Alibeenu nya IJihova La ỊBayịbụụ Nyịlaa?
Alibeenu nya iJihova kpa ọyẹda nya ịBayịbụụ ịdatị-datị jẹ́ Omyi Ẹla nya Ohe lẹ. Ma i-ìja ịlẹ kị la New World Translation of the Holy Scriptures, ọwa à kaa háa gụ la ọwawa lẹ, chajị ọ wụrụ ẹnyị nya Ohe, ọ la kpẹẹkpẹẹ, bala ọ-la gbagbịla.
Ẹnyị nya Ohe ọwụrụ-wụrụ. Angịhyẹ nya angị yẹ ịBayịbụụ da ka òja ịkịla á ya ihi ha Ọngọlala ka. Ọ-chụ pwokwita, ọyẹda nya ịBayịbụụ ọhẹ gu ẹnyị nya angịnyị lala 70 ịlẹ kị dụbwọ ụ-ụgbẹyị ọhẹ lee ọkịla nyọka họọ, ma ịBayịbụụ ọwọwa pẹhi ẹnyị nya Ọngọ lọọ la, ko ri iJihova, beji gbang-gbang!
New World Translation tị datị. Ọ tịrị ẹnyị nya Ohe ẹkpẹ ka ẹga ụnọ ịmanyị tị́ ịlẹ kọ chịla nyọka ji. Angịlẹ kị yọọ da á tị myị wụrụ ẹnyị nyịlaa ka.
Ọkpẹẹkpẹẹ. Ọ-ọyẹda ọnyị myị́ ọnyị à ya ẹla ọlẹpwụ nya ịBayịbụụ kpẹẹkpẹẹ ka. Jaabwọ wẹẹ, ịBayịbụụ ọhẹ da ẹla ọlẹpwụ nya ịMatiyu 7:13 ị-ịlẹ: “Anụ bwu ọnụ ụgbẹyị okpiilee mẹ, chajị ụgbẹyị nya obwila la pwọọ bala ọchịkpẹẹ la obwubwu.” Ma, “ayịreji” à juwa ụ-ụpwụ ịgọgọ ịlẹ kị da nya ọgbanyẹ lẹ, ‘o-obwila’ ka. Ọhẹka angị yọọ da ya “obwila” juwa chajị nyọlẹ kị myi nyori angị inyibyi nyị ka yẹ akama o-obwila gboyi myị́ oyi ịnyị. Ma ịBayịbụụ á myị ju ẹlẹwẹ ka. Ịnyị à du ká New World Translation da ẹla ọlẹ ụ-ụwa lẹ: “Anụ-ụ́ bwu ukpileku okpiilee mẹ. Chajị ukpileku ọ-pwọọ bala ụgbẹyị o-ju ẹpwụ gbam-gbam kaa kpa ọngịnyị ju ka ẹpwụ nya ayịreji ọtata.”
Ọgbagbịla. Ọyẹda nya ịBayịbụụ ọnyịịla á chịla nyọka la kpẹẹkpẹẹ kem ka, ma ọ chịla kọ ka la gbagbịla bala ọ-chịkpẹẹ nya angịnyị ọ-ka wo etu nya ẹla ọlụwa. Kụ ẹhị yẹ o-chu pwokwita lẹẹ wẹẹ. Ụ-ụpwụ nya Ala iRom 12:11, ọlẹrụ ịPọlụ ya ẹla ọhẹ, kori ká yọọ da kpụrụrụ etu nyamwụ ka ri “olegu ọwụ́wụ.” Chajị nyọlẹ ká omyi ẹla ọwẹ tị la etu ọlam la ubekee ka lẹ, New World Translation yoo ụ-ụgbẹyị ọlẹ kọ ka chịkpẹẹ la owowo. Ọ ya nyori Angịnyị nya ịKịrayịsị nyị ka “la ila ọchịchị bwula olegu ịgọgọ.”
Datị hi ẹnyị nya Ohe Oluhye ọwụrụ-wụrụ, ẹla ọ-yẹda kpẹẹkpẹẹ bala ọgbgbịla, New World Translation la ịngịhyẹ ọkịla ọlẹ kọ du kọ datị: Ị́ kaa ya ra ka. Chajị nya ọọwa, uku ịmanyị tị́ nya angịnyị jẹ́ kaa wa ịBayịbụụ la òja nyịlaa, tụ́ angịlẹ kị dọmwụ ka jụ ịBayịbụụ ra ịnọ ka.