Kpehe ka ala ịlẹpwụ

Kpehe ka ẹga kị da egbeju nya ala ju

 ANG ỌJẸ́JẸ 43

IJihova À Wẹẹ Kpa Ogu Nyamwụ Ụgbẹyị Lẹ

IJihova À Wẹẹ Kpa Ogu Nyamwụ Ụgbẹyị Lẹ

‘Ọ-ọngịrị nya ẹwụ ọ-ka da myị lee ịnya igbabwọ ka, ma bwula olegu nyam am [iJihova] ịnyị.’​—SẸK. 4:6.

EJE 40 À Tị́ Ji Oye Nya Owo?

ẸHỊ NYA ẸLA *

1. Ịyẹ angịnyị nya ịKịrayịsị ịlẹ kị hu enyi Ohe lẹ à tị́ baba nyọka họ kịnyaa kịlahị?

À HU enyi Ohe lẹ? O ri ịnyị aalẹ, à ya ọmyịmyị nyang ẹ-ẹga nya iJihova dodehe a-ahị nya alụma bala ọ-myị ọnụ nyọka gbịgba họọ ẹ-ẹpwụ nya ogu * nyamwụ lẹ. Ọ baba ká ọmyịmyị nyang ẹ-ẹga nya iJihova ka nwà kịnyaa kịlahị. Ọ tị baba á ka jẹ́ myịmyị nyori iJihova à wẹẹ kpa ogu nyamwụ ụgbẹyị alẹ lẹ.

2-3. Ányị iJihova à tị́ wẹẹ kpa ogu nyamwụ ụgbẹyị alẹ? Ya ọ-chụ pwokwita ịhyẹ wẹẹ.

2 Alẹ, iJihova wẹẹ kpa ogu nyamwụ ụgbẹyị a-abwọlẹ kọ mẹ ụma nya ọngịnyị ọlẹ ko ri jẹ, ang ọlẹ kọ tịtọ nyọka họ bala ehile nyamwụ. Ahị kụ ẹhị yẹ abwẹla nya iJihova ịta ịlẹ kị chị ehe ẹ-ẹpwụ nya ogu nyamwụ wẹẹ.

3 Ọhọhẹ, ‘Ohe á kaa ji oye nya ọngọngọhẹ datị ka.’ (Ụkụr. 10:34) Ọháha gu iJihova gbịla nyọka tụụbwọ hi ọnyị nyamwụ wẹ ka “hu ọhịhị nyamwụ kịla iya wọnu nya angịnyị wuu ju.” (1 Tim. 2:6; Jọn. 3:16) IJihova wẹẹ kpa angịnyị nyamwụ ya ẹrụ ọnyịịla je angịlẹ kị ka myị-ị ke ụrụ. Ọọwa dudu ká iJihova jẹ́ wẹẹ da angịnyị ụbwọ nyọka ye apyobwuna bwu iya ọkịlaakịla nya iJisọsị. Oheeye, iJihova ri Ohe nya ẹla omemeeme bala okpunyi. (1 Kọr. 14:33, 40) Chajị nyọọwa lẹ, ahị ka yẹhị guru nyori angịlẹ kị kaa gbịgba ha iJihova ka ri ogu nya angịnyị ịlẹ kị la memeeme bala ọ-myị̀ la okpunyi. Ọhata, iJihova à ri Ọngọ ‘Mẹ Ang Jẹ’ Ọtụka lẹ. (Ayị. 30:20, 21) Ịnyị à dudu lẹ, ká ogu nya iJihova kaa họ ụkụrwọ nyịlẹhị-ịlẹhị nyọka mẹ ang jẹ angịnyị bwu ẹpwụ nya ịBayịbụụ ọọjịra-jịra bala ụka kị kpehe nya ẹla Ohe lẹlẹ. Ányị Angịnyị nya ịKịrayịsị ịla oyi ọhọhẹ à tị́ gbịla abwẹla nya iJihova ịta ịwẹ? Ányị angịnyị nya iJihova à tị́ wẹẹ gbịla abwẹla ịwẹ lụka nyahị? Ányị  olegu ịgọgọ à tị́ ka dang ụbwọ jaabwọ ka wẹẹ họ ụkụrwọ bala ogu nya iJihova alẹ?

