Gaa n'Isiokwu

Gaa n'ebe e dere isiokwu ndị dị na ya

Ị̀ Na-echeta?

Ị̀ Na-echeta?

 Ị̀ Na-echeta?

Ọ̀ masịwo gị ịgụ mbipụta Ụlọ Nche ndị ọhụrụ? Ọ dị mma, lee ma ị pụrụ ịza ajụjụ ndị na-esonụ:

Gịnị mere ka ọ dị mfe ịnakwere Krismas na Korea?

E nwere otu nkwenkwe ochie na Korea nakwa n’ụfọdụ ala ndị ọzọ banyere chi kichin bụ́ onye e chere na ọ na-esi na mpio anwụrụ ọkụ abịa ma na-eweta onyinye na December. Ọzọkwa, mgbe Agha Ụwa nke Abụọ gasịrị, ndị agha United States kesara onyinye na ihe enyemaka na chọọchị ndị dị n’ógbè dị iche iche.—12/15, peji nke 4, 5.

Ná mmezu nke Aịsaịa 21:8, “onye nche” dị aṅaa ka Chineke nweworo n’oge anyị?

Ndị Kraịst e ji mmụọ nsọ tee mmanụ, bụ́ ndị na-eje ozi dị ka òtù onye nche, emewo ka ndị mmadụ mara ihe ihe ndị na-eme n’ụwa bụ́ ndị na-emezu amụma Bible, pụtara. Ha enyewokwara ndị na-amụ Bible aka ịmata na izere ozizi na omume ndị Akwụkwọ Nsọ na-akwadoghị.—1/1, peji nke 8, 9.

Olee Ndị Bụ́ “Ndị Okpukpe Polish Brethren”?

Ha bụ otu obere òtù okpukpe dị na Poland na narị afọ nke 16 na17 bụ́ ndị gbara ume ka a na-agbaso Bible, ya mere, ha jụkwara nkwenkwe ndị a ma ama na chọọchị, dị ka Atọ n’Ime Otu, ime ụmụaka baptism, na ọkụ ala mmụọ. Ka oge na-aga, a kpagburu ha n’ụzọ kpụ ọkụ n’ọnụ ma manye ha ịgbasa n’ala ndị ọzọ.—1/1, peji nke 21-23.

N’ihi gịnị ka a ga-eji atụkwasị obi n’amụma Bible kama ịbụ n’amụma ndị ọkà mmụta banyere ọdịnihu ma ọ bụ ndị na-agụ kpakpando buru?

Mmadụ ndị na-azọrọ na ha bụ ndị amụma bụ ndị a na-apụghị ịtụkwasị obi n’ihi na ha na-eleghara Jehova na Bible anya. Ọ bụ nanị amụma Bible pụrụ inyere gị aka ịmara otú ihe omume si kwekọọ ná nzube Chineke, na-abara gị na ezinụlọ gị uru n’ụzọ na-adịgide adịgide.—1/15, peji nke 3.

Olee ihe àmà ụfọdụ na-egosi na anyị na-ebi na mgbe ikpeazụ?

Anyị pụrụ ịhụ mmetụta nke nchụpụ a chụpụrụ Setan n’eluigwe. (Mkpughe 12:9) Anyị na-ebi n’oge nke “eze” nke ikpeazụ ahụ a kpọtụrụ aha ná Mkpughe 17:9–11. Ọnụ ọgụgụ nke ezigbo ndị Kraịst e tere mmanụ na-ebelata ebelata, ma o yiri ka ụfọdụ n’ime ha hà ka ga-anọ n’ụwa mgbe mkpagbu ukwu ahụ ga-amalite.—1/15, peji nke 12, 13.

Olee mgbe e dere akwụkwọ Habakuk, n’ihi gịnịkwa ka anyị kwesịrị iji nwee mmasị na ya?

