Kpehe ka ala ịlẹpwụ

Kpehe ka ẹga kị da egbeju nya ala ju

 ANG ỌJẸ́JẸ 30

Juwa Hịhị Ba Ẹlịlẹhị Jẹ

Juwa Hịhị Ba Ẹlịlẹhị Jẹ

“Ịngịngịhyẹ-ẹ́ẹ̀ kpụm ịpyọ gụ ọ-ka wo oja ya anyị nyam nyị juwa hịhị ba ẹla nya ịlẹhị jẹ kaka.”—3 JỌN. 4.

EJE 54 “Ụgbẹyị Lẹẹ”

ẸHỊ NYA ẸLA *

1. Jaabwọ ká ụpwụ nya 3 ịJọn 3, 4 ya, ịyẹ à tị́ kaa ya ọkẹkẹnị hahị?

KỤ IRYA jaabwọ ká ọlẹrụ ịJọn ka chị ọkẹkẹnị kaka ba nyọlẹ kọ wo nyori angịlẹ kọ dụbwọ wẹ ka jẹ́ ẹlịlẹhị, nyị kịnyaa la ọ-gbịgba ha iJihova wẹẹ. Angịnyị nya ịKịrayịsị ị-chịla o-hu ọkịlẹtụ ha ịlẹ kị lala anyị nya ịJọn o-olegu, la akama lụmẹ-lụmẹ, ịJọn tị họ ụkụrwọ yẹẹyẹẹ nyọka ju ọmyịmyị nyaa ọngịrị. Ẹ-ẹga nyahị ịnyịnyị, ọ kaa kpụhị ịpyọ ụka ká anyị nya ịlọhị lee anyị nyahị o-olegu á hu ịlaa ju iJihova ụ-ụbwọ bala ọ-kịnyaa ẹ-ẹpwụ nya ịgba ọgbagba nyamwụ.—Wa 3 ịJọn 3, 4.

2. Ịyẹ tị́ du ká ịJọn da ileta nyamwụ?

2 Ọ chịkpẹẹ myí nyori ịJọn kụ Efesọsị lee epweji ọhẹ bọọ ba la ẹka 98 nyọlẹ kị ma ịKịrayịsị kpá. Ọhẹka, ọ rụ ka ụwa nyọlẹ kị gbọọ kpehe bwu ube nya agba ọla ịPatịmọsị kpá. Lụka ọwẹ-ọwẹ ịnyịnyị, olegu ịgọgọ nya iJihova kpọọ da ileta ịta ịhyẹ. Ang odudu kọ da ileta ịwẹ ri ọ-ka gu Angịnyị nya ịKịrayịsị gbịla nyọka yụbwọ chị ọmyịmyị nyaa giri-giri ẹ-ẹga nya iJisọsị bala ọ-ka juwa hịhị ba ẹlịlẹhị jẹ.

3. Ịtọ ẹla iyina ahị tị́ ka wẹ?

3 ỊJọn à ri ọlẹrụ nya ịKịrayịsị ohyẹẹkpẹ ọlẹ kọ hịhị lẹ, ọ tị chị uko u-uhye nya ẹla ọtịpyọ ọlẹ ká angịmẹjẹ nya ọnọọkịla ka họ ẹ-ẹga nya ọjịra-jịra. * (1 Jọn. 2:18, 19, 26) Angịmẹjẹ nya ọnọọkịla ịwẹ ya nyori ịwa nyị jẹ́ Ohe, ma ị́ kaa ba ehile nyamwụ jẹ ka. Ahị kụ ẹhị yẹ ụbwọ ọlẹ ká ịJọn gbile Angịnyị nya ịKịrayịsị ụ-ụrụ wẹẹ. Jaabwọ kahị wẹẹ họ ịnyị, ahị ka wẹ ịtọ ẹla ịta: Ịyẹ à tị́ ri etu nyọka hịhị ba ẹlịlẹhị jẹ? Ịyẹ à tị́ ka chịhị ochuchuu la ọ-họ ịnyị myị́? Ányị ahị tị́ ka bwu da awụlẹ ụbwọ nyọka kịnyaa ẹ-ẹpwụ nya ẹlịlẹhị?

