Ụka imiiye ẹ-ẹpwụ nya epwihi, Alibeenu nya iJihova kaa tụguru ẹ-ẹga ọgbịgba nyaa kọ ri, Ube nya Ịpyị-Adịrahụ. Ịyẹ ị tị́ kaa họ ụ-ụwa? Ányị a tị́ ka ye apyobwuna bwula ọ-kà?

•  Ịyẹ ị tị́ kaa họ u-Ube nya Ịpyị-Adịrahụ?

•  Ịyẹ tị́ du ká kà ka?

•  WẸla ọlẹ ká aliko nyang ya

 Ube nya Ịpyị-Adịrahụ ri ẹga ọlẹ kị kaa mẹ ịBayịbụụ jẹ. Ọjịra-jịra ọlẹ kị kaa la ụ-ụwa ka jẹ́-ẹ dang ụbwọ:

•   jẹ́ ẹlịlẹhị chajị nya Ohe Oluhye.

•   jẹ́ ọmwụ nya ang ịlẹ kị wẹẹ họ dagaga juhi.

•   ri ọngịnyị ọnyịịla.

•    ye aligu ịnyịịla.

 À jẹ́ ẹla ọlẹ? Ị kaa wụrụ ẹga ọtụguru nya Alibeenu nya iJihova nya Ube nya Ịpyị-Adịrahụ chajị ẹla u-uhye Ịpyị-Adịrahụ nya Ohe Oluhye ị kaa mẹjẹ ụ-ụwa gụgụụgụ lẹ.—ỊMatiyu 6:9, 10; 24:14; iLuku 4:43.

 Ẹla ọlẹ kị kaa mẹjẹ ụ-ụwa ka dang ụbwọ. Ẹla o-bwu ịBayịbụụ ọlẹ kị kaa mẹjẹ ọọjịra-jịra nya Alibeenu nya iJihova ka dang ụbwọ “jẹ ẹla.” (Etu 4:5) Ọọwa ri, ịBayịbụụ ka jẹ́-ẹ dang ụbwọ cheje ịnyịịla ọ-ọhịhị. Ọ ka jẹ́-ẹ dang ụbwọ wẹ ịtọ ẹla ịlẹ kị baba ọ-ọhịhị, tụ́ ịlẹ:

•   Ịye à tị́ ri etu nya ọhịhị?

•   Ahị ka kpa Ohe Oluhye abyị nya akama nyahị?

•   Ịyẹ à tị́ kaa họ tahị ụka kahị gbu?

 Ịhyẹ nya egbeju nya ẹla ịlẹ kị kaa da wụlẹ ọọjịra-jịra nyahị ọla ọmyịmyị nya epwihi à lẹẹ lẹ:

•   Ịyẹ Tị́ Du Kahị ka Ya Iwe Da ha ỊBayịbụụ kọ ka Kpahị Ụgbẹyị?

•   Ale A Tị́ ka Ye Ụbwọ Ọdada Bwu Ụka nya Akama?

•   Ang Ọlẹ ká Ịpyị-Adịrahụ nya Ohe Wẹẹ Họ Hahị Lẹẹlẹẹ.

 “Ọnyị ọla ịkịlasị nyam ọhẹ wẹ ọjịra-jịra nyahị. Ọ hụhụ bala ugbiyegu nyahị, ịnyịnyị ahị ga apwụ ị-kpa jẹ́ ang nyahị balọọ. Nyọlẹ kahị họ ọjịra-jịra kpá, ọ byim nyori ịtọ ẹla ọwẹwẹ nya aanahị ịlụka kị ya iwe da nyọọwa nyị kpa ọwa ịpyọ yẹẹyẹẹ. Ọ ya ịnyịnyị nyori ala ịchọọchị nyọwa nyị́ la ang ị-kpa mẹ ang jẹ lala ahị ka.”​—Brenda.

 À jẹ́ ẹla ọlẹ? Ị́ kaa nwu uri nya ẹga ịhụhụ ịla Ube nya Ịpyị-Adịrahụ ka, ị́ tị kaa da angịnyị okpoko ka ịnyịnyị.

 À ka ye ọhụ ojuju bwu ụwa. ỊBayịbụụ ya nyori ang odudu ọhẹ ọlẹ ká Angịnyị nya ịKịrayịsị kaa tụguru nyị ri ọ-ka “ju awụlẹ ọhụ.” (Ala iHiburu 10:24, 25) Ọ yẹjula angịlẹ kị kaa hu ẹla nya Ohe Oluhye bala ịnya angịkịla nọ ịlahị nya ịnyịịla hiigu yẹẹyẹẹ ẹ-ẹpwụ nya odehe ọlẹ ká angịnyị kaa ya ịlaa-ịlaa kem.

 “Ụkụrwọ ọlẹ kam họ la ahyẹẹnụ ka du ká ịnyịrọ ka chịm pyẹpyẹ myị́, ma angịnyị ịla Ube nya Ịpyị-Adịrahụ kaa họ mm la ịlọm myịmyị. Ụka kị họ ọjịra-jịra kpá kam ja jẹ nyà, m̀ kaa chị ọkẹkẹnị bala ọ-ye ọngịrị nyọka kịnyaa la ahyẹẹnụ ọkịla.”—Elisa.

 À jẹ́ ẹla ọlẹ? Ọjịra-jịra nya Alibeenu nya iJihova ilodehe wuu gụ ụnọ ohu da iwo imiiye (120,000), ẹga ọlẹ kị kaa tọ awụlẹ họ ọjịra-jịra nyaa tị gụ ụnọ iwo ịrwọnyẹ (60,000). Ẹka ọnyị myị́ ọnyị, ị kaa nwụ Ebe nya Ịpyị-Adịrahụ lala ụnọ da iwo ịrụ (1,500) chajị ká angịnyị ka ye ẹga tụguru jaabwọ ká ụmụmẹ nya angịnyị wẹẹ gụ ọwọwa. a