OHE Á KAA JI OYE NYA ỌNGỌNGỌHẸ DATỊ KA

4. Jaabwọ ká Ụkụrwọ nya Alẹrụ 1:8 ya, ụkụrwọ oyina iJisọsị à tị́ byi angịjụgbẹyị nyamwụ nyị họ? Ụbwọ ọdada oyina ị tị́ ka ye?

4 Lụka nya oyi ọhọhẹ. Ẹrụ ọlẹ ká iJisọsị kpa pyẹ ya ẹhị ọrịrịị-rịrị ha angịnyị ehe. (Luk. 4:43) Ọ da angịjụgbẹyị nyamwụ ehile nyị kịnyaa la ụkụrwọ ọlẹ kọ dọmwụ, nyọka ri ibeenu nyamwụ “ju kele ka ọbaba nya odehe ọlẹ wuu.” (Wa Ụkụrwọ nya Alẹrụ 1:8.) Ịnyịlẹhị lẹ, ị́ ka họ ụkụrwọ ọwẹ la ọngịrị nyịlaa ka. Ị ka baba nya olegu ịgọgọ, kọ ri ọngọ dụbwọ ọlẹ ká iJisọsị chaa ehe.​—Jọn. 14:26; Sẹk. 4:6.

5-6. Ụgbẹyị oyina olegu ịgọgọ à tị́ da angịjụgbẹyị nya iJisọsị ụbwọ?

5 Angịjụgbẹyị nya iJisọsị ye ọngịrị nya olegu ịgọgọ lụka nya iPentikọsị ọla ẹka iwo ịta kụrụ ịta nyọlẹ kị ma ịKịrayịsị kpà (33 C.E.). Bwula ụbwọ ọdada nya olegu ịgọgọ ọọwa, ị dọmwụ nyọka kpa ẹrụ ọnyịịla pyẹ i-ijata. Lụka okpii lẹ, ụnọ ịmanyị tị́ nya angịnyị à ye ẹrụ ọnyịịla myị lẹlẹ. (Ụkụr. 2:41; 4:4) Ụka ká angịnyị dọmwụ nyọka taa pyịpyị, angịjụgbẹyị ịwẹ á juhi ka. Ọkọkọ nyọọwa, ị bịlẹ Ohe nya ụbwọ ọdada. Ị raabwọ yẹkẹẹ: “Ya ọngịrị ọ-kpa ya ẹla myị́ là uhi ojuju ka hahị ahị anchẹ nyang mẹ.” Ọọwa lẹ, ịwa wuu à myị̀ la ọngịrị nya olegu ịgọgọ lẹ, “ị juwa ya ẹla nya Ohe Oluhye dodehe myị́ la ọngịrị-ọngịrị la uhi ojuju-ka lẹlẹ.”​—Ụkụr. 4:18-20, 29, 31.

6 Angịjụgbẹyị nya iJisọsị la akama ịkịla ịnyịnyị. Ọ-chụ pwokwita, Ụpwụ Ịgọgọ á ju iru lụmẹ ụka ọwẹ ka. Ị́ la apwụ ị-da ịBayịbụụ wụlẹ ụma nya ịlẹ kahị la alẹ ka. Angịjụgbẹyị ịwẹ ka ya ẹla nya Ohe je angịlẹ kị kaa ya ìja ịkịla datị-datị. Nanana nyori ị la akama ịlịịwẹ wuu, ị họ ụkụrwọ ọlẹ kọ lala o-ri nyị́ ka jẹ́-ẹ họ myị́ ka. Ẹ-ẹpwụ nya ẹka lala iwo ịta, ị kpa ẹrụ ọnyịịla ọọwa “kaka ya je ọng myị́ ọng am e-ekpeleji nya ẹnụ ọlẹ wuu.”​—Kol. 1:6, 23.