 ỊYẸ À TỊ́ RI ETU NYỌKA HỊHỊ BA ẸLỊLẸHỊ JẸ?

4. Jaabwọ ká ụpwụ nya 1 ịJọn 2:3-6 bala 2 ịJọn 4, 6 mẹjẹ, ịyẹ ahị tị́ baba nyọka họ chajị kahị ka jẹ́-ẹ hịhị ba ẹlịlẹhị jẹ?

4 Kori kahị ka hịhị ba ẹlịlẹhị jẹ aalẹ, ahị baba nyọka jẹ́ ẹlịlẹhị ịlẹpwụ nya Omyi Ẹla nya Ohe. Datị hi ọwẹ, ahị baba nyọka “kpa ehile nya Ohe Oluhye họ ụkụrwọ,” ọọwa ri, ahị ka ju ihi nyaa. (Wa 1 ịJọn 2:3-6; 2 ịJọn 4, 6.) IJisọsị ya ọgụ-ẹpẹtẹ ọkpẹẹkpẹẹ deeji u-uhye nya ihi nya iJihova ojuju. Lẹ, ụgbẹyị ọkpọnchị ọhẹ ọlẹ kahị ka jẹ́-ẹ ju ihi nya iJihova ri ọ-ka ba ọgụ-ẹpẹtẹ nya iJisọsị jẹ rige-rige jaabwọ kọ chịkpẹẹ kaka ba.—Jọn. 8:29; 1 Pit. 2:21.

5. Ẹlịyẹ ahị tị́ ka jẹ́ myị̀myị̀ pyii?

5 Kori kahị ka jẹ́-ẹ hịhị ba ẹlịlẹhị jẹ aalẹ, o ri opyii kahị ka jẹ́ myị̀myị̀ nyori iJihova ri Ohe nya ẹla nya ịlẹhị, lẹ ang myị́ ang ọlẹ kọ byihi ẹ-ẹpwụ nya ịBayịbụụ, ri ẹlịlẹhị. Ahị ka jẹ́ myị̀myị̀ pyii ịnyịnyị nyori iJisọsị à ri iMesaya ọlẹ ká iJihova chehe lẹ. Angịnyị lụmẹ-lụmẹ alẹ á myị nyori iJihova chụ iJisọsị nya Adịrahụ nya Ịpyị-Adịrahụ nyamwụ ka. ỊJọn da ọna nyori “iru nya angị hụ angịnyị ahị” nyị juwa ịlẹ kị ka jẹ́-ẹ hụ angịlẹ kị myị ọnụ ju ẹlịlẹhị yẹẹyẹẹ ka, ahị. (2 Jọn. 7-11) ỊJọn da yẹkẹẹ: “Oowo a tị́ ri ọlọnọọkịla? Ọng myị́ ọng ọlẹ kọ pwa yẹkẹẹ, i-iJisọsị nyaa ri ịKịrayịsị Ọngọchịda . . . ka aalẹ, ọngọọwa a ri ọlọnọọkịla ọọwa lẹlẹ.” (1 Jọn. 2:22) Ụgbẹyị ọlẹ kahị ka jẹ́-ẹ cheji ba hi ụhwahị ri ọ-ka jẹ́ Omyi Ẹla nya Ohe Oluhye. Ọkẹnẹ-kẹnẹ kahị họ ịnyị lẹ, ahị ka jẹ́-ẹ wẹ ka jẹ́ iJihova bala iJisọsị lẹlẹ. (Jọn. 17:3) Ọọwa ahị ka jẹ́-ẹ jẹ́ myị̀myị̀ nyori ahị jam ẹ-ẹpwụ nya ẹlịlẹhị lẹlẹ.

ỊYẸ À TỊ́ KA CHỊHỊ OCHUCHUU LA Ọ-KA HỊHỊ BA ẸLỊLẸHỊ JẸ MYỊ́?

