Kpehe ka ala ịlẹpwụ

Kpehe ka ẹga kị da egbeju nya ala ju

 ANG ỌJẸ́JẸ 42

Ịyẹ IJihova À Tị́ Ka Dang Ụbwọ Nyọka Họ?

Ịyẹ IJihova À Tị́ Ka Dang Ụbwọ Nyọka Họ?

“Ohe Oluhye . . . wẹẹ họ ụkụrwọ ẹ-ẹpwụ nya ọhịhị nyanụ, juwa hu imyi nya ụkụrwọ ọhọhọ họọ danụ bala ọ-ya ọngịrị ọ-kpa họ ụkụrwọ ọowa myị́ hanụ.”—FILIP. 2:13.

EJE 104 God’s Gift of Holy Spirit

ẸHỊ NYA ẸLA *

IJIHOVA ka jẹ́-ẹ ri ang myị́ ang ọlẹ kọ baba nyọka họ irya nyamwụ jịra. Ọ-chụ pwokwita, iJihova ri Ọngọmẹjẹ, Ọngọ kpụ́ ẹjẹ, Ọngọ ya oja ọnyịịla. Ang ịhyẹ bwu ẹpwụ nya ịlẹ ká iJihova ri ụka ọhẹ lẹ à wẹ lẹ. (Ayị. 48:17; 2 Kọr. 7:6; Gal. 3:8) Tị wẹẹ, ọ kaa kpa angịnyị ehe họ irya nyamwụ jịra ụka lụmẹ-lụmẹ. (Mat. 24:14; 28:19, 20; 2 Kọr. 1:3, 4) IJihova ka jẹ́-ẹ ya ẹla ọjẹ́jẹ bala ọngịrị ọlẹ kahị baba ha ọng myị́ ọng lẹpwụ nyahị chajị nyọka ri ang myị́ ang ọlẹ kọ baba nyọka họ irya nyamwụ jịra. Ịwẹ wuu ri ụpa nya etu nya ẹnyị nya iJihova jaabwọ ká angị jẹ́ ang kpori-kpori ịhyẹ myị ju.

2. (a) Ịyẹ tị́ du kahị ka da ịwẹẹ ụka ọhẹ myị́ kori ká iJihova á juwa kpahị họ ụkụrwọ? (b) Ịyẹ ahị tị́ ka kụ ẹhị yẹ a-ang ọjẹ́jẹ ọlẹ?

2 Ahị wuu tịtọ ká iJihova ka kpahị họ ụkụrwọ nyamwụ, ma angịhyẹ ka da ịwẹẹ myị́ kori ká iJihova á juwa kpaa họ ụkụrwọ. Ịyẹ tị́ du? Chajị ị me irya nyori, ọọlajị nya ẹka nyaa, iwe-ahụrụ nyaa ọ-ọhịhị, bala ọngịrị nyaa lẹ, ị́ jẹ́ họ jaabwọ kị tịtọ ka. Angịkịla tị ka me irya myị́ nyori akụrwọ ịlẹ kịịwa nyị kaa họ nyị nwà lẹ, ịwa nyị́ ka họ gụ ọọwa kaka. A-ang ọjẹ́jẹ ọlẹ, ahị ka ya ẹla u-uhye nya abwọlẹ ká iJihova ka jẹ́-ẹ nwụlahị nọ nyọka họ irya nyamwụ jịra. Ọọwa lẹ, ahị ka kụ ẹhị yẹ oja ịhyẹ bwu ịBayịbụụ ịlẹ kị mẹjẹ jaabwọ ká iJihova ya irya nyọka họ ụkụrwọ bala ọngịrị ha anchẹ nyamwụ anyang tụ́ alẹng lẹlẹ. Ohyẹẹkpẹ-ẹkpẹ, ahị ka yẹ jaabwọ kahị ka jẹ́-ẹ ya ẹga da ká iJihova ka kpahị họ ụkụrwọ.