7. Gụ ẹka ohu kẹkpẹ, ányị anchẹ nya iJihova à tị́ bwu jẹ́ ang ọlẹ ká Ohe tịtọ bwu ẹga nyaa? Ẹlịyẹ ị tị́ họ?

7 Lụka nyahị ọlẹ. IJihova kịnyaa la ọ-ka kpa angịnyị nyamwụ ụgbẹyị bala o-jwaa ọngịrị. Ụpwụ Ịgọgo kị kpa ọngịrị nya olegu ịgọgọ da, ọ tị kaa kpa kpa angịnyị nyamwụ ụgbẹyị gụgụụgụ lẹ. Ụ-ụwa, ị da ẹla nya ụkụrwọ ọlẹ ká iJisọsị họ ju bala ehile ọlẹ kọ ya ha angịjụgbẹyị nyamwụ nyị kịnyaa la ụkụrwọ ọọwa. (Mat. 28:19, 20) Tataata la ẹka nya 1881, Ẹpwang ọ-Kụ Gbeji nya Ọya Ọharwiye nya ẹka ọwẹ jẹ́ ya nyori: “Ị́ wụrụụhị lee ọ-ya ida wụụhị nyọka la ihi bala ọ-ka kpụdụ ka, ma nyọka kpa ang myị́ ang ọlẹ kahị la wuu họ ụkụrwọ bala ọ-ka kpa ẹrụ ọnyịịla pyẹ ịnyị.” To Whom the Work Is Entrusted, ko ri ụpwụ ọhẹ ọlẹ kị da la 1919 nyọka mẹjẹ angị kpa ẹrụ ọnyịịla pyẹ ụgbẹyị ọlẹ kị ka bwu ya ẹla, yẹkẹẹ: “Ụkụrwọ ọwẹ lụmẹ nyọka họ, ma ịnya ayịbaba ịnyị, lẹ ọ ka ya ọngịrị hahị nyọka họọ myị́.” Ee, lala angịnyị nya ịKịrayịsị ịla oyi ọhọhẹ, aanahị ịwẹ ya ịlaa ju kẹpwụ nya ụkụrwọ la ọngịrị-ọngịrị, la ahị ọdahile nyori olegu ịgọgọ ka daa ụbwọ nyọka ya ẹla nya Ohe ju ọng myị́ ọng wuu. Ahị tị kịnyaa la ọ-ka la ahị ọdahile ọlịnyị daalẹ.

Ogu nya iJihova kpa ang-abwọ ịlẹ kị há gụ wuu kpa ẹrụ ọnyịịla pyẹ (Yẹ ọgba 8-9)

8-9. Agbẹyị iyina ogu nya iJihova à tị́ kpa nyọka kpa ẹrụ ọnyịịla pyẹ gụ olene?

8 Ogu nya iJihova kpa ang-abwọ ịlẹ kị há gụ wuu kpa ẹrụ ọnyịịla pyẹ. Ang-abwọ ịịwa ri ang lala apwụ ị-da kpehe, “Photo-Drama of Creation,” ang ọ-kpa du omyi ẹla ọkịla ju, ang-ịrụnyẹ ịlẹ kị kaa ya ang ị-ya ẹla kụ u-uhye, ẹla ọ-ya ọ-ọhụ bwu irediyo bala intanẹtị lụka nya ichẹnẹ nyahị ọlẹ. Ogu nya iJihova myịmyị wẹẹ họ ụkụrwọ ọtụka-ọtụka nya òja ọyẹda ọlẹ ká ọlịnyị ji ẹnẹhẹ lẹka! Ịyẹ à tị́ du? Chajị ká angịnyị ụma ọnyị myị́ ọnyị ka wo ẹrụ ọnyịịla la òja nyịlaa. IJihova á kaa jẹ́ oye-oye ka; ọ tị ya neeji nyori nyị ka kpa ẹrụ ọnyịịla pyẹ “ka epwoja myị́ epwoja wuu bala ala ụpwọma myị́ ụpwọma wuu bala aloja myị́ oja bala angịnyị myị́ angịnyị  wuu.” (Ọwụ. 14:6, 7) Ọ tịtọ ká ọng myị́ ọng ka jẹ́-ẹ wo oja ọnyịịla nya Ịpyị-Adịrahụ.