6. Ịyẹ à tị́ ka chị anjwo ochuchuu myị́ la ọ-ka hịhị ba ẹlịlẹhị jẹ?

6 Angịnyị nya ịKịrayịsị wuu ka dụmwọ-dụmwọ chajị ká ẹla ọmẹjẹ nya angịnyị ehe ka hwaa ahị ka. (1 Jọn. 2:26) Anjwo gụgụgụ baba nyọka dụmwọ-dụmwọ u-uhye nya ụnya ọwẹ. Alexia, * ọọnahị ọhẹ bwu France, kọ gu ẹka 25 yẹkẹẹ: “Ụka kam ju u-ube-ụpwụ, ị mẹjẹ́m nyori angịnyị ehe nyị bwu ẹga nya iyo bala ọ-mẹ ẹla ọjẹ́jẹ nya angịnyị ehe ịkịla jẹ́m ịnyịnyị. O dudu ká ẹlịlẹhị chịm ahị owu. Ang ọmẹjẹ nyaa ịịwa kpụm ịpyọ. Ma, m̀ yẹ nyori ọ́ há nyọka myị ju ẹla myị́ ẹla ọlẹ ká angịmẹjẹ nyahị ya, m ka ya iwe ha iJihova nyọka ya ẹla chẹẹ ka, lẹ ka.” Alexia jẹ́ ụpwụ ọlẹ ko ri, Life—How Did It Get Here? By Evolution or by Creation? Ẹ-ẹpwụ nya  epwihi ịmanyị-ịmanyị, ọ́ la ịwẹẹ ọdada ọhẹ-lọhẹ kaka. Alexia yẹkẹẹ: “M̀ maga m jẹ́ myị̀myị̀ nyori ẹ-ẹpwụ nya ịBayịbụụ ẹlịlẹhị à ji lẹ. M̀ tị wẹ ka jẹ́ nyori kori kam ba ẹla ọlẹpwụ nyamwụ jẹ, m̀ ka ye ọkẹkẹnị bala okpunyi.”

7. Ịyẹ ahị tị́ ka dụmwọ-dụmwọ chajị kahị ka họ ka? Ịyẹ tị́ du?

7 Angịnyị nya ịKịrayịsị wuu, anjwo tụ́ angịgbahị, ka dụmwọ-dụmwọ chajị kị ka la ọhịhị nya ọlahị imiiye ka. ỊJọn ya nyori ahị nyị́ ka jẹ́-ẹ hịhị ba ẹlịlẹhị jẹ, ahị ka myịmyị-ị̀ kụ ụwụwa la ọhịhị nya ụya ọhọhọ ka. (1 Jọn. 1:6) Kori kahị tịtọ ká ẹla nyahị ka kpụ iJihova ịpyọ aalẹ, ahị baba nyọka kpịtịya nyori, ọ kaa yẹ ang myị́ ang kahị juwa họ. Kori ká angịnyị á yẹ ang ịlẹ kahị juwa họ i-iwibaa ka wẹwẹ, iJihova kaa yaa.—Hib. 4:13.

8. Ịyẹ ahị tị́ ka cheji ba hi?

8 Ahị ka cheji ba ụgbẹyị ọlẹ ká alodehe kaa yẹ ọhọbịrị ọhọhọ. Ọlẹrụ ịJọn da yẹkẹẹ: “Ó ri kahị yẹkẹẹ, áhị́ la ọhọbịrị ọhẹ-lọhẹ ka aalẹ, ahị juwa pịrị ịlọhị ju ododu.” (1 Jọn. 1:8) Ụka nya ịJọn anyị, angị ji ẹkpẹ da ịgba ọgbagba nya iJihova ya nyori ọngịnyị nyị ka jẹ́-ẹ ri oligu nya Ohe kori ko dọmwụ kaa mamachịng họ ang ọtịpyọ. Alẹ, ahị jam ẹ-ẹpwarịrị nya angịlẹ kị la irya ọlịnyịịnyị. Angịnyị lụmẹ-lụmẹ ya nyori ịwa nyị myị la Ohe, ị́ tị myị ju ihi nya ẹla ọlẹ ká iJihova ya u-uhye nya ọhọbịrị ka, ọgụgụụgụ ri ẹla ọlẹ ká iJihova ya u-uhye nya ẹga nya awụlẹ ọkaka. Ụma nya ẹga nya awụlẹ ọkaka ịhyẹ ji ká iJihova ya nyị ri ọhọbịrị, ịwa tị ya nyori kori ká ọngịnyị nyị́ tịtọ nyị ka haa myị́.

