Kpehe ka ala ịlẹpwụ

Kpehe ka ẹga kị da egbeju nya ala ju

 ANG ỌJẸ́JẸ 2

Kpa Abwụma nya Ẹla o-Ya Lawụlẹ

Kpa Abwụma nya Ẹla o-Ya Lawụlẹ

2 Ala ịKọrịntị 2:17

ẸLA ỌLẸ KÁ KA HỌ: Ya ẹla gbagbịla bwu ọkịlẹtụ nyang, ụ-ụgbẹyị ọlẹ kọ́ ka mẹ irya nyang jẹ u-uhye nya ẹla ọlẹ ka wẹẹ ya, bala angịlẹ ká wẹẹ ya ẹla ju.

JAABWỌ KÁ KA BWU HỌ ỊNYỊ:

  • Nwụlanọ yẹẹyẹẹ bala ọ-raabwọ. Raabwọ bịlẹ ụbwọ ọdada chajị ká irya nyang wuu ka juwa ẹ-ẹga nya ẹla ọlẹ ká wẹẹ ka ya, ọkọkọ nyọka juwa ẹ-ẹga nyịlọng. Jẹ́ ahị nya ẹla ịlẹ ká wẹẹ ka mẹjẹ yẹẹyẹẹ, ká da ẹla wụlẹ la omyi ẹla nyịlọng, ọkọkọ nyọka juwa wa ẹla ọlẹ kị́ da ẹ-ẹpwụ nya ụpwụ kpụrụrụ.

  • Ya ẹla bwu ọkịlẹtụ nyang. Kụ irya nya ang odudu ọlẹ ká angịịwa baba nyọka wo ẹla ọwẹ, ká ya irya nyang nọ ẹ-ẹga nyaa ịnyịnyị. Kori ká họ ịnyị, ụgbẹyị ọlẹ á ka bwu godayị, jaabwọ á ka bwu dụbwọ bala ẹla ọlẹhị nyang ka mẹjẹ nyori ẹla ọwẹ bwu ọkịlẹtụ nyang. Ọ ka myịmyị la jaabwọ ká angịnyị kaa joja lawụlẹ.

  • Chẹhị yẹ angịlẹ ká wẹẹ ya ẹla ju. Yẹ angịlẹ ká wẹẹ ya ẹla ju ẹ-ẹhị ụka myị́ ụka, kori kọ́ tịpyọ nyọka họ ịnyị o-oye nyang ka. Ịnyịnyị, ụka ká juwa ya ẹla bwu ịlahị, chẹhị yẹ ọngọ ookpokpo-ookpokpo, ọkọkọ nyọka mwụrụ yẹ angịlẹ kị́ juwa wuu ụka ookpokpo.