9 Angịlẹ kahị tị jẹ́-ẹ ba ka ẹpwa ka, chajị nyori ọngịnyị kaa gbeji ụ-ụwa lee ị be iku ju ẹpwa nyaa bẹ? Chajị nyọka jẹ́-ẹ wu angịlịnyị ọyị gụ olene, ogu nya iJihova dọmwụ nyọka mwahị nya agbẹyị ịkịla ịlẹ kị ka jẹ́-ẹ kpa ẹrụ ọnyịịla pyẹ ẹ-ẹpwụ nya alụma. Ọ-chụ pwokwita, la ẹka nya 2001, Angị Kpẹhị Rịrị Ogu myị ọnụ ha aanahị ịla France nyọka kpa ịcarts bala agbẹyị ịkịla ịlẹ kị kaa ya apwụ nyahị gụrụ ká angịnyị ka yẹ ya ẹla Ohe. Ọ nọ chẹẹ, aanahị ịla ẹga ịkịla họ ịnyị ịnyịnyị. Ọọwa tị dụbwọ yẹẹyẹẹ. La 2011, ị dọmwụ nya ụgbẹyị ọ-kpa ẹrụ ọnyịịla pyẹ onyeewe ọhẹ ịị United States, ụ-ụwa ụpa nya New York City ọlẹ ká angịnyị kaa ji lụmẹ. Ẹ-ẹpwụ nya ẹka ọhọhẹ, ị ya apwụ ụnọ ohu kụrụ imiiye, da ohu da iwo imiiye kụrụ ihikichu (102,129) bala ịmagajini ụnọ iwo ineku kụrụ ịrwọnyẹ, da ohu ihikichu da iwo kụrụ okpokpo (86,911) ha angịnyị. Angịnyị angị ụnọ ine, da ohu irwiye da okpokpo (4,701) tịtọ nya ịBayịbụụ ọjẹ́jẹ! Ọ la gede-gede nyori olegu ịgọgọ ji ẹkpẹ nya ụkụrwọ ọwẹ. Lẹ, Angị Kpẹhị Rịrị Ogu à myị ọnụ ha aanahị chị odehe ọnụ wuu nyọka ya apwụ nyahị ha angịnyị bwula ịcart bala agbẹyị ịkịla ịlẹ kị kaa ya apwụ nyahị guru ká angịnyị ka yẹ ịnyịnyị lẹlẹ.

10. Ịyẹ ahị tị́ ka họ chajị nyọka jẹ́-ẹ ya ẹla Ohe bala ọ-mẹ ang jẹ gụ olene?

10 Ang ọlẹ á ka jẹ́-ẹ họ. IJihova kaa mẹ abwọlẹ kahị ka bwu ya ẹla Ohe jẹ́ẹhị ọọjịra-jịra. Lẹ, kpa ang ọmẹjẹ ọọwa họ ụkụrwọ. Họ ụkụrwọ ụka myị́ ụka bala ebwo nya angị kpa ẹrụ ọnyịịla pyẹ ọlẹ ka ji. Aanahị ịlẹ kị ji ẹpwụ nya ebwo ọọwa ka dang ụbwọ nyọka jẹ́-ẹ ya ẹla Ohe bala ọ-mẹ ang jẹ gụ olene. Ọgụ-ẹpẹtẹ nyaa tị ka jẹ́-ẹ jung ọhụ ịnyịnyị. Bọhụ ẹ-ẹpwụ nya ẹrụ ọnyịịla ọ-kpa pyẹ. Jaabwọ ká ụpwụ ịgọgọ ọlẹ ká egbeju nya ang ọjẹ́jẹ ọlẹ bwu kpụhị ịtịya, ọ-ọngịrị nyịlọhị ahị wẹẹ kpa họ ụkụrwọ ọwẹ ka, bwula olegu nya iJihova ịnyị. (Sẹk. 4:6) Ahị ka jẹ́ myị̀myị̀ nyori Ohe ka ya ọngịrị hahị, chajị ụkụrwọ nyamwụ ahị wẹẹ họ lẹ.

