẹla la imajẹ, kpaa họ, lee ọ-kpaa la ụbwọ ọngịrị chajị nya irya ọlẹ kị la.

 Ọọwa ri, angịnyị nya ịKịrayịsị ka pwa ju ehile ịlẹ kị myị ọnụ nya alẹng-alẹng lee anyang-anyang ọ-ka ye awụlẹ?

 ỊBayịbụụ mẹjẹ nyori Ohe nyị họ awụlẹ oyeye kịị nyị ka ri ọtụchawụlẹ nya ọlẹng ookpokpo bala ọnyang ookpokpo. (ỊMatiyu 19:4-6) Ma angịkpeji á kaa cheje u-uhye nya ehile nya awụlẹ oyeye kpụnịrọ omyi ẹla nya Ohe ka, irya nya angịnyị ehe bala upe ị kaa kpa daa lẹ. ỊBayịbụụ byi angịnyị nya ịKịrayịsị nyịlẹhị nyị ji oye ọhẹ-lọhẹ ẹ-ẹpwụ nya ẹla nya upe ka. (ỊJọn 18:36) Lẹ, ị́ kaa ri angị tụ́ ehile pyịpyị u-uhye nya alẹng-alẹng lee anyang-anyang o-ye awụlẹ lee ọ-nọ tawụlẹ ka, ị́ tị kaa chẹkpẹ jwoo ka ịnyịnyị.

 Ma kori ká ọlẹng ọhẹ á kaa nọ ta alẹng lẹẹlẹẹ lee kori ká ọnyang ọhẹ á kaa nọ ta anyang lẹẹlẹẹ bẹẹ? Ọ ka jẹ́-ẹ yẹda wẹẹ?

 Ee. Angịhyẹ dọmwụ jẹ́ yẹda lụka onyogo! Nyọlẹ ká ịBayịbụụ ya nyori alẹng ị-họ ụya ta alẹng bala anyang ị-họ ụya ta anyang nyị́ ka ri ugu nya Ịpyị-Adịrahụ nya Ohe ka kpá lẹ, ọ myịmyị yẹkẹẹ: “Eje nya ịhọbịrị ịhọhọ ịlịịwẹ wu angịhyẹ nyanụ lụka ọlẹ kanụ jẹ́ Ohe Oluhye ene lẹka.”—1 Ala ịKọrịntị 6:11.

 Ọọwa ri angịlẹ kị ba la ịhọhọ ịlịịwẹ á kaa nwụ imyi nya ọhịhị nyaa onyogo kpong-kpong ka? Ehe. ỊBayịbụụ yẹkẹẹ: “Anụ hu ọngịnyị onyeewe ọlẹpwụ nya ịKịrayịsị dakụrụ ugbẹnyị lẹ. Ohe Oluhye Ọngọlẹ kọ hu ọhịhị onyeewe ọọwa hanụ, . . . wẹẹ nwụ ọhịhị ọọwa ma onyeewe.” (Ala iKolosi 3:10) Ọyẹda á ri ẹla nya ahyẹẹnụ ookpokpo ka.

 Ma kori ká imyi nya ẹla ọlịịwẹ ọhọhọ á kaa nwu ọngọlẹ kọ tịtọ nyọka kpa ehile nya Ohe bẹẹ?

 Lala irya ịkịla, ọngọọwa ka jẹ́-ẹ chụ nyọka hu irya ọwẹ họ ka myị́. Ányị ọ tị́ ka bwu họ ịnyị? ỊBayịbụụ yẹkẹẹ: “Anụ́-ụ myị ká Olegu Ịgọgọ nya Ohe Oluhye a juwa kpanụ ẹ-ẹpwụ nya ang myị́ ang nyanụ wuu ọlẹ kanụ ka họ mẹ. Aalẹ, ánụ ka ri ọnyọhị nya imyi nya ang myị́ ang ịlẹ kị kaa ma ugbinyịrọ nyanụ ma kaka.”—Ala ịGaletiya 5:16.

 Kori ká kpẹhị chịng, ọgba ọwẹ á ya nyori imyi nya ugbinyịrọ nyị́ ka nwụ ọngọwẹ kpong-kpong ka lẹ ka. Ma ang nya olegu ọhọhọ lala ịBayịbụụ ọwawa bala abwọ ọrịrị ka ya ọngịrị họọ nyọka kụrụ imyi ọọwa.

 Ọ lịnyị ẹ-ẹga nya David ọlẹ kahị ya ẹla rụ́ lalẹ, ọgụgụụgụ ri ụka kọ ya akama nyamwụ je adamwụ bala ịnamwụ ịlẹ kị ri angịnyị nya ịKịrayịsị. O yẹkẹẹ: “Olo ọtụka-ọtụka à hiri him e-egbeju wẹ lẹ. Kori kam tị ya ẹla balaa hyaa lẹẹ ịnọ, ụka nya ụjụ nyam ka kpụm ịpyọ gụ abwọlẹ kọ la.”

 Ahị kaa chị ọkẹkẹnị gụ ụka ohyẹẹkpẹ kori kahị kpa ehile nya iJihova họ ụkụrwọ. Ahị kaa jẹ́ myị̀myị̀ nyori ehile nya Ohe “hiigu, angị kpọọ kpa kaa chị ọkẹkẹnị,” bala o-ri ahị kaa yé ‘apyobwuna bwula ehile nya Ohe ọkpakpa.’—Eje Ọnyịịla 19:8, 11.