JAABWỌ KÁ IJIHOVA KAA NWỤLAHỊ NỌ

3. Jaabwọ ká ụpwụ nya Ala iFilipayị 2:13 ya, ányị iJihova à tị́ kaa bwu ya imyi nya ụkụrwọ ọhọhọ hahị?

3 Wa Ala iFilipayị 2:13. * IJihova ka jẹ́-ẹ ya imyi ọnwụnwụ  lee irya nyọka họ ụkụrwọ hahị. Ányị ọ tị́ kaa bwu họ ịnyị? Ọhẹka à jẹ́ nyori ọbaba ọhẹ ji ọọjịra-jịra, lee angịgbahị nya ọjịra-jịra wa ileta o-bwu egbeju-ẹpwa nyori ọbaba ọhẹ ji ẹ-ẹga ọkịla. Chajị nyọọwa, ahị ka tọ ịlọhị wo myị́, ‘Ịyẹ m tị́ ka jẹ́-ẹ họ nyọka dụbwọ?’ Lee ọhẹka ị ya ụkụrwọ olujwo ọhẹ hahị, áhị tị jẹ́ kori kahị ka jwọọ họ ka. Lee kori kahị wa ụpa nya Ụpwụ Ịgọgọ ọhẹ ahị ka juwa kụ irya, ‘Ányị m tị́ ka kpa ụpa ọlẹ họ ụkụrwọ nyọka da angịkịla ụbwọ?’ IJihova á ka gbileehi ka họ ịngịngịhyẹ la agbụrụ ka. Ma, ụka kọ yẹ nyori ahị juwa kụ irya u-uhye nya ang ọlẹ kahị ka jụ họ, ọ ka dahị ụbwọ kahị ka tịtọ nyọka họ ang ọlẹ kahị wẹẹ kụ irya ju.

4. Ányị iJihova à tị́ ka bwu ya ọngịrị hahị nyọka họ ụkụrwọ myị́?

4 IJihova ka jẹ́-ẹ ya ọngịrị hahị nyọka họ ụkụrwọ ịnyịnyị myị́. (Ayị. 40:29) Ányị ọ tị́ ka bwu họ ịnyị? Ọ ka jẹ́-ẹ ya Olegu Ịgọgọ nyamwụ hahị nyọka dahị ụbwọ họ ang ọlẹ kahị jẹ́ họ ene-ene gụ ọwọwa. (Ehe. 35:30-35) IJihova ka jẹ́-ẹ kpa ogu nyamwụ dahị ụbwọ nyọka họ ịngịhyẹ lee ọkịla. Kori ká ụkụrwọ ọhẹ á ji ọlẹ ká jẹ́ jaabwọ á ka bwu họọ ka, tọ wo nya ụbwọ ọdada. Ịnyịnyị, à ka jẹ́-ẹ tọ Adahị Ọlọnahị olepwoohe wo ụka myị́ ụka nyọka ya ‘ọngịrị ọtụka’ nyamwụ hang. (2 Kọr. 4:7; Luk. 11:13) Ọ-chụ pwokwita lụmẹ-lụmẹ juwa ị-ịBayịbụụ u-uhye nya abwọlẹ ká iJihova nwụla alẹng bala anyang ịhyẹ nọ bwula ọ-ya imyi nya ụkụrwọ bala ọngịrị ọ-kpa họ ụkụrwọ haa. Jaabwọ kahị wẹẹ kụ ẹhị yẹ oja ịwẹ, kụ irya jaabwọ ká iJihova ka jẹ́-ẹ kpang họ ụkụrwọ ụma ịlẹ ká angịịwa họ wẹ.

ANG ỌLẸ KÁ IJIHOVA DA ALẸNG ỊHYẸ ỤBWỌ NYỌKA HỌ

5. Ẹlịyẹ ahị tị́ ka jẹ́ bwu ụgbẹyị bala ụka ọlẹ ká iJihova kpa iMosisi họ ụkụrwọ?

