Samuel nke Mbụ 28:1-25

  • Sọl gara na nke nwaanyị na-agba afa n’En-dọọ (1-25)

28  N’oge ahụ, ndị Filistia kpọkọtara ndị agha ha ka ha lụso ndị Izrel agha.+ Ekish wee sị Devid: “Ị manụ na gị na ụmụ nwoke ndị so gị ga-eso m gaa agha.”+  Devid asị Ekish: “Ị ma nnọọ ihe ohu gị ga-eme.” Ekish asị Devid: “Ọ bụ ya mere m ga-eji họpụta gị ka ị na-eche m nche mgbe niile.”+  Samuel anwụọla. Izrel niile eruokwarala ya uju ma lie ya na Rema, bụ́ obodo ya.+ Sọl emeekwala ka a ghara inwe ndị na-agba afa na ndị na-akọ ihe ga-eme n’ọdịnihu n’Izrel.+  Ndị Filistia zukọtara maa ụlọikwuu ha na Shunem.+ Sọl kpọkọtakwara ndị Izrel niile, ha amaa ụlọikwuu nke ha na Gilboa.+  Mgbe Sọl hụrụ ndị agha ndị Filistia, egwu jidere ya, obi ana-akụkwa ya kpum kpum.+  Sọl nọ na-ajụ Jehova ase,+ ma Jehova anaghị aza ya ihe ọ bụla. O sighị ná nrọ ma ọ bụ n’ọnụ ndị amụma ma ọ bụ jiri Yurim*+ zaa ya ihe ọ bụla.  N’ikpeazụ, Sọl sịrị ndị na-ejere ya ozi: “Chọọrọnụ m nwaanyị na-agba afa. + M ga-agakwuru ya jụọ ya ase.” Ndị na-ejere ya ozi asị ya: “E nwere nwaanyị na-agba afa n’En-dọọ.”+  Sọl wee jigharịa ejiji, yiri uwe ọzọ, ya na ndị ohu ya abụọ esoro gakwuru nwaanyị ahụ n’abalị. Sọl asị ya: “Biko, gbaara m afa, gwa m ihe ga-eme n’ọdịnihu,+ kpọpụtakwara m onye m ga-akpọrọ gị aha ya.”  Ma, nwaanyị ahụ sịrị ya: “Ị manụ ihe Sọl mere, otú o si mee ka a ghara inwe ndị na-agba afa na ndị na-akọ ihe ga-eme n’ọdịnihu n’ala a.+ Gịnịzi mere i ji na-anwa isiri m* ọnyà ka e gbuo m?”+ 10  Sọl wee ṅụọrọ ya iyi n’aha Jehova, sị: “Eji m Jehova, bụ́ Chineke dị ndụ, na-aṅụ iyi na i mee ihe a, a gaghị asị na i mere ihe ọjọọ.” 11  Nwaanyị ahụ asị: “Ònye ka m ga-akpọpụtara gị?” Ya asị: “Kpọpụtara m Samuel.” 12  Mgbe nwaanyị ahụ hụrụ “Samuel,”*+ o tiri ezigbo mkpu sị Sọl: “Gịnị mere i ji ghọgbuo m? Ị bụ Sọl!” 13  Eze asị ya: “Atụla egwu. Gịnị ka ị hụrụ?” Nwaanyị ahụ asị Sọl: “Ahụrụ m otu onye yiri chi ka o si n’ala na-apụta.” 14  Sọl ajụọ ya ozugbo ahụ, sị: “Olee otú ọ dị?” Ya asị: “Ọ bụ agadi nwoke na-apụta. O yikwa uwe elu na-enweghị aka.”+ Sọl wee mata na ọ bụ “Samuel,” hulata kpọọ isiala. 15  “Samuel” wee sị Sọl: “Gịnị mere i ji na-achọ m, na-enye m nsogbu?” Sọl asị: “Anọ m n’ezigbo nsogbu. Ndị Filistia na-alụso m agha. Chineke ahapụkwala m. Ọ naghịzi atụpụrụ m ọnụ. O sighị n’ọnụ ndị amụma ma ọ bụ ná nrọ gwa m ihe ọ bụla.+ Ọ bụ ya mere m ji na-akpọ gị ka ị gwa m ihe m ga-eme.”+ 16  “Samuel” wee sị: “Gịnịzi mere i ji na-achọ ịjụta m ihe, ebe ọ bụ na Jehova ahapụla gị,+ ị ghọọkwala onye iro ya? 17  Jehova ga-eme ihe o si n’ọnụ m kwuo. Jehova ga-anapụta gị alaeze Izrel nye ya Devid bụ́ nwoke ibe gị.+ 18  Ebe ọ bụ na i meghị ihe Jehova kwuru, i gbughịkwa ndị Amalek kpasuru ya ezigbo iwe,+ ọ bụ ya mere Jehova ji na-emeso gị otú a taa. 19  Jehova ga-enyefekwa gị na ndị Izrel n’aka ndị Filistia.+ Echi, gị+ na ụmụ gị ndị nwoke+ ga-abịakwutekwa m. Jehova ga-enyefekwa ndị agha Izrel n’aka ndị Filistia.”+ 20  Sọl wee daa n’ala ozugbo ahụ, ezigbo ụjọ ejidekwa ya n’ihi ihe ahụ “Samuel” kwuru. Ike gwụrukwara ya n’ọkpụkpụ, n’ihi na o righị nri n’ụbọchị ahụ niile nakwa n’abalị ahụ niile. 21  Mgbe nwaanyị ahụ bịakwutere Sọl, hụkwa na obi erutụghị ya ala, ọ sịrị ya: “Mụnwa bụ́ ohu gị emeela ihe i kwuru, mee ihe gaara ata isi m+ iji mee ihe ị gwara m. 22  Ugbu a, biko, gee ohu gị ntị. Ka m wetatụrụ gị achịcha ka ị taa, ka ị hụ ike ị ga-eji laa.” 23  Ma ọ jụrụ ajụ wee sị: “Agaghị m eri ihe.” Ma, ndị na-ejere ya ozi nakwa nwaanyị ahụ nọ na-arịọ ya. N’ikpeazụ, o gere ha ntị wee si n’ala bilie, nọdụ n’oche. 24  Nwaanyị ahụ gara ngwa ngwa gbuo nwa ehi gbara agba o nwere n’ụlọ ya, gwọọkwa ntụ ọka, were ya mee achịcha na-ekoghị eko. 25  Mgbe o mechara, o buteere ya Sọl na ndị na-ejere ya ozi, ha ataa. Mgbe ha tachara, ha ebilie lawa n’abalị ahụ.+

Ihe E Dere n'Ala Ala Peeji

Ma ọ bụ “mkpụrụ obi m.”
Ma ọ bụ “onye dị ka Samuel.”