Jeremaya 46:1-28
46 E nwere ihe Jehova gwara Jeremaya onye amụma banyere mba dị iche iche.+
2 Ihe a ka o kwuru gbasara Ijipt,+ ya bụ, gbasara ndị agha Fero+ Niko bụ́ eze Ijipt, onye Nebukadneza* eze Babịlọn meriri na Kakemish, n’akụkụ Osimiri Yufretis, n’afọ nke anọ n’ọchịchị Jehoyakim+ nwa Josaya, bụ́ eze Juda:
3 “Hazienụ obere ọta unu na ọta ukwu unu.
Pụtakwanụ maka ịlụ agha.
4 Ndị na-agba ịnyịnya, kwadebenụ ịnyịnya unu, nọrọkwanụ n’elu ha.
Kpurunụ okpu agha unu ma jikere ịlụ agha.
Meenụ ka ube unu na-egbu maramara, yirikwanụ uwe agha.
5 Jehova kwuru, sị, ‘Gịnị mere m ji ahụ ka ezigbo ụjọ ji ha?
Ha na-alaghachi azụ, a na-emerikwa ndị dike ha.
Ha agbaala ọsọ n’ihi ụjọ, ndị dike ha anaghịkwa ele anya n’azụ.
Ụjọ jikwa mmadụ niile.
6 Ndị nwere ụkwụ ọsọ agaghị agbapụli. Ndị dike agaghịkwa erili mbọmbọ.
Ike agwụla ha. Ha adaakwala n’ebe ugwu,N’akụkụ Osimiri Yufretis.’+
7 Ònye bụ onye a nke na-eto ka Osimiri Naịl,Na-etokwa ka osimiri ndị mmiri ha na-amali elu?
8 Ijipt na-eto ka Osimiri Naịl+Nakwa ka osimiri mmiri ya na-amali elu.
Ọ na-asị, ‘M ga-eto kpuchie ụwa.
M ga-ebibi obodo na ndị bi na ya.’
9 Ịnyịnya dị iche iche, gbagoonụ.
Ụgbọ ịnyịnya dị iche iche, gbawanụ ara ara.
Ka ndị dike n’agha pụta.
Ka ndị Kush na ndị Pọt, bụ́ ndị na-eji ọta, pụtakwa.+
Ka ndị Ludim,+ bụ́ ndị na-ekwe ụta ma na-agba ya,+ pụtakwa.
10 “Ụbọchị ahụ bụ ụbọchị Ọkaakaa Onyenwe anyị, bụ́ Jehova nke ụsụụ ndị agha. Ọ bụ ụbọchị ọ ga-egbu ndị iro ya n’ihi ihe ha mere. Mma agha ga-eri ha rijuo afọ, ṅụjuokwa ọbara ha afọ, n’ihi na Ọkaakaa Onyenwe anyị, bụ́ Jehova nke ụsụụ ndị agha, weere ozu ndị a ka àjà a chụụrụ ya n’ebe ugwu, n’akụkụ Osimiri Yufretis.+
11 Ndị Ijipt,* gaanụ Gilied nweta mmanụ balsam.+
Ọtụtụ ihe ndị unu nwetaraIji gwọọ onwe unu ọrịa abaghị uru,N’ihi na unu enweghị ngwọta.+
12 Mba dị iche iche anụla otú e si menye unu ihere.+
A na-anụkwa mkpu unu na-eti n’obodo a niile.
Otu dike na-adagide dike ọzọ.
Ha abụọ na-adarukwa ala.”
13 Jehova gwara Jeremaya onye amụma gbasara mgbe Nebukadneza