5 IJihova da iMosisi ụbwọ nyọka ri ọngọchịda nya ala Isirẹlụ. Ma ụka oyina iJihova à tị́ kpọọ họ ụkụrwọ? Ụka ọlẹ kị “mẹ ẹla ọjẹ́jẹ okpori-kpori nya ala Ijipiti jẹ iMosisi” kpá, kọ me nyori ọwa nyị nwụlanọ lẹ ịnyị? (Ụkụr. 7:22-25) Ehe, iJihova dọmwụ nyọka kpa iMosisi họ ụkụrwọ ụka kọ dọọ ụbwọ nyọka ri ọngọ kpịlọmwụ keji bala ọngọ kpẹnẹẹ kpá ịnyị. (Ụkụr. 7:30, 34-36) IJihova ya ugbodu ojuju ha iMosisi nyọka dayị ya ẹla ị-ịlahị nya Adịrahụ ọlẹ kọ gụgụ wuu Ijipiti. (Ehe. 9:13-19) Ẹlịyẹ ahị tị́ ka jẹ́ bwu ụgbẹyị bala ụka ọlẹ ká iJihova kpa iMosisi họ ụkụrwọ? IJihova kaa kpa angịlẹ kị kaa maga nyọka ba abwụma nyamwụ jẹ bala ọ-kpụnịrọọ họ ụkụrwọ nyamwụ.—Filip. 4:13.

6. Ẹlịyẹ ahị tị́ jẹ́ bwu ụgbẹyị ọlẹ ká iJihova kpa ịBaasilayị da Adịrahụ iDevidi ụbwọ?

6 Ẹka ohu ịmanyị tị́ kịlahị, iJihova kpa ịBaasilayị da Adịrahụ iDevidi ụbwọ. Ụka ká iDevidi bala angịnyị nyamwụ wẹẹ rụnyẹ rụ hi Abụsalọm, ‘ịnyịrọ chaa pyẹpyẹ lụmẹ, imyi bala imyi-enyi juwa nwaa’ ịnyịnyị. ỊBaasilayị, kọ chị okwirichi yẹẹyẹẹ uka ọwẹ bajẹ bala angịkịla kele nyọka ya ang ịlẹ ká iDevidi bala angịnyị nyamwụ baba haa, nanana nyọlẹ kọ jẹ́ nyori ị ka nwọọ myị́ chajị nyọọwa. ỊBaasilayị á ya nyori iJihova á ka jẹ́-ẹ kpọọ họ ụkụrwọ kaka chajị ọ chị okwirichi lẹ ka. Ọkọkọ nyọọwa lẹ, ọ kpa ang ọlẹ kọ la da anchẹ nya Ohe Oluhye ịlẹ kị la ịbaba ụbwọ. (2 Sam. 17:27-29) Ẹlịyẹ ahị tị́ jẹ́? Ẹka ọnyị myị́ ọnyị kahị gu, iJihova ka jẹ́-ẹ kpahị da aanahị iloye nyahị lee ịla ẹpwụma ịkịla ụbwọ la ịbaba nyaa. (Etu 3:27, 28; 19:17) Kori kahị dọmwụ jẹ́ daa ụbwọ lịlọhị ka wẹwẹ, ahị ka jẹ́-ẹ gba ụbwọ kpehe nyọka da ụkụrwọ nya Ohe Oluhye olodehe wuu ụbwọ. Ị ka jẹ́-ẹ kpa okpoko ọọwa da aanahị ụbwọ ẹ-ẹga ká ọbaba ji.—2 Kọr. 8:14, 15; 9:11.

7. (a) Ányị iJihova à tị́ kpa iSimyọn họ ụkụrwọ? (b) Ịyẹ tị́ du ká ọọwa ri ọhụ ojuju hahị?