IJIHOVA RI OHE NYA ẸLA OMEMEEME BALA OKPUNYI

11. Ányị angị kpẹhị rịrị ogu ịla oyi ọhọhẹ à tị́ họ ụkụrwọ lawụlẹ nyọka họ ká ẹla omemeeme ka ji ẹpwarịrị nya angịnyị nya Ohe Oluhye?

11 Lụka nya oyi ọhọhẹ. Angị kpẹhị rịrị ogu ịla oyi ọhọhẹ họ ụkụrwọ lawụlẹ chajị ká ẹla omemeeme  bala okpunyi ka ji ẹpwarịrị nya angịnyị nya Ohe Oluhye. (Ụkụr. 2:42) Ọ-chụ pwokwita, ụka ká ẹla nya ụwụwụ ọdada ri akama lala ẹka iwo ine kụrụ ihikichu nyọlẹ kị ma ịKịrayịsị kpá (49 C.E.), angị kpẹhị rịrị ogu wụla ẹla ọọwa yẹ jaabwọ ká olegu ịgọgọ wẹẹ kpaa ụgbẹyị. Kori ká ọjịra-jịra á chị ebwo chajị nya ẹlẹwẹ ịnọ, ị́ ka jẹ́-ẹ kpa ẹrụ ọnyịịla pyẹ kẹm-kẹm ka. Nanana nyori ị ri ala iJuu, alẹrụ bala angịgbahị ịwẹ á ba ịhọhọ nya ala iJuu jẹ lee angịlẹ kị kaa kpa ọmẹjẹ ọọwa nwà kịlahị ka. Ọkọkọ nyọọwa, ị yọyị ka omyi ẹla nya Ohe bala abwọlẹ ká olegu ịgọgọ wẹẹ kpaa ụgbẹyị. (Ụkụr. 15:1, 2, 5-20, 28) Ịyẹ à tị́ ri ocheju nya ẹla ọọwa mẹ? IJihova wahị kụrụ eje ọchịchị nyaa, okpunyi bala ọ-yẹjula awụlẹ ji yẹẹyẹẹ, ẹrụ ọnyịịla ọ-kpa pyẹ tị nwà kịlahị-ịlahị ịnyịnyị.​—Ụkụr. 15:30, 31; 16:4, 5.

12. Ịyẹ tị́ mẹjẹ nyori ogu nya iJihova la memeeme bala o-ju okpunyi ẹ-ẹpwụ lụka nyahị ọlẹ?

12 Lụka nyahị ọlẹ. Ogu nya iJihova kaa họ ụkụrwọ nyịlẹhị-ịlẹhị chajị ká ẹla omemeeme bala okpunyi ka ji ẹpwụ nya angịnyị nya iJihova. Kẹkpẹ la ẹka nya 1985, ụpwụ ọlẹ ko ri, Zion’s Watch Tower and Herald of Christ’s Presence nya Ọya Ọkụrụ Ọhọhẹ ya egbeju nya ẹla ọhẹ ọlẹ ko ri, “Decently and in Order” bwu ụpwụ nya 1 Ala ịKọrịntị 14:40. Egbeju nya ẹla ọọwa yẹkẹẹ: “Alẹrụ la ẹla ka ya yẹẹyẹẹ ta ọjịra-jịra u-uhye nya ẹla omemeeme. Chajị ọ baba nyọka ba ‘ang myị́ ang ọlẹ kị da kpehe ẹ-ẹpwụ nya Ụpwụ Ịgọgọ lụka onyogo wuu . . . chajị kị ka ri ẹla ọmẹjẹ hahị’ jẹ.” (Rom. 15:4) Ee, ẹla omemeeme bala okpunyi ọlẹ kọ ri ang ẹjẹẹ nya angịnyị nya ịKịrayịsị ịlụka onyogo jam ogu nya iJihova alẹ ịnyịnyị. Nyọka chụ pwokwita: Kori ká ka ọjịra-jịra ọkịla ụka ọlẹ kị kaa jẹ́ Ẹpwang ọ-Kụ Gbeji, kori kọ dọmwụ ri ẹpwụma ọkịla wẹwẹ, à ka jẹ́ jaabwọ kị ka bwu jẹ́ ang ọọwa bala egbeju nya ẹla ọlẹ kị wẹẹ ka jẹ́ ang bwu. I-ijata, ọ ka lang lala o-ri ahụ nyị juwa ẹ-ẹpwa nyịlọng! Olegu nya Ohe Oluhye kem à ka jẹ́-ẹ họ ọ-yẹjula awụlẹ ọlịịwẹ ka ji myị́ lẹ.​—Sẹf. 3:9.