Anjwo, anụ maga kanụ jẹ́ ang odudu ká iJihova ya nyori ịngịhyẹ lee ọkịla nyị há lee nyori nyị tịpyọ. Ọọwa lẹ, anụ ka jẹ́-ẹ ya ang odudu kanụ pwa la ọ-họ ẹla ọtịpyọ lẹlẹ (Yẹ ọgba 9) *

9. Apyobwuna oyina à tịị ji kori ká anjwo á ba ẹla ọlẹ kị jẹ́ bwu ịBayịbụụ jẹ?

9 Ọ ka lujwo nyịlẹhị-ịlẹhị ha Angịnyị nya ịKịrayịsị ịlẹ kị ri anjwo nyọka yẹ ẹga nya awụlẹ ọkaka jaabwọ kọ pwoku, chajị angịlẹ kị dagaga jwaa ọ-ọlụkụrwọ bala ube-ụpwụ ka maga nyọka gwaa gbaa-gbaa nyọka yẹ irya nyaa da. Ẹla ọlịnyị họ ta Aleksandar. Ọ yẹkẹẹ: “Ịyẹẹnọ ịhyẹ u-ube-ụpwụ maga nyọka tụm tutu kam ka  họ ụya balaa. Ị ya nyori ọlẹ káam nyị la oligu ọnyang ka wẹẹ, am nyị tịng tị kaa họ ụya bala alẹng pyii.” Kori ká ọmayẹ ọlịịwẹ á chịng ọgụ aalẹ, kpịtịya nyori ụka ká dayị giri-giri ba ẹla ọlẹ ká jẹ́ bwu ịBayịbụụ jẹ, a kaa chị ewu ke ihi bala ịnyịrọ ogogo nya ịlọng, á kaa la olo nya ọkịlẹtụ ka, igu nyang bala iJihova kaa wu yẹẹyẹẹ. Ụka ọnyị myị́ ọnyị ká tị jẹ́ wu ịlọng kpa hi ọmayẹ, ịnyịnyị ọ kaa chịng kpẹẹ gụ ene nyọka họ ang ọnyịịla lẹ. Kpịtịya ịnyịnyị nyori abwọlẹ ká odehe yẹ ẹga nya awụlẹ ọkaka ụ-ụgbẹyị ohideeji bwu ẹga nya Olegu Onyobyi. Lẹ ụka ká pwa la ọ-ka kụ irya lala alodehe aalẹ, à “kụrụ Ohe Onyobyi” lẹ.—1 ịJọn 2:14.

10. Ányị 1 ịJọn 1:9 a tị́ dahị ụbwọ nyọka gbịgba ha iJihova la ọkịlẹtụ ocheri-cheri?