7 Ọlẹng okwirichi ọhẹ juwa i-iJerusalẹm  ká ẹnyị nyamwụ ri iSimyọn. Ọ kaa gbịgba ha Ohe Oluhye kpẹẹkpẹẹ, Ọ tị chọọ ehe nyori ọ́ ka gbu ka gbee kọ ka yẹ iMesaya ẹ-ẹhị. Ehe ọchịchị ọwẹ ka ju iSimyọn ọhụ lụmẹ chajị ọ godayị gbe iMesaya lụka ọtata lẹ. IJihova nwọọ uri nya ọmyịmyị bala ugbodu ojuju onyudiyo nyamwụ. Ẹnẹhẹ lẹ, “olegu ịgọgọ a kpa iSimyọn ọwẹ kele ka ube ịgọgọ” lẹlẹ. Ọ yẹ iJisọsị ụ-ụwa ụka kị kpọọ ụ-ụbwọ, ọọwa lẹ iJihova à kpọọ yọmwụ neeji u-uhye nya ọnyị ochiche ọwẹ kọ wẹẹ ka nwà ka ri ịKịrayịsị lẹlẹ. (Luk. 2:25-35) Nanana nyori iSimyọn gbu ene ká iJisọsị dọmwụ nya ụkụrwọ nyamwụ, ọ myọọ lẹhị nyọlẹ ká iJihova kpọọ họ ụkụrwọ ụ-ụgbẹyị ọwẹ. Ang ịnyịịla lụmẹ-lụmẹ tị juwa godayị gboo wẹẹ! Odehe onyeewe, ọ ka yẹ jaabwọ ká eji ọkpakpa nya iJisọsị ka kpa ahị ọwawa wẹ ugbiyegu nya angịnyị ehe wuu. (Ọmw. 22:18) Ụgbẹyị ọnyị myị́ ọnyị ọlẹ ká iJihova á kpahị họ ụkụrwọ nyamwụ kaa myịhị lẹhị ịnyịnyị.

8. Ányị iJihova à tị́ ka bwu kpahị họ ụkụrwọ lala ịBanabasị myị́?

8 Lụka nya oyi ọhọhẹ nyọlẹ kị ma ịKịrayịsị kpá, ọlẹng ọlọnahị ọhẹ ọlẹ ká ẹnyị nyamwụ ri iJosẹfụ ya ẹga da ká iJihova ka kpọọ họ ụkụrwọ. (Ụkụr. 4:36, 37) Ọ chịkpẹẹ myị́ nyori, ọọlajị nya abwọlẹ kọ jẹ́-ẹ kpụ́ angịnyị ẹjẹ lụmẹ à du ká angịmyẹrụ nya ịKịrayịsị jwoo ẹnyị nya “ọngọlẹ kọ kaa ju ọngịnyị ọọnamwụ ọhụ myị́” lẹ. Lala ọ-chụ pwokwita, nyọlẹ ká ịSọlụ wẹ ka ri ọngịnyị nya ịKịrayịsị kpá, ala ọjịra-jịra kaa juhi nyọka yẹjulọọ chajị nya abwọlẹ kọ kaa tụ́ angịnyị nya ịKịrayịsị pyịpyị ene-ene. Ma, ịBanabasị ọlọnahị kpọ́ọ ẹjẹ bala ọ-dọọ ụbwọ, ọọwa myị̀ ịSọlụ lẹhị yẹẹyẹẹ. (Ụkụr. 9:21, 26-28) Myịmyị, ụka ọhẹ juwa ká angịgbahị ịla iJerusalẹm tịtọ nyọka ju aanịnaa ịlẹ kị ji lụrụ hwẹẹ ụ-ụwa Antiyọkọ ọla iSiriya ọhụ. Owo ị tị́ du ẹrụ? ỊBanabasị ịnyị! Ị jẹ́ chụ ịnyịlẹhị. Ụpwụ Ịgọgọ họ kahị jẹ́ nyori, ịBanabasị dọmwụ nyọka “jwaa ọhụ nya ịlẹhị-ịlẹhị yẹkẹẹ, anụ nyị juwa kpa ọkịlẹtụ ookpokpo godayị kpakpakpa ẹ-ẹpwụ nya ọchịla o-hu ọkịlẹtụ ha . . . mẹ.” (Ụkụr. 11:22-24) Ịnyịnyị alẹ, iJihova ka jẹ́-ẹ dahị ụbwọ nyọka ju aanahị ịkịla ọhụ myị́. Lala ọ-chụ pwokwita, ọ ka jẹ́-ẹ kpahị ju angịlẹ ká angịnyị nyaa gbu hyaa ọhụ myị́. Lee o-guhi gbịla nyọka ju angịlẹ kị jụ́ ẹdụrụ lee ọ-la ọkịlẹtụ ọ-kpụ enyi ụga lee ọ-wụraa bwu ifon chajị nyọka jwaa ọhụ. À ka ya ẹga da iJihova ka kpang họ ụkụrwọ lala ịBanabasị?—1 Tẹs. 5:14.