13. Ịtọ ẹla iyina ụpwụ nya iJemsi 3:17 à tị́ ka guhi gbịla nyọka tịlọhị?

13 Ang ọlẹ á ka jẹ́-ẹ họ. IJihova tịtọ ká angịnyị nyamwụ ka ‘yụbwọ chị ọtụchawụlẹ nyaa kpa ụ-ụwa gogo bwula olegu ịgọgọ ẹ-ẹpwụ nya okpunyi, kọ ri ochiri ọ-chị angịnyị ori bawụlẹ.’ (Efe. 4:1-3) Lẹ, tịlọng wo wẹẹ: ‘M̀ kaa  họ ká okpunyi bala ọ-yẹjula awụlẹ ka ji ẹpwụ nya ọjịra-jịra? M̀ kaa ju ihi nya angịlẹ kị wẹẹ kpịlahị? Angịkịla ka jẹ́-ẹ dahịhilem, ọgụgụ ụka kam la ụkụrwọ ẹ-ẹpwụ nya ọjịrạ-jịra? M̀ kaa pwụ eji lụka, da angịkịla ụbwọ bala ọnwụlanọ nyọka họ ụkụrwọ?’ (Wa iJemsi 3:17.) Kori ka yẹ nyori ọbaba nyọka nwụhọ ji, raabwọ bịlẹ olegu ịgọgọ. Jaabwọ ka wẹẹ ya iwe da họọ nyọka nwụ abwẹla nyang họ gụ olene, ịnyịnyị a ka há aanahị alẹng bala anyang lẹ.

IJIHOVA KAA MẸ ANG JẸ́ẸHỊ BALA Ọ-YA ANG ỊLẸ KAHỊ BABA HAHỊ

14. Jaabwọ ká ụpwụ nya Ala iKolosi 1:9, 10 mẹjẹ, ányị iJihova à tị́ mẹ ang jẹ angịnyị nyamwụ la oyi ọhọhẹ?

14 Lụka nya oyi ọhọhẹ. IJihova kaa chị ọkẹkẹnị nyọka mẹ ang jẹ angịnyị nyamwụ. (Eje. 32:8) Ọ tịtọ kị ka jọ́ọ, kọ ka háa bala ọ-ka hịhị gboyi myị́ oyi lala anyị ilikẹjẹ nyamwụ. Kori ko ri ang ọmẹjẹ nyamwụ ka ịnọ, ala ịwẹ wuu á ka chịkpẹẹ myị́ ka. (Jọn. 17:3) IJihova kpa ogu nya angịnyị nya ịKịrayịsị ịla oyi ọhọhẹ mẹ ang jẹ angịnyị nyamwụ. (Wa Ala iKolosi 1:9, 10.) Olegu ịgọgọ ko ri ọngọ dụbwọ ọlẹ ká iJisọsị myị ọnụ da angịjụgbẹyị nyamwụ ụbwọ. (Jọn. 14:16) Ọ ya ẹla ọjẹ́jẹ ha angịjụgbẹyị nyamwụ bwu ẹpwụ nya Ụpwụ Ịgọgọ bala ọ-kpaa ịtịya nya ang ịlẹ ká iJisọsị mẹjẹ bala ọhọhọ, jaabwọ kị jẹ́ wẹẹ waa ụka ohyẹẹkpẹ bwu ẹpwụ nya Ụpwụ Ịgọgọ. Ẹla ọjẹ́jẹ ọwẹ ju ọmyịmyị nyaa ọngịrị bala ọháha ọlẹ kị la ẹ-ẹga nya Ohe Oluhye, Ọnyị nyamwụ, bala ẹga nya awụlẹ.