10 Ahị myị nyori iJihova à la ọngịrị nyọka ya ang ọlẹ ko ri ọhọbịrị lẹ. Ahị tị kaa maga jaabwọ kahị ka họ ba myị́ nyọka họ ọhọbịrị ka. Ma ụka ká ọhọbịrị á gụụhị họ, ahị kaa ya abyị nyahị je iJihova ẹ-ẹpwụ nya abwọ ọrịrị. (Wa 1 ịJọn 1:9.) Ọ́ tị ri kahị họ ọhọbịrị ọtụka, ahị kaa tịtọ nya ụbwọ ọdada ka ẹga nya angịgbahị nya ọjịra-jịra ịlẹ ká iJihova chụ nyọka kpẹhị rịrịịhị. (Jem. 5:14-16) Ma, áhị tị ka ya iwe da ká olujwo nya ẹla ọlẹ kọ gụụhị họ lụka ọkẹkpẹ ka yehi la ka. Ịyẹ tị́ du kahị ka họ ịnyị ka? Chajị Adahị ọ-la ọháha hu Ọnyị nyamwụ kiliya chajị kahị ka ye ọ-hịnyọhi nya ọhọbịrị nyahị. Ụka ká iJihova á ya ọwa nyị hịnyọhi ha ọngịnyị ọlẹ kọ yẹ irya da lẹ, ọ ya ịnyị kẹpwụ-kẹpwụ lẹ. Lẹ ịngịngịhyẹ á ji nyọka wuhị kpa la ọ-ka gbịgba ha iJihova la ọkịlẹtụ ocheri-cheri ka lẹ ka.—1 Jọn. 2:1, 2, 12; 3:19, 20.

11. Ányị ahị tị́ ka bwu gbe ịlọhị hi ẹla ọmẹjẹ ịlẹ kị ka kpa ọmyịmyị nyahị weji?

11 Ahị ka pwa ẹla ọmẹjẹ nya angị ji ẹkpẹ da ogu nya iJihova. Mwiiji nyọlẹ ká ọjịra-jịra nya Angịnyị nya ịKịrayịsị dọmwụ, Olegu Onyobyi kaa maga nyọka họ ká ọmyịmyị nya angịnyị nya Ohe Oluhye ka la dẹwụ-dẹwụ. Chajị nyọọwa lẹ, ahị baba nyọka jẹ́ ọdatị nya ẹla nya ịlẹhị bala  ọnọọkịla. * Angịlẹ kahị wụ́ ẹjẹ ka me ịnịịkịla bahị bwu ẹpwụ nya intanẹtị chajị ká ọmyịmyị nyahị ẹ-ẹga nya iJihova bala ọháha ọlẹ kahị la ẹ-ẹga nya aanahị ka la dẹwụ-dẹwụ myị́. A myị ọnụ ju ịnịịkịla ịlịnyị ka, ẹga nya Olegu Onyobyi ị bwu lẹ!—1 Jọn. 4:1, 6; Ọwụ. 12:9.

12. Ịyẹ tị́ du kahị ka ju ọmyịmyị nyahị ọngịrị u-uhye nya ẹlịlẹhị ọlẹ kahị jẹ́?

12 Kori kahị ka jẹ́-ẹ kụrụ Olegu Onyobyi ẹ-ẹpwụ nya uya ọlẹ kọ wẹẹ ma ta ọmyịmyị nyahị aalẹ, ahị baba nyọka dahịhile iJisọsị yẹẹyẹẹ bala abwọlẹ ká iJihova wẹẹ kpọọ họ irya nyamwụ jịra. Ahị baba nyọka dahịhile angịlẹ kem ká iJihova wẹẹ kpa kpẹhị rịrị ogu nyamwụ. (Mat. 24:45-47) Ahị ọdahile nyahị kaa la giri-giri gụ ọọwa bwula ịBayịbụụ ọjẹ́jẹ ụka myị ụka. Ọọwa lẹ ọmyịmyị nyahị à ka lala okoji ọlẹ ká atẹ nyamwụ rụ pyịị ka ẹpwụ nya ịpyị lẹlẹ. ỊPọlụ ya ẹla ụma ọlịwịịwẹ ụka ọlẹ kọ da ụpwụ du tọ ọjịra-jịra ọla iKolosi. Ọ yẹkẹẹ: “Jaabwọ kaanụ ayịdang ye ịKịrayịsị iJisọsị wẹ lala Ọngọlanụ la lẹlẹ, anụ́-ụ juwa la ọhịhị nya ịKịrayịsị ọọwa ayịdang mẹ. Kanụ cheri kanụ juwa ya, agba wu eji gogo ẹ-ẹpwụ nya ịKịrayịsị, kanụ juwa nwụ́ ọhịhị nyanụ wuu hụrụ ịKịrayịsị, kanụ juwa la giri-giri ẹ-ẹpwụ nya ọmyịmyị ọlala nyanụ wuu . . . mẹ.” (Kol. 2:6, 7) Kori kahị họ ụkụrwọ yẹẹyẹẹ nyọka ju ọmyịmyị nyahị ọngịrị, aalẹ Olegu Onyobyi bala alẹkpẹ nyamwụ á ka jẹ́-ẹ huhi abwọ la ọ-hịhị ba ẹlịlẹhị jẹ ẹnẹnẹhẹ kaka.—2 Jọn. 8, 9.

13. Ịyẹ ahị tị́ ka yẹhị rịrị gbe pyii? Ịyẹ tị́ du?

13 Ahị ka yẹhị rịrị nyori ahị ka wụ́ alodehe ẹjẹ pyii. (1 Jọn. 3:13) ỊJọn kpụhị ịtịya nyori “odehe lẹpwụ-lẹpwụ juwa e-ekpeleji nya ọngịrị nya Ohe Onyobyi.” (1 Jọn. 5:19) Jaabwọ ká odehe onyobyi ọlẹ wẹẹ jẹ tụ́ ju ocheju chwẹẹ gụ ọwọwa, ịnyị agbama nya Olegu Onyobyi à wẹẹ wuru pwuu gụ ọwọwa lẹ. (Ọwụ. 12:12) I-ijẹẹhị lala imyi nya ụya ọhọhọ bala ọnọọkịla nya angị ji ẹkpẹ da ogu nya iJihova, ọ kaa kpa kem ka. Ma, ọ kaa kpa ụgbẹyị ọnyọọngịrị ịnyịnyị lala ọtụpyịpyị. Olegu Onyobyi jẹ́ nyori ụka ọlẹ kọ la nyọka hu ụkụrwọ nya ẹrụ ọnyịịla ọ-kpa pyẹ nyahị abwọ bala ọ-ka ta ọmyịmyị nyahị ayịreji, nyị hi pyịnyẹng lẹ. Ọ́ lahị ẹbyẹbyị ka, ịnyị à du kị hu akụrwọ nyahị ịhyẹ abwọ lee ọ-dọmwụ hile akụrwọ nyahị wuu gbang-gbang ẹ-ẹpwụma lụmẹ-lụmẹ lẹ. Ọ lịnyị odu lẹ, aanahị ịlọpyị ịwẹ juwa bọhụ. Ị wẹẹ mẹjẹ nyori, ang myị́ ang ká Olegu Onyobyi á họhị, ahị ka jẹ́-ẹ la ọkụrụ-kụrụ!

ANỤ DA AWỤLẸ ỤBWỌ NYỌKA KỊNYAA Ẹ-ẸPWỤ NYA ẸLỊLẸHỊ

14. Ụgbẹyị oyina ahị tị́ ka jẹ́-ẹ da aanahị ụbwọ nyọka kịnyaa ẹ-ẹpwụ nya ẹlịlẹhị?

14 Kori kahị ka jẹ́-ẹ da aanahị ụbwọ nyọka kịnyaa ẹ-ẹpwụ nya ẹlịlẹhị aalẹ, ahị ka mẹ ahyẹẹrwẹrwa jẹ pyii. (1 Jọn. 3:10, 11, 16-18) Ahị ka há awụlẹ. Ọháha nyahị á tị ka ba ụ-ụka ká ang há kem ka, ma ọ ka pwụ ụka nya akama ịnyịnyị. Ọ-chụ pwokwita, à jẹ́ ọngọhẹ ọlẹ ká ọngịnyị nyamwụ gbu, kọ tị baba nya ẹjẹ ọkpụ́kpụ lee ụbwọ ọdada ụ-ụgbẹyị ọkịla? Lee à tị́ wo nyori ang abwọ nya aanahị nyị bịrị ụka nya ayịreji o-bwagaga, nyị tị baba nya ụbwọ ọdada nyọka nwụ́ Ube nya Ịpyị-Adịrahụ nyaa lee ẹpwa nyaa? O-obwula ẹla ọlẹ kahị kaa ya kem, ahị ka mẹjẹ jaabwọ ká ọháha bala ahyẹẹrwẹrwa nyahị ẹ-ẹga nya aanahị la ọngịrị kaka ba ka, ma ahị ka mọ́ọ jẹ bwula ẹla ọlẹ kahị kaa họ. Ọọwa à baba gụ wuu lẹ.

15. Jaabwọ ká ụpwụ nya 1 ịJọn 4:7, 8 mẹjẹ, ẹlịyẹ ahị tị́ baba nyọka họ?

15 Ahị ka ba ọgụ-ẹpẹtẹ nya Adahị olepwoohe jẹ kori kahị mẹ ọháha jẹ ẹ-ẹga nya awụlẹ. (Wa 1 ịJọn 4:7, 8.) Ụgbẹyị ọkpọnchị ọlẹ kahị ka jẹ́-ẹ mẹ ọháha jẹ ri ọ-ka hịnyọhi ha awụlẹ. Ọ-chụ pwokwita, ọhẹka ọngọhẹ họ ẹla wụ́ụhị ẹjẹ, ọ tị yụbwọ beji. Ahị ka mẹ ọháha jẹ bwula ọ-hịnyọhi họọ bala o-deeri hi ẹla ọlẹ kọ họ wụ́ụhị  ẹjẹ. (Kol. 3:13) Ọọnahị ọhẹ ọlẹ ká ẹnyị nyamwụ ri Aldo wụ́ ẹjẹ ta ọọnahị ọkịla ọlẹ kọ kaa ju ihi yẹẹyẹẹ ụka ká ọọnahị ọọwa ya ẹla ọtịpyọ u-uhye nya angịnyị ịla ẹga ọlẹ kọ bwu. Aldo yẹkẹẹ: “M̀ kaa raabwọ ụka myị́ ụka ha iJihova kọ ka dam ụbwọ chajị kam ka la irya ọtịpyọ u-uhye nya ọọnahị ọwẹ ka.” Aldo tị họ ẹla ọkịla. O byi ọọnahị ọwẹ nyị bajẹ bala ọwa kaka ya ẹrụ ọnyịila. Nyọlẹ kị wẹẹ ya ẹrụ ọnyịịla lawụlẹ, Aldo ya joo jaabwọ ká ẹla ọlẹ ko ya wọ́ọ ẹjẹ kaka ba. Aldo yẹkẹẹ: “Ụka ká ọọnahị ọwẹ wo jaabwọ ká ẹla ọlẹ ko ya jụm kaka ba, ọ yụbwọ beji. Bwula ọkọ ọlẹ kọ kpa ya ẹla kem, m̀ jẹ́ nyori ọ chị ijẹma u-uhye nya ẹla ọlẹ ko ya. Nyọlẹ kahị ya ẹla ọọwa kpá, ahị ri aligu nya awụlẹ myịmyị.”

16-17. Ẹlịyẹ ahị tị́ ka cheje nyọka họ?

16 Ọlẹrụ ịJọn la ọháha ẹ-ẹga nya aanamwụ yẹẹyẹẹ, ọ tị tịtọ kị ka la ọmyịmyị ọnyọọngịrị. Ọháha bala irya ọnyịịla ọlẹ kọ la ẹ-ẹga nyaa chehe gede-gede ẹ-ẹpwụ nya ọhụ ojuju ọlẹpwụ nya ileta ịta nyamwụ. Ọ há lụmẹ nyọka jẹ́ nyori alẹng bala anyang ịlẹ ká Ohe Oluhye ya ida wụ́ nyọka kpeji bala ịKịrayịsị e-epwoohe ri angịlẹ kị la ọháha bala ọ-kaa kpahị jụ angịnyị lala ịJọn!—1 Jọn. 2:27.