9. Ẹlịyẹ ahị tị́ jẹ́ bwu ụgbẹyị ọlẹ ká iJihova bwu da ọọnahị Vasily ụbwọ nyọka ri ọngọ kpẹhị rịrị ọnyịịla?

9 IJihova da ọọnahị ọhẹ kọ ri Vasily ụbwọ nyọka ri ọngọ kpẹhị rịrị ọnyịịla ẹ-ẹga nya ang nya olegu ịnyịnyị. O gu ẹka iwo imiiye kụrụ ịrwọnyẹ ụka ọlẹ kị chwọọ nyọka ri ọngọgbahị nya ọjịra-jịra. Vasily juhi nyori ọwa nyị́ ka jẹ́-ẹ da ala ọjịra-jịra ụbwọ myị́ ka, ọgụgụ wuu ri angịlẹ kị juwa ẹ-ẹpwụ nya iwe-ahụrụ olujwo. Ma, ọ ye ẹla ọmẹjẹ ọlam-ọlam bwu ẹga nya angịgbahị nya ọjịra-jịra ịkịla ịlẹ kị la ẹla ọjẹ́jẹ yẹẹyẹẹ. Vasily maga nyịlẹhị-ịlẹhị nyọka nwà kịlahị-ịlahị bwula ang ọlẹ kọ jẹ́ bwu Ube-ụpwụ nya Angịgbahị nya Ọjịra-jịra Bala Angịmyẹrụ. Lala ọ-chụ pwokwita, ọ da ẹnyị nya ang ichiche-ichiche ịlẹ kọ ka jẹ́-ẹ họ myị́ ju ụ-ụpwụ. Jaabwọ kọ wẹẹ jụ ọnyọọnyị họ dụmwọ-dụmwọ, ịnyịnyị uhi ojuju nyamwụ à dọmwụ nyọka myị́ hyoo lẹlẹ. Lẹẹlẹẹ ọ kaa yẹkẹẹ, “Ang ọlẹ kọ kaa ri uko ọchịchị nyam ene-ene, ri ọkẹkẹnị nyam lẹẹlẹẹ lẹ. Ụka ká iJihova á dam ụbwọ nyọka jẹ́ ụpwụ ịgọgọ ọlẹ kọ pwoku nyọka kpa ju ọọnahị ọhẹ lee ọkịla ọhụ ọọjịra-jịra, m̀ kaa chị ọkẹkẹnị nyịlẹhị-ịlẹhị.” Kori ká ba ọgụ-ẹpẹtẹ nya Vasily jẹ, ya ẹga da ká iJihova ka kpang họ ụkụrwọ aalẹ, ọ ka ya ọngịrị hang nyọka họ ụkụrwọ gụ ọwọwa ọọjịra-jịra.

 ANG ỌLẸ KÁ IJIHOVA DA ANYANG ỊHYẸ ỤBWỌ NYỌKA HỌ

10. (a) Ẹlịyẹ Abigẹlụ à tị́ họ? (b) Ẹlịyẹ a tị́ jẹ́ bwu ọgụ-ẹpẹtẹ nyamwụ?