15. Agbẹyị iyina a tị́ yẹ iJihova kọ họ ọnụ ọmyịmyị nyamwụ ọlụpwụ nya Ayịsaya 2:2, 3 jịra?

15 Lụka nyahị ọlẹ. IJihova ya neeji nyori “ụka ká ẹnụtụrụ ị-la ụka ohyeekpẹ ka pwụ eji,” angịnyị bwu ẹpwụma ọnyị myị́ ọnyị ka pá tọọọ ka ọgbọdọ nyamwụ, ọlẹ kọ ku ọmwakpa nya ịgba ọgbagba nyịlẹhị, nyọka ye ang ọmẹjẹ u-uhye nya agbẹyị nyamwụ. (Wa Ayịsaya 2:2, 3.) Ahị wẹẹ yẹ ọ-họ jịra nya ọmwụ ọyẹyẹ ọwẹ. Ahị ka yẹ nyori ịgba ọgbagba nyịlẹhị há gụ ịnya ọnọọkịla ọnyị myị́ ọnyị. IJihova tị wẹẹ mẹ ang jẹ́ẹhị nyịlẹhị-lẹhị bwu ẹpwụ nya ịBayịbụụ! (Ayị.  25:6) Bwula “ọnchẹ ọ-chịla o-hu ọkịlẹtụ ha bala ọngọ jẹ́ ẹla,” iJihova á ya ang oriri nya olegu hahị myang-myang kem ka, ọ ya hahị a-agbẹyị ịdatị-datị ịlẹ kị kpịpyọ. Ang lala apwụ ịwawa, omyi ẹla ị-kịla ju, ifim nya ịkatun bala ifim ịkịla. (Mat. 24:45) Ọ lahị lala Elihu oligu nya iJobu ko yẹkẹẹ: “Oowo a tị ri ọngọmẹjẹ lala [Ohe]?”​—Job 36:22.

Jẹ́ myị̀myị̀ nyori ẹlịlẹhị a jẹ́ wẹ lẹ, ka kpa họ ụkụrwọ ẹ-ẹpwụ nya ọhịhị nyang (Yẹ ọgba 16) *

16. Ịyẹ a tị́ ka họ nyọka nwà kịlahị ẹ-ẹpwụ nya ang nya olegu?

16 Ang ọlẹ á ka jẹ́-ẹ họ. Olegu nya Ohe ka dang ụbwọ nyọka kpa ang ọlẹ ka wa bala ọ-jẹ́ bwu ẹpwụ nya Omyi Ẹla nyamwụ họ ụkụrwọ. Raabwọ lala ọngọ da eje ọnyịịla ko yẹkẹẹ: “[IJihova] ee, mẹ ụgbẹyị nyang jẹm mẹ aalẹ, m̀ ka bang jẹ kpẹẹkpẹẹ. Họ kam kpa ọkịlẹtụ ookpokpo ju ihi nyang kpẹẹkpẹẹ.” (Eje. 86:11) Lẹ, kịnyaa la ọ-ja ri ang oriri nya olegu ọlẹ ká iJihova wẹẹ ya hahị bwu Omyi Ẹla bala ogu nyamwụ. Ịnyịlẹhị lẹ, irya nyang á ri ọ-ka jẹ́ ang ị-ịwẹ kem ka. À tịtọ ká ẹlịlẹhị ọọwa ka wung ọyị ọ-ọkịlẹtụ bala ọ-ka kpa họ ụkụrwọ ẹ-ẹpwụ nya ọhịhị nyang. Olegu nya iJihova ka dang ụbwọ nyọka họ ịnyị. À tị tịtọ nyọka ju aanang alẹng bala anyang ọhụ ịnyịnyị. (Hib. 10:24, 25) Ịyẹ tị́ du? Chajị alugbiyegu nyang ị ri lẹ. Raabwọ ká olegu nya iJihova ka dang ụbwọ nyọka wẹ ẹla bwu ọkịlẹtụ nyang ọọjịra-jịra bala ọ-ka họ upa ọlẹ ka la lọngịrị nyang wuu ịnyịnyị. Bwula ọ-họ ịnyị, a ka mẹjẹ iJihova bala Ọnyị nyamwụ nyori “ịkpịlọ” nyamwụ háng.​—Jọn. 21:15-17.

