Ndị Eze nke Mbụ 2:1-46

  • Devid gwara Solomọn ihe ndị ọ ga-eme (1-9)

  • Devid nwụrụ, Solomọn achịwazie (10-12)

  • Nkata Adọnaịja kpara tara isi ya (13-25)

  • A chụpụrụ Abayata, gbuo Joab (26-35)

  • E gburu Shimiaị (36-46)

2  Mgbe oge ọnwụ Devid ruwere, ọ gwara Solomọn nwa ya, sị:  “Oge ọnwụ m eruwela. N’ihi ya, dị ike,+ gosikwa na ị bụ dimkpa.+  Na-erubere Jehova bụ́ Chineke gị isi. Na-eso ụzọ ya. Na-eme ihe o kwuru. Na-edebe iwu ya. Na-eme ihe o kpebiri, na-esokwa ntụziaka ya, otú e dere ha n’Iwu Mosis.+ I mee ihe a niile, ihe ga na-agaziri gị* n’ihe ọ bụla ị na-eme nakwa n’ebe ọ bụla ị na-aga.  Ọ ga-emekwa ka Jehova mezuo nkwa o kwere m. Ọ sịrị: ‘Ọ bụrụ na ụmụ gị ejisie ike jiri obi ha niile na mkpụrụ obi* ha niile+ na-edebe iwu m, ọ dịghị mgbe a na-agaghị enwe onye si n’ezinụlọ gị ga-anọ n’ocheeze Izrel.’+  “Ị makwa nke ọma ihe Joab nwa Zeruya mere m, ya bụ, ihe o mere Abna+ nwa Nee na Amesa+ nwa Jita, mmadụ abụọ bụ́ ndị isi ndị agha Izrel. O gburu* ha+ n’oge udo dị, dị ka à ga-asị na a na-alụ agha. O tekwara ọbara agha n’ájị̀ o kere gburugburu úkwù ya nakwa n’akpụkpọ ụkwụ o yi n’ụkwụ.  Mee ihe gosiri na ị ma ihe. Ekwekwala ka ọ nwụọrọ onwe ya.*+  “Gosi ụmụ Bazilaị+ onye Gilied na ị hụrụ ha n’anya, ka ha sorokwa ná ndị na-eri ihe na tebụl gị, n’ihi na ha nyeere m aka+ mgbe m gbara ọsọ n’ihi Absalọm nwanne gị.+  “Shimiaị nwa Gira, onye ebo Benjamin nke si Bahurim, bi gị nso. Ọ bụ ya kpọrọ m iyi ma kparịa m ezigbo mkparị+ n’ụbọchị m na-aga Mahaneyim.+ Ma mgbe ọ bịara zute m n’Osimiri Jọdan, m ji aha Jehova ṅụọrọ ya iyi na m gaghị egbu ya.+  Ma ugbu a, ahapụla ịkwụ ya ụgwọ ihe o mere,+ n’ihi na ị bụ nwoke ma ihe. Ị makwa ihe i kwesịrị ime ya. N’agbanyeghị na o meela agadi, ekwekwala ka ọ nwụọrọ onwe ya.”*+ 10  Devid mechara nwụọ otú nna nna ya hà nwụrụ, e liekwa ya n’Obodo Devid.+ 11  Devid chịrị Izrel afọ iri anọ. Ọ chịrị afọ asaa na Hebrọn,+ chịakwa afọ iri atọ na atọ na Jeruselem.+ 12  Solomọn ghọziri eze, nọchie n’ocheeze Devid nna ya. Ọchịchị ya jikwa nwayọọ nwayọọ sie ezigbo ike.+ 13  Ka oge na-aga, Adọnaịja nwa Hagit gara na nke Bat-shiba, nne Solomọn, ya asị ya: “Nke a ị bịara, udo ọ̀ dịkwa?” Ya asị ya: “Udo dị.” 14  Adọnaịja sịkwara ya: “O nwere ihe m chọrọ ịgwa gị.” Ya asị ya: “Kwuwe.” 15  Adọnaịja asị: “O doro gị anya na ọ bụ m gaara abụ eze. Ndị Izrel niile nọkwa na-atụ anya na ọ bụ m ga-abụ eze.+ Ma, ọ dabara na ọ bụghị mụnwa mechara bụrụ eze, kama, ọ bụ nwanne m nwoke, n’ihi na ọ bụ ya ka Jehova chọrọ ka ọ bụrụ eze.