10 IDevidi bala angịnyị nyamwụ baba nya ụbwọ ọdada ụka ọlẹ ká Adịrahụ ịSọlụ wẹẹ kwaa. Ọọwa angịnyị nya iDevidi à bịlẹ ang oriri ọ-pyịnyẹng bwu ẹga nya ọlẹng ọhẹ bwu iSirẹlụ ká ẹnyị nyamwụ ri ịNabalụ lẹlẹ. Ọ chaa kpẹẹ nyọka bịlẹ ang bwu ẹga nya ịNabalụ, chajị ị kaa kpẹhị rịrị ịkpịlọ nyamwụ u-ugbileji. Ma, ịNabalụ á myị ya ịngịngịhyẹ haa ka, chajị o ri ọngọ kaa yẹ ịlọmwụ-ịlọmwụ kem. Ẹla ọọwa ju iDevidi agbama nyịlẹhị-ịlẹhị, kpụ̀ ọ chanya nyọka nwụ ịNabalụ bala anyị alẹng ịlẹpwa nyamwụ wuu. (1 Sam. 25:3-13, 22) Ma, ahụ nya ịNabalụ ọhụ́hị-hụ́hị ọlẹ kọ ri Abigẹlụ, ri ọnyang ọ-jé ẹla yẹẹyẹẹ ịnyịnyị. Ọ mẹ ugbodu ojuju ọtụka-ọtụka jẹ ụka ọlẹ kọ ka ẹga nya iDevidi. Ọ nọnọ ị-ịpyị ị-ịlahị nyamwụ lẹ ọ byoo nyori, nyị họ kịị nyị kpa ịwọ e-egbeju bwula ọ-nwụ ịNabalụ bala angịnyị nyamwụ kaka lẹlẹ. Ọ byoo lihi-ihi nyị pẹhi ẹlẹwẹ ju iJihova ụ-ụbwọ mẹ. Omyi ẹla ọ-dụmwọ nya Abigẹlụ bala ang ọhọhọ la ẹla ọjẹ́jẹ nyamwụ gu iDevidi ọ-ọkịlẹtụ. Ọ wẹ ka jẹ́ nyori iJihova à doo ẹrụ lẹ. (1 Sam. 25:23-28, 32-34) Abigẹlụ la abwụma ịlẹ kị du kọ ju apyobwuna ha iJihova. Ịnyịnyị, iJihova ka jẹ́-ẹ kpa aanahị anyang ịlẹ kị la abwụma nya ihi ojuju bala ẹla ọjẹ́jẹ họ ụkụrwọ nyọka ju alugbiyegu nyaa bala angịkịla ọọjịra-jịra ọngịrị.—Etu 24:3; Tay. 2:3-5.

11. Ẹlịyẹ anyị anyang nya ịChalum à tị́ họ? Oowo à tị́ wẹẹ ba ọgụ-ẹpẹtẹ nyaa jẹ alẹ?

11 Ẹka ohu ịmanyị tị́ kịlahị, anyị anyang nya ịChalum juwa ẹ-ẹpwụ nya angịlẹ ká iJihova kpa nwụla egwalọ nya iJerusalẹm. (Neh. 2:20; 3:12) Nanana nyori ịChalum adaa ri olegbeju ọkpịlahị, anyị anyang ịwẹ nwụlanọ nyọka họ ụkụrwọ olujwo bala oluhihi ọwẹ. (Neh. 4:15-18) Ẹla nyaa ọwẹ datị gbang-gbang hi angị gbẹgbịlẹ nya ala iTekowa ịlẹ kị “myị họ ụkụrwọ” ọwẹ ka! (Neh. 3:5) Kụ irya nya ọkẹkẹnị ọlẹ ká anyị nya ịChalum ịwẹ ka la ụka kị họ ụkụrwọ ọwẹ kpá ẹ-ẹpwụ nya ahyẹẹnụ iwo ịrụ kụrụ imiiye wẹẹ! (Neh. 6:15) Ụka nyahị ọlẹ, aanahị anyang ịhyẹ kaa chị ọkẹkẹnị nyọka họ ụkụrwọ ọkpọngchị ọhẹ ha iJihova. Ụkụrwọ ọọwa ri ọ-nwụ́ ebe ị-kpa họ ụkụrwọ nya iJihova bala ọ-nwụlaa. Ahị baba nya aanahị anyang ịlẹ kị jẹ́ ang ịlịịwẹ, la ịla ọchịchị, bala o-godayị giri-giri ha iJihova nyọka jụ ụkụrwọ ọwẹ họ myị́.

12. Ányị iJihova à tị́ ka kpahị họ ụkụrwọ myị́ lala ịTabita?