E dere akwụkwọ Bible a n’ihe dị ka 628 T.O.A. O bu ikpe Jehova megide Juda oge ochie nakwa megide Babilọn. Ọ na-ekwukwa banyere ikpe Chineke nke ga-abịakwasị ajọ usoro ihe dị ugbu a n’isi nso.—2/1, peji nke 8.

Ebee n’ime Bible ka anyị pụrụ ịchọta ndụmọdụ amamihe nke otu nne nyere ụmụ nwanyị na-ejide onwe ha nke ọma?

Isiakwụkwọ ikpeazụ nke akwụkwọ Ilu, bụ́ isi nke 31, bụ ebe magburu onwe ya a na-achọta ndụmọdụ dị otú ahụ.—2/1, peji nke 30, 31.

N’ihi gịnị ka anyị pụrụ iji na-enwe ekele na Jehova ekpugheworo anyị “uche nke Kraịst”? (1 Ndị Kọrint 2:16)

Site n’ihe ndekọ Oziọma ahụ, Jehova emewo ka anyị nwee ike ịmụta banyere echiche, mmetụta, ihe omume nke Jisọs, nakwa ihe ndị o butere ụzọ. Nke a pụrụ inyere anyị aka ịdị ka Jisọs, karịsịa ná mgbalị anyị na-etinye n’ọrụ nkwusa ahụ na-azọpụta ndụ.—2/15, peji nke 25.

Chineke ọ̀ na-aza ekpere taa?

Ee. Ọ bụ ezie na Bible na-egosi na Chineke adịghị aza ekpere nile, ahụmahụ ndị e nwere n’oge a na-egosi na mgbe mgbe, ọ zawo ekpere nke ndị kpekuuru ya ekpere maka nkasi obi na enyemaka n’okwu ndị dị ka idozi nsogbu alụmdi na nwunye.—3/1, peji nke 3-7.

Gịnị ka anyị pụrụ ime iji nweta ike Chineke?

Anyị pụrụ ịrịọ maka ya n’ekpere, nweta ike ime mmụọ site na Bible, ma bụrụ ndị e wusiri ike site ná mkpakọrịta ndị Kraịst.—3/1, peji nke 15, 16.

Olee otú ndị nne na nna pụrụ isi nyere ụmụ ha aka iritekwu uru ná nzukọ ndị Kraịst?

Ha pụrụ inyere ụmụ ha aka ịmụrụ anya, ikekwe na-ekwe ka ha hie obere ụra tupu oge eruo. A pụrụ ịgba ụmụaka ume ‘idetu ihe,’ dị ka site n’ịkanye ihe n’akwụkwọ mgbe ọ bụla e ji okwu ma ọ bụ aha ha maara nke ọma mee ihe.—3/15, peji nke 17, 18.

Olee ihe ụfọdụ anyị pụrụ ịmụta site n’ihe nlereanya Job?

Job butere mmekọrịta ya na Chineke ụzọ, o mesoro ụmụ mmadụ ibe ya ihe n’ụzọ ziri ezi, ọ gbalịsiri ike iguzosi ike n’ihe nye nwunye ya, o gosipụtara nchegbu maka ọnọdụ ime mmụọ nke ezinụlọ ya, o jikwa ikwesị ntụkwasị obi tachie obi n’ule.—3/15, peji nke 25-27.

Bible ò nwere mkpụrụ akwụkwọ ndochianya zoro ezo nke na-eme ka a ghọta ozi ndị e ji mkpụrụ akwụkwọ ndochianya dee?

Ee e. A pụkwara ịzọrọ na e nwere mkpụrụ akwụkwọ ndị e weere na ha bụ mkpụrụ akwụkwọ ndochianya zoro ezo n’akwụkwọ ụfọdụ na-abụghị nke okpukpe. Ọdịiche dị n’otú e sigasị sụpee okwu n’ihe odide Hibru ga-eme ka ihe e weere na ha bụ mkpụrụ akwụkwọ ndochianya ndị dị na Bible bụrụ ihe na-enweghị ihe ha pụtara.—4/1, peji nke 30, 31.