+ 16  Ma ugbu a, e nwere otu ihe m chọrọ ịrịọ gị. Biko, meere m ya.” Bat-shiba asị ya: “Kwuwe.” 17  Ya asị ya: “Biko, gwa Eze Solomọn ka ọ kpọnye m Abishag+ nwaanyị Shunem ka m lụwa. Ama m na ọ gaghị ajụ ma ị gwa ya.” 18  Bat-shiba asị ya: “Nsogbu adịghị. M ga-agwa eze ihe i kwuru.” 19  Bat-shiba wee gakwuru Eze Solomọn ka ọ gwa ya ihe Adọnaịja kwuru. Ozugbo eze hụrụ ya, ọ gara nabata ya, kpọọrọ ya isiala, mechaakwa gaa nọrọ ọdụ n’ocheeze ya. O kwukwara ka e butere nne eze ocheeze, ka ọ nọrọ ọdụ n’aka nri ya. 20  Bat-shiba asị ya: “O nwere otu obere ihe m chọrọ ịrịọ gị. Biko, meere m ya.” Eze asị ya: “Nne m rịọwa. M ga-emere gị ya.” 21  Ya asị ya: “Biko, kpọrọ Abishag nwaanyị Shunem kpọnye Adọnaịja nwanne gị nwoke ka ọ lụwa.” 22  Eze Solomọn asị nne ya: “Gịnị mere i ji na-arịọ m ka m kpọrọ Abishag nwaanyị Shunem kpọnye Adọnaịja? Rịọkwuonụ m ka m hapụrụ ya ọchịchị+ maka na ọ bụ ya tọrọ m,+ nakwa maka na Abayata onye nchụàjà na Joab+ nwa Zeruya+ na-akwado ya.” 23  Eze Solomọn jizi aha Jehova ṅụọ iyi, sị: “Ka Chineke taa m ahụhụ, ka ọ tasiekwa m ahụhụ ike, ma ọ bụrụ na ihe a Adọnaịja rịọrọ ataghị isi ya. 24  Ugbu a, ọ bụ Jehova Chineke dị ndụ mere ka ọchịchị m sie ezigbo ike,+ mee ka m nọrọ n’ocheeze Devid nna m, rụọkwara m ụlọ*+ otú o kwere ná nkwa. Eji m Chineke a na-aṅụ iyi na Adọnaịja ga-anwụrịrị+ taa.” 25  Eze Solomọn ziri Benaya+ nwa Jehoyada ozi ozugbo, ya achọrọ Adọnaịja gawa ma gbuo ya. 26  Eze gwakwara Abayata+ onye nchụàjà, sị: “Lawa n’ala gị dị n’Anatọt.+ I kwesịrị ịnwụ. Ma agaghị m egbu gị taa, n’ihi na ị na-ebu Igbe Ọkaakaa Onyenwe anyị Jehova mgbe gị na Devid nna m nọ,+ i sokwa nna m taa ahụhụ niile ọ tara.”+ 27  Otú a ka Solomọn si kwụsị Abayata ịbụ onye nchụàjà Jehova, iji mezuo ihe Jehova kwuru na Shaịlo+ gbasara ezinụlọ Ịlaị.+ 28  Mgbe Joab nụrụ ihe a, ọ gbagara n’ụlọikwuu Jehova+ ma jidesie mpi dị n’ebe ịchụàjà aka ike. Ọ nọ na-akwado Adọnaịja,+ ma ọ kwadoghị Absalọm.+ 29  A gwara Eze Solomọn, sị: “Joab agbagala n’ụlọikwuu Jehova. Ọ nọkwa ebe ahụ n’akụkụ ebe ịchụàjà.” N’ihi ya, Solomọn gwara Benaya nwa Jehoyada, sị: “Gaa gbuo ya!” 30  Benaya gaziri n’ụlọikwuu Jehova sị Joab: “Eze sị gị si ebe a pụta.” Ma ọ sịrị: “Mba! M ga-anwụ ebe a.” Benaya wee gaa kọọrọ eze, sị: “Lekwa lekwa ihe Joab kwuru na ihe ọ zara m.” 31  Eze gwaziri ya, sị: “Mee otú ahụ o kwuru. Gaa gbuo ya, liekwa ya, ka ọbara ndị aka ha dị ọcha o gburu* ghara ịdị n’isi mụ na ezinụlọ nna m.