12 IJihova yụbwọ gu ịTabita ọ-ọkịlẹtụ nyọka “họ ụkụrwọ ọnyịịla . . . [bala ọ-ka] da ikpehika ụbwọ,” ọgụgụụgụ angịlẹ kị ri ịhụ-egu. (Ụkụr. 9:36) Chajị nya ụbwọ ọ-pyẹ maa bala ọnahị ọhọhọ nyamwụ, angịnyị lụmẹ-lụmẹ bida ụka kọ gbu. Ị tị chị ọkẹkẹnị ọtụka-ọtụka ụka ká iPita wuloo eji bwula igu. (Ụkụr. 9:39-41) Ẹlịyẹ ahị tị́ jẹ́ bwu ẹga nya ịTabita? Kori kahị ri onjwo lee o-ri ọngọgbahị riri, kori kahị ri ọlẹng lee ọnyang wẹwẹ, ahị ka jẹ́-ẹ họ ang ịnyịịla ịlẹ kị ka da aanahị anyang bala alẹng ụbwọ.—Hib. 13:16.

13. Ányi iJihova à tị́ kpa ọọnahị ọnyang ọhẹ ọlẹ kọ kaa ju oyi họ ụkụrwọ? Ányị ọ tị́ ya?

13 Ọọnahị ọnyang ọhẹ ọlẹ ká ẹnyị nyamwụ ri iRutu kaa ju oyi, ọ tị tịtọ nyọka ri ọngọ kpa ẹrụ ọnyịịla pyẹ ka ọpyị ọkịla. Ụka kọ ri onjwo ochiche, ọ kaa ya apwụ nya ịtrakị ha angịnyị la agaga bwu ẹpwa ka ẹpwa. Ọ ya nyori ụkụrwọ ọwẹ nyị kaa kpụ ọwa ịpyọ yẹẹyẹẹ. Ma, ọ kaa lọọ ujwo lụmẹ nyọka ya ẹla nya Ohe je angịnyị lịlọmwụ lee ọ-dayị rịrị ị-ịlahị nyaa ya ẹla. Nanana nyori iRutu kaa ju oyi, o ri ọngọ ye ịlahị nya ụgbẹyị kpụrụrụ ụka kọ gu ẹka iwo kụrụ ineku. La ẹka nya 1946, ọ ka ube-ụpwụ nya  Gilead. Ọ nọ chẹẹ ị yọọ du ka họ ụkụrwọ ịị Hawaii bala Japan. IJihova kpọọ họ ụkụrwọ nya ẹrụ ọnyịịla ọ-kpa pyẹ yẹẹyẹẹ ẹ-ẹga imiiye ịwẹ. Ọ hi pyịnyẹng kọ ka ri ẹka iwo ineku ká iRutu wẹẹ kpa ẹrụ ọnyịịla pyẹ lẹ. Ọ yẹkẹẹ: “IJihova à ri Ọngọ kaa ya ọngịrị ham lẹ. Ọ dam ụbwọ kụrụ oyi ojuju nyam lẹ. M̀ jẹ́ myị̀myị̀ nyori iJihova ka jẹ́-ẹ kpa ọng myị́ ọng ọlẹ kọ dahịhiloo họ ụkụrwọ.”

YA ẸGA DA KÁ IJIHOVA A KPANG HỌ ỤKỤRWỌ

14. Jaabwọ ká ụpwụ nya Ala iKolosi 1:29 mẹjẹ, ịyẹ ahị tị́ ka họ kori kahị tịtọ ká iJihova ka kpahị họ ụkụrwọ?

14 Ego mẹjẹ nyori iJihova kaa kpa anchẹ nyamwụ họ ang lụmẹ-lụmẹ. Ịyẹ ọ tị́ ka kpang họ? Ọ kpụnịrọ abwọlẹ ká nwụlanọ nyọka họ ụkụrwọ lụmẹ kaka ba. (Wa Ala iKolosi 1:29.) Kori ká ya ẹga da, iJihova ka jẹ́-ẹ dang ụbwọ nyọka ri ọngọ kpa ẹrụ ọnyịịla pyẹ la ila ọchịchị, ọngọmẹjẹ ọnyịịla, ọngọ jẹ́ kpụ́ angịnyị ẹjẹ, ọngọ jẹ́ họ ụkụrwọ yẹẹyẹẹ, oligu ọlẹ kọ kaa dụbwọ, lee ang myị́ ang ọlẹ kọ baba nya irya nyamwụ ọ-ka họ jịra.

