Kemgbe ụwa, ihe ọ bụla anyị kweere na-esi na Baịbụl. N’ihi ya, anyị na-agbanwe ihe anyị kweere ma anyị ghọtakwuo ihe Akwụkwọ Nsọ kwuru nke ọma. a

 Ihe a dabara n’ihe e kwuru na Baịbụl n’Ilu 4:18. Ebe ahụ sịrị: “Ụzọ ndị ezi omume yiri ìhè na-enwu mgbe chi bọrọ, nke na-enwusikwu ike ruo mgbe chi bọchara.” Otú ahụ ìhè anyanwụ si eme ka a na-ahụkwu ihe nke ọma mgbe anyanwụ na-awa, ka Chineke si eme ka a na-aghọtakwu eziokwu ndị dị n’Okwu ya nke ọma mgbe oge ya ruru. (1 Pita 1:10-12) Dị ka e buru n’amụma na Baịbụl, Jehova na-eme ka a na-aghọtakwu eziokwu ndị a n’ike n’ike “n’oge ọgwụgwụ.”—Daniel 12:4.

 Ihe ndị a a na-agbanwe n’ihe anyị kweere ekwesịghị iju anyị anya ma ọ bụ nyewe anyị nsogbu n’obi. Ndị fere Chineke n’oge ochie nwekwara oge ndị ha na-aghọtachaghị ihe ụfọdụ nke ọma, ya adịkwa mkpa ka ha gbanwetụ otú ha si ele ihe anya.

•   Mosis wepụtara onwe ya ka ọ napụta mba Izrel afọ iri anọ tupu oge Chineke chọrọ ka o mee otú ahụ eruo.—Ọrụ Ndịozi 7:23-25, 30, 35.

•   Ndịozi Jizọs aghọtachaghị amụma e buru banyere ọnwụ Mezaya na mbilite n’ọnwụ ya.—Aịzaya 53:8-12; Matiu 16:21-23.

•   Ụfọdụ n’ime ndị mbụ soro ụzọ Kraịst ghọtahiere oge “ụbọchị Jehova” ga-abịa.—2 Ndị Tesalonaịka 2:1, 2.

 Chineke mechara nyere ndị a niile aka ịghọta ihe ndị ha ghọtahiere. Ekpere anyị bụkwa ka Chineke nọgide na-emere anyị otu ihe ahụ.—Jems 1:5.