+ 32  Jehova ga-emekwa ka ọbara ya dịrị ya n’isi, n’ihi na ọ gara jiri mma agha gbuo mmadụ abụọ ka ya mma, ndị na-emekwa ezi omume karịa ya. Ọ gwaghịkwa Devid nna m na ọ ga-egbu ha. O gburu Abna+ nwa Nee, onyeisi ndị agha Izrel,+ nakwa Amesa+ nwa Jita, onyeisi ndị agha Juda.+ 33  Ọbara ha ga-adị n’isi Joab nakwa n’isi ụmụ ya ruo mgbe ebighị ebi.+ Ma, Jehova ga-eme ka udo dịrị Devid, ụmụ ya, ezinụlọ ya, na alaeze* ya ruo mgbe ebighị ebi.” 34  Benaya nwa Jehoyada gaziri gbuo ya, e liekwa ya n’ụlọ ya dị n’ala ịkpa. 35  Eze mekwara Benaya+ nwa Jehoyada onyeisi ndị agha, ya anọchie Joab. O mekwara Zedọk+ onye nchụàjà, ya anọchie Abayata. 36  Eze kpọkwara Shimiaị,+ sị ya: “Rụọ ụlọ na Jeruselem ebe a, birikwa na ya. Esikwala na Jeruselem gaa ebe ọ bụla ọzọ. 37  Ụbọchị ọ bụla ị pụrụ, gafee Ndagwurugwu Kidrọn,+ mara na a ga-egbu gị. Ọbara gị ga-adịkwa gị n’isi.” 38  Shimiaị asị eze: “Ihe i kwuru dị mma. Ohu gị ga-eme nnọọ ihe onyenwe m eze kwuru.” Shimiaị wee biri na Jeruselem, bitee ya aka. 39  Ma mgbe afọ atọ gara, mmadụ abụọ bụ́ ndị ohu Shimiaị gbara ọsọ gbakwuru Ekish+ nwa Meaka bụ́ eze Gat. Mgbe ndị mmadụ bịara kọọrọ Shimiaị, sị: “Ndị ohu gị nọzi na Gat,” 40  ọ gara ozugbo dokwasị ihe o ji anọkwasị na jakị, gbara ya gaa Gat ka ọ hụ Ekish jụọ ya ase ndị ohu ya. Mgbe Shimiaị si Gat kpọlata ndị ohu ya, 41  a kọọrọ Solomọn, sị: “Shimiaị si Jeruselem pụọ gaa Gat. Ọ lọtakwala.” 42  Eze kpọziri Shimiaị ma sị ya: “Ọ̀ kwa m gwara gị ka i jiri aha Jehova ṅụọrọ m iyi, gị aṅụọkwara m iyi, mụ adọọkwa gị aka ná ntị, sị: ‘Ụbọchị ọ bụla i si ebe a pụọ gaa ebe ọzọ, mara na a ga-egbu gị’? Ọ̀ kwa ị sịrị m na ihe m kwuru dị gị mma nakwa na ị ga-eme ya?+ 43  Gịnịzi mere i ji ghara ime ihe i ji aha Jehova ṅụọ iyi na ị ga-eme, ma mee ihe m nyere gị iwu ka ị ghara ime?” 44  Eze gwaziri Shimiaị, sị: “Ị ma nnọọ ihe ọjọọ niile i mere Devid nna m.+ Jehova ga-emekwa ka i jiri isi gị buru ihe ọjọọ i mere.+ 45  Ma Jehova ga-agọzi Eze Solomọn,+ meekwa ka ocheeze Devid sie ezigbo ike ruo mgbe ebighị ebi.” 46  Eze gwaziri Benaya nwa Jehoyada ka ọ gaa gbuo Shimiaị, ya agaa gbuo ya.+ Otú a ka alaeze Solomọn si sie ezigbo ike.+

Ihe E Dere n'Ala Ala Peeji

Ma ọ bụ “ị ga na-akpa àgwà onye ma ihe.”
Na Hibru, “Ọ wụfuru ọbara.”
Na Hibru, “Ekwekwala ka isi awọ́ ya gbadaruo Shiol n’udo.” Gụọ Nkọwa Okwu, “Shiol.”
Na Hibru, “mee ka isi awọ́ ya buru ọbara gbadaa Shiol.” Gụọ Nkọwa Okwu, “Shiol.”
Ma ọ bụ “alaeze.”
Na Hibru, “ọ wụfuru.”
Na Hibru, “ocheeze.”