17. Agbẹyị iyina a tị́ ka jẹ́-ẹ mẹjẹ nyori à chẹkpẹ ju ogu nya iJihova?

17 Lụka o-kpii, ogu ọlẹ ká olegu nya iJihova wẹẹ kpa ụgbẹyị kem a ka hi jam ẹẹ. Lẹ, họ ụkụrwọ bala ogu nya iJihova la ila ọchịchị. Mẹ ọháha jẹ ẹ-ẹga nya ọng myị́ ọng jaabwọ ọlẹ ká Ohe kaa họ, bwula ọ-ya ẹrụ ọnyịịla ju ọng myị́ ọng ọlẹ ka tọ. Gbịla ọháha ọlẹ ká Ohe la ẹ-ẹga nya okpunyi bala ẹla omemeeme bwula ọ-họ ká ọ-yẹjula awụlẹ ka ji ẹpwụ nya ọjịra-jịra. Ke ụrụ wo la Ọngọ Mẹ Ang Jẹ Ọtụka bwula ọ-jẹ́ ang bwu ẹpwụ nya ang oriri nya olegu ọlẹ kọ wẹẹ ya hahị. Ụka ká odehe nya Olegu Onyobyi ọlẹ á ka tayịreji, á ka la uhi ojuju ka. Ọkọkọ nyọọwa, a ka jẹ́-ẹ dayị la ugbodu ojuju ẹ-ẹpwarịrị nya angịlẹ kị wẹẹ họ ụkụrwọ bala ogu nya iJihova.

EJE 3 Ahị Kpụnịrong, Ahị Yẹhị Rịrị ẹ-Ẹga Nyang

^ par. 5 À jẹ́ myị̀myị̀ nyori iJihova a wẹẹ kpa ogu nyamwụ ụgbẹyị alẹ lẹ? Ẹ-ẹpwụ nya ang ọjẹ́jẹ ọlẹ, ahị ka kụ ẹhị yẹ abwọlẹ ká iJihova kpa ogu nya angịnyị nya ịKịrayịsị ịla oyi ọhọhẹ ụgbẹyị bala abwọlẹ kọ wẹẹ kịnyaa la ọ-kpa angịnyị nyamwụ ụgbẹyị alẹ.

^ par. 1 OMYI ẸLA ỌDAWỤLẸ: Ogu nya iJihova la apa imiiye. Ụpa olepwoohe bala olodehe. Ẹ-ẹpwụ nya ang ọjẹ́jẹ ọlẹ, omyi ẹla ọlẹ ko ri “ogu” wẹẹ ya ẹla rụ ụpa olodehe.

^ par. 52 ABWỌ ỌCHỊCHỊ NYA IFOTO: Nyọlẹ ká ọọnahị o-ye ịlahị nya ụgbẹyị ọwẹ yẹ ifim nya aanahị ịlẹ kị rụ ka kpa ẹrụ ọnyịịla pyẹ ẹ-ẹpwụma ọlẹ ká ọbaba ji gụ, ọọwa gwoo gbịla nyọka họ lala ịwa-ịwa. Ụka ohyẹẹkpẹ, ọ rụ ka kpa ẹrụ ọnyịịla pyẹ ẹ-ẹga ká ọbaba ji gụ ịnyịnyị.