15. Jaabwọ ká ụpwụ nya 1 iTimoti 4:12, 15 juhi ọhụ, ịyẹ aanahị ikolobya à tị́ ka bịlẹ iJihova kọ ka daa ụbwọ họ?

15 Anụ aanahị ikolobya ịlẹ kanụ wẹẹ nwà ka ri angịgbahị tị bẹẹ? Ọbaba ji ọọjịra-jịra ká alẹng ịlẹ kị la ogogo ka hu ịlaa ha nyọka họ ụkụrwọ nya angịmyẹrụ. Ọọjịra-jịra lụmẹ-lụmẹ, angịgbahị ju iru gụ angịmyẹrụ. Angịhyẹ nyanụ anụ aanahị ikolobya ka jẹ́-ẹ nwụlanọ nyọka họ ụkụrwọ gụ ọwọwa ọọjịra-jịra? Ụka ọhẹ aanahị ịhyẹ kaa ya nyori, o-ri angị kpa ẹrụ ọnyịịla pyẹ kem nyị nwà ịwa lẹ. Ó-ri ịnyị kọ lang aalẹ, bịlẹ iJihova kọ ka dang ụbwọ la irya nyọka ri ọngọmyẹrụ bala ọ-ya ọngịrị hang nyọka họ ang myị́ ang ọlẹ á ka jụ́ họ ị-ịgba ọgbagba nyamwụ. (Ọngọ. 12:1) Ahị baba nya ụbwọ ọdada nyang!—Wa 1 iTimoti 4:12, 15.

16. Ịyẹ ahị tị́ ka bịlẹ iJihova kọ ka họ hahị? Ịyẹ tị́ du?

16 IJihova ka jẹ́-ẹ dang ụbwọ nyọka họ ang myị́ ang ọlẹ kọ baba nya irya nyamwụ ọ-ka họ jịra. Lẹ bịlọọ kọ ya imyi nya ụkụrwọ ọhọhọ nyamwụ hang, bala ọngịrị ọlẹ ká baba nyọka jwọọ họ myị́ hang ịnyịnyị. Kori ká ri onjwo lee ọngọgbahị, kpa ụka, ọngịrị, bala ang ịkịla ịlẹ ká la họ ụkụrwọ lẹẹlẹẹ nyọka yogbo ha iJihova. (Ọngọ. 9:10) Kori ká la iwe nyọka họ ụkụrwọ nya iJihova gụ ọwọwa, a tụụbwọ hyoo chajị nya uhi ojuju lee chajị à me irya nyori á ka jwọọ họ ka lẹ ka. Ahị wuu la iwe ọtụka-ọtụka nyọka họ ang myị́ ang ọlẹ kahị ka jụ́ họ myị́ nyọka kpa ogbo ọlẹ kọ chịla wẹ ẹga nya Adịda ọnyịịla nyahị!

EJE 127 Ụma nya Ọngịnyị Ọlẹ Ḿ ka Ri

^ par. 5 À me irya nyori à ka jẹ́-ẹ họ ụkụrwọ nya iJihova gụ ọwọwa? À kaa kụ irya kori ká ju apyobwuna họọ wẹẹ? Lee à tịị me irya nyori á baba nyọka họ ụkụrwọ gụ ọọwa ha iJihova jaabwọ myị́ abwọ kọ tịtọ ka? Ang ọjẹ́jẹ ọlẹ ka kụ ẹhị yẹ agbẹyị ịdatị-datị ịlẹ ká iJihova ka jẹ́-ẹ ya irya bala ọngịrị hahị nyọka ri ang myị́ ang ọlẹ kọ baba nya irya nyamwụ ọ-ka họ jịra.

^ par. 3 Nanana nyori ịPọlụ da ụpwụ ọwẹ ta Angịnyị nya ịKịrayịsị ịlụka nyamwụ, omyi ẹla nyamwụ ju apyobwuna ha anchẹ nya iJihova wuu.