Job 3:1-26
3 Ọ bụ mgbe ihe a mechara ka Job kwuziri okwu ma bụọ ụbọchị a mụrụ ya ọnụ.*+
2 Job sịrị:
3 “M na-abụ ụbọchị a mụrụ m ọnụ,+Nakwa abalị ahụ mmadụ sịrị, ‘A dịla ime nwa nwoke.’
4 Ka ụbọchị ahụ gbaa ọchịchịrị.
Ka Chineke chefuo ya.
Ka ìhè gharakwa inwu na ya.
5 Ka oké ọchịchịrị gbachie ya.
Ka urukpuru kpuchie ya.
Ka oké ọchịchịrị kpuchie ìhè ya.
6 Ka oké itiri gbaa n’abalị ahụ.+
Ka a ghara ịṅụrị ọṅụ n’ụbọchị ahụ n’ime ụbọchị ndị e nwere n’afọ,Ka ọ ghara iso n’ụbọchị ndị e nwere n’ọnwa.
7 N’eziokwu, ọ gaara aka mma ma a sị na e nweghị onye a mụrụ n’abalị ahụ.
Ka a ghara iti mkpu ọṅụ na ya.
8 Ka ndị na-abụ ụbọchị ọnụ bụọ ya ọnụ,Bụ́ ndị nwere ike ịkpọte Agụ Iyi.*+
9 Ka kpakpando nke pụtara mgbe chi malitere iji n’abalị ahụ gbaa ọchịchịrị.
Ka o chere ìhè, ma ka ìhè ghara ịdị,Ka ọ gharakwa ịhụ ìhè na-apụta ma chi bọwa.
10 N’ihi na o mechighị akpa nwa nne m,+O meghịkwa ka m ghara ịhụ nsogbu.
11 Gịnị mere na anwụghị m mgbe a na-amụ m?
Gịnị mere na anwụghị m mgbe m si n’akpa nwa pụta?+
12 Gịnị mere mama m ji kuru m n’ụkwụ ya,Nyekwa m ara ka m ṅụọ?
13 N’ihi na ugbu a, m gaarala edinara ala n’enweghị onye na-enye m nsogbu.+
M gaarala na-ehi ụra, na-ezukwa ike,+
14 Mụ na ndị eze ụwa na ndị na-adụ ha ọdụ,Ndị ebe ndị ha rụụrụ onwe ha dakpọsịziri adakpọsị,*
15 Ma ọ bụ, mụ na ụmụ ndị eze* bụ́ ndị nwere ọlaedo,Ndị ọlaọcha juru n’ụlọ ha.
16 Ma ọ bụ, gịnị mere na ime apụghị mama m mgbe ọ dị ime m,Mụ anwụọ ka ụmụaka ndị na-ahụtụghị ìhè?
17 N’ebe ahụ, ndị ajọ omume anaghịzi echegbu onwe ha.
Ndị ike gwụrụ na-ezu ike n’ebe ahụ.+
18 Ndị mkpọrọ niile na-atụsara ahụ́ n’ebe ahụ.
Ha anaghị anụ olu onye na-amanye ha ịrụ ọrụ.
19 Onye ukwu na onye nta bụ otu n’ebe ahụ,+Ohu na-enwerekwa onwe ya n’aka nna ya ukwu.
20 Gịnị mere Chineke ji ekwe ka onye na-ata ahụhụ dịrị ndụ,*Na-enyekwa ndị na-ahụsi anya ndụ?+
21 Gịnị mere na ọnwụ anaghị egbu ndị chọrọ ịnwụ?+
Ndị na-achọ ya karịa otú e si achọ akụ̀ zoro ezo,
22 Ndị na-aṅụrị nnukwu ọṅụ,Ndị obi na-atọ ụtọ ịnwụ.*
23 Gịnị mere Chineke ji enye onye furu ụzọ ìhè,Bụ́ onye ọ gbachibidoro ogige?+
24 N’ihi na m na-ama ọsụ kama iri ihe.+
Ude m na-asụ+ dị ka ebe mmiri na-agba n’akwụsịghị akwụsị.
25 N’ihi na ihe m tụrụ ụjọ ya abịarala m,Ihe m tụrụ egwu ya emeekwala m.
26 E nweghị mgbe obi ruru m ala. E nweghị mgbe m nọ jụụ. E nweghị mgbe m zuru ike,Kama nsogbu nọ na-abịa.”
Ihe E Dere n'Ala Ala Peeji
^ Na Hibru, “bụọ ụbọchị ya ọnụ.”
^ Na Hibru, “Levayatan.” Gụọ Nkọwa Okwu.
^ O nwere ike ịbụ, “ndị rụụrụ onwe ha ebe dakpọsịrị adakpọsị.”
^ Ma ọ bụ “ndị ọkwá ha gbagotere n’ụlọ eze.”
^ Na Hibru, “enye onye na-ata ahụhụ ìhè.”
^ Na Hibru, “Ndị obi na-atọ ụtọ mgbe ha chọtara ili.”
