Gaa n'Isiokwu

Gaa n'ebe e dere isiokwu ndị dị na ya

Ajụjụ Ndị Na-agụ Akwụkwọ Anyị Na-ajụ

Ajụjụ Ndị Na-agụ Akwụkwọ Anyị Na-ajụ

 Ajụjụ Ndị Na-agụ Akwụkwọ Anyị Na-ajụ

Ọ̀ dị ihe a pụrụ ime ma ọ bụrụ na o kweghị Onye Kraịst e tere mmanụ nke ahụ́ na-adịkwaghị ike omume ịbịa ememe Nri Anyasị nke Onyenwe Anyị mgbe ọgbakọ na-eme ya?

Ee. Ọ dị ihe a pụrụ ma kwesị ime n’ihi ọnọdụ nke Onye Kraịst e tere mmanụ bụ́ onye ahụ́ na-adịkwaghị ike nke na-adịghị esi n’àkwà ebili ma eleghị anya, n’ihi ya kwa, ghara inwe ike ịnọ ya mgbe ọgbakọ na-eme Ememe Ncheta ọnwụ Kraịst. N’ọnọdụ dị otú ahụ, òtù ndị okenye pụrụ ime ndokwa ka otu okenye ma ọ bụ Onye Kraịst ọzọ tozuru okè bụ́ nwoke wegara onye ahụ kwere ekwe achịcha na mmanya ahụ bụ́ ihe nnọchianya n’otu anyasị ahụ tupu anyanwụ awaa.

Na-adabere n’otú ihe si dị, onye okenye ma ọ bụ nwanna nwoke ọzọ ahụ gara leta ya pụrụ ikwu okwu dị mkpirikpi ma gụọ akụkụ Akwụkwọ Nsọ kwesịrị ekwesị. Ọ pụrụ ịgbaso ụkpụrụ Jizọs tụpụtara mgbe O guzobere Nri Anyasị nke Onyenwe Anyị. Dị ka ihe atụ, ọ pụrụ ịgụ Matiu 26:26 ma nye ya achịcha ahụ na-ekoghị eko mgbe e kpesịrị ekpere. Nke ahụ gasịa, nwanna nwoke ahụ letara ya pụrụ ịgụ Matiu isi 26, amaokwu 27 na 28, ma bunye ya mmanya ahụ mgbe e kpesịkwara ekpere ọzọ. Ọ pụrụ ikwu okwu dị mkpirikpi banyere ihe ihe nnọchianya nke ọ bụla pụtara, ọ ga-ekwesịkwa ekwesị ikpe ekpere mmechi.

N’ezie, e kwesịrị ime mgbalị nile ezi uche dị na ya iji nọrọ ya mgbe ọgbakọ na-eme ememe Nri Anyasị nke Onyenwe Anyị. Ma gịnị ka a pụrụ ime n’ọnọdụ dị oké njọ nke metụtara Onye Kraịst e tere mmanụ bụ́ onye na-arịasi ọrịa ike, nke nọ n’ụlọ ọgwụ, ma ọ bụkwanụ, n’ihi ihe ọ bụla ọzọ, bụrụ onye e gbochiri iso mee Ememe Ncheta ahụ mgbe anyanwụ dasịrị na Naịsan 14? Onye dị otú ahụ e tere mmanụ pụrụ ịgbaso ụkpụrụ a gbasoro n’Iwu Mozis ma mee ememe ncheta ahụ nanị ya ụbọchị 30 mgbe e mesịrị.—Ọnụ Ọgụgụ 9:9-14.