Kpehe ka ala ịlẹpwụ

Kpehe ka ẹga kị da egbeju nya ala ju

 EGBEJU 9

Ányị Ugbiyegu Nyang À Tị́ ka Bwu Chị Ọkẹkẹnị?

Ányị Ugbiyegu Nyang À Tị́ ka Bwu Chị Ọkẹkẹnị?

1. Ịyẹ tị́ du ká ọ-ba ehile nya awụlẹ oyeye jẹ baba nya ugbiyegu ọ-ka chị ọkẹnẹnị?

Oja ọnyịịla bwu ẹga nya iJihova, Ohe nya ọkẹkẹnị, ọlẹ kọ́ tịtọ ká ugbiyegu ka chị ọkẹkẹnị. (1 ITimoti 1:11, NW ) Ọwa à ri ọmwụ ọdada nya awụlẹ oyeye lẹ. Ọ-ba ehile nya awụlẹ oyeye jẹ baba yẹẹyẹẹ chajị ọ ka du ká adịda, ịnịna, bala anyị ka chị ọkẹkẹnị bala ọ-la ọháha ha awụlẹ. Lẹ, angịnyị nya ịKịrayịsị ka ju ihi nya ehile ịloye nyaa u-uhye nyọka yụbwọ ju ụpwụ ẹ-ẹpwụ chajị nya awụlẹ oyeye.—Wa ILuku 2:1, 4, 5

Ịyẹ à tị́ ri irya nya Ohe Oluhye u-uhye nya awụlẹ oyeye? Ọ tịtọ ká ahụ bala ọrụ ka juwa lawụlẹ gbe oyi myị́ oyi. IJihova á tịtọ ká ahụ bala ọrụ ka họ ụya ka. Ọ tịtọ kị ka ri nya awụlẹ kem. (Ala iHiburu 13:4) Awụlẹ ọpwapwa wọọ ẹjẹ. (ỊMalakayị 2:16) Ma, ọ tị ya ẹga da ká ahụ bala ọrụ ka pwa awụlẹ bala o-ye ahụ lee ọ-rwọ ọrụ ọkịla kori ká ọngọhẹ nyaa á họ ụya.—Wa ỊMatiyu 19:3-6, 9.

2. Ányị ahụ bala ọrụ à tị́ ka kpa awụlẹ?

IJihova họ alẹng bala anyang chajị kị́ ka da awụlẹ ụbwọ ẹ-ẹpwụ nya awụlẹ oyeye. (Ọmwụ Ọdada 2:18) Ọrụ à ri olegbeju nya ugbiyegu lẹ. Chajị nya ọọwa lẹ, ọwa à ka kụ ịlahị nyọka ya ang nya ugbinyịrọ ha ugbiyegu nyamwụ bala ọ-mẹ ẹla nya Ohe Oluhye jaa lẹ. Ọ chịla kọ́ ka la ọháha o-gbu enyi-ka ẹ-ẹga nya ahụ nyamwụ. Ahụ bala ọrụ chịla kị́ ka la ọháha ha awụlẹ bala ọ-ju awụlẹ ihi. Ahụ bala ọrụ ọhẹ-lọhẹ á la kpẹẹkpẹẹ ka, lẹ ọ-hịnyọhi baba lụmẹ chajị ọ ka kpa ọkẹkẹnị wẹ ẹpwụ nya awụlẹ oyeye nyaa.—Wa Ala Efesọsị 4:31, 32; 5:22-25, 33; 1 IPita 3:7.

3. Ahụ bala ọrụ ka pwa awụlẹ kori kị́ ye ọkẹkẹnị ẹ-ẹpwụ nya awụlẹ oyeye nyaa ka?

Kori ká o-wo lawụlẹ-ka á juwa ẹ-ẹpwụ nya awụlẹ oyeye nyanụ, ọ baba káanụ angị imimiiye ka maga nyọka kpa awụlẹ  la ọháha. (1 Ala ịKọrịntị 13:4, 5) Ụpwụ Ịgọgọ á myị ọnụ ju ebwo ọchịchị hi awụlẹ nya ụgbẹyị ọlẹ kị́ ka kpa myị o-wo lawụlẹ-ka ọlẹpwụ nya ugbiyegu ka.—Wa ỊMakị 10:9.

4. Anyị anjwo, ịyẹ Ohe Oluhye à tị́ tịtọ hanụ?

IJihova tịtọ á ka chị ọkẹkẹnị. Ọ jung irya jaabwọ á ka bwu ye ọkẹkẹnị ụka nya ụjụ nyang. Ọ tịtọ á ka ye apyobwuna bwu ẹla ọjẹ́jẹ bala ẹla ọ-jẹ́ ju ẹjẹẹ nya adang bala ịnang. (Ala iKọlosi 3:20) IJihova tịtọ á ka ye ọkẹkẹnị bwula ọ-họ irya nyamwụ bala ọnyị nyamwụ ịnyịnyị.—Wa Ọngọlirya 11:9–12:1; ỊMatiyu 19:13-15; 21:15, 16.

5. Adịda bala ịnịna, ányị anyị nyanụ à tị́ ka bwu ye ọkẹkẹnị?

Maga yẹẹyẹẹ ká anyị nyang ka ye ang oriri, ẹpwa, bala ang ọkwụrụ-kwụrụ. (1 ITimoti 5:8) Ma, kori ká tịtọ ká ányị nyang ka ye ọkẹkẹnị aalẹ, ọ baba ká ka mẹ ẹla jaa chajị kị́ ka la ọháha ha Ohe Oluhye bala ọ-jẹ́ ang bwu ẹga nyamwụ. (Ala Efesọsị 6:4) Ọgụ-ẹpẹtẹ ọnyịịla nyang ẹ-ẹga nya ọháha ọlala ha Ohe Oluhye ka gu anyị nyang gbịla kaka gbịlang ịnyịnyị. Kori ká kpa Ụpwụ Ịgọgọ mẹ ẹla jaa, ẹla ọọwa ka nwụ irya nya anyị nyang rịrị ụ-ụgbẹyị ọlẹ kọ pwọku—Wa Ehile Ọmada 6:4-7; Etu 22:6.

Anyị anjwo kaa ye apyobwuna kori ká jwaa ọhụ bala ọ-daa ọlẹẹkwa. Ị tị baba nya alibyi bala ọ-nwụ rịrị ịnyịnyị. Ẹla ọmẹjẹ olịnyị ka chewu kaa bwu abwẹla ọlẹ kọ́ ka dudu kị́ ka ye ọkẹkẹnị ka. (Etu 22:15) Ma, á ka kpa ụbwọ ọnyọọngịrị lee ịnya ịmajẹ yalibyi ọlịnyị ka.—Wa Ala iKọlosi 3:21.

Alibeenu nya IJihova họ apwụ lụmẹ-lụmẹ nyọka da adịda, ịnịna, bala anjwo ụbwọ. Ẹla ịla apwụ ịịwa wuu bwu ịBayịbụụ.—Wa Eje Ọnyịịla 19:7, 11.