17 Ahị kpa ẹla ọmẹjẹ ịlẹ kahị kụ ẹhị yẹ-ẹ̀ wẹ wuu ọ-ọkịlẹtụ, kahị cheje nyọka hịhị ba ẹlịlẹhị jẹ bwula o-ju iJihova ihi ẹ-ẹpwụ nya ang myị́ ang wuu ọ-ọhịhị nyahị mẹ. Jẹ́ Omyi Ẹla nyamwụ bala ọ-dahịhiloo. Họ ká ọmyịmyị nyang ẹ-ẹga nya iJisọsị a la ọngịrị. Pwa ju ẹla ọjẹ́jẹ nya angịnyị ehe bala ọmẹjẹ nya angị ji ẹkpẹ da ogu nya iJihova. A la ọhịhị nya ọlahị imiiye lee o-ke ụrụ wo ẹla nya angịlẹ kị tịtọ nyọka gbileng ju ka ẹpwụ nya ọhọbịrị ọhọhọ ka. Hịhị ba ehile nya iJihova jẹ. Ahị da aanahị ụbwọ nyọka godayị giri-giri ịnyịnyị bwula o-hịnyọhi ha angịlẹ kị họ ẹla wụ́ụhị ẹjẹ bala ọ-da angịlẹ kị la ọbaba ụbwọ. Kori kahị họ ịnyị aalẹ, jaabwọ myị́ abwọ kọ la ọngịrị hahị kaka ba, ahị ka kịnyaa la ọ-hịhị ba ẹlịlẹhị jẹ.

EJE 49 Making Jehovah’s Heart Glad

^ par. 5 Ahị jam odehe ọlẹ kọ ji ẹpwụtụbwọ nya Olegu ­Onyobyi, ko ri adịda nya ọnọọkịla. Lẹ, ọ ka lujwo hahị nyịlẹhị-ịlẹhị nyọka hịhị ba ẹlịlẹhị jẹ. Angịnyị nya ịKịrayịsị ịlụka nya ọgbanyẹ la akama ọwẹ-ọwẹ ịnyịnyị. Chajị nyọka daa ịwa bala ahị ụbwọ, iJihova kpa ọlẹrụ ịJọn da ileta ịta. Ẹla ịlẹpwụ nya ileta ịwẹ ka dahị ụbwọ nyọka jẹ́ ang ịlẹ kị ka wuhi kpa myị́ la ọhịhị ba ẹlịlẹhị jẹ bala abwọlẹ kahị ka bwu kụrwaa.

^ par. 6 Ị yẹ ẹnyị ịhyẹ da lẹ.

^ par. 11 Yẹ ang ọjẹ́jẹ ọlẹ ko ri, “Do You Have the Facts?” ẹ-ẹpwụ nya Ẹpwang ọ-kụ Gbeji nya Ọya Ọhaneku nya ẹka 2018.

^ par. 59 ABWỌ ỌCHỊCHỊ NYA IFOTO: Ụka ká ọọnahị ọnyang ọhẹ juwa u-ube-ụpwụ, ọ kaa wo ẹla bala ọ-yẹ ang ịlẹ kị kaa họ du kọ lala o-ri alẹng-alẹng lee anyang-anyang ọ-ka ẹga nya awụlẹ nyị ri ang ọnyịịla. (Ẹ-ẹga ịhyẹ, ịna nya ọwọ kaa ku ọmwakpa nya alẹng-alẹng lee anyang-anyang ọ-ka ẹga nya awụlẹ.) Ụka ọkịla, ọ jẹ́ ang chajị nyọka ju ọmyịmyị nyamwụ ọngịrị u-uhye nya ang ọlẹ kọ jẹ́ nyị ri ịnyịlẹhị. Ọọwa dọọ ụbwọ nyọka dayị kpọọ ụka nya ọmayẹ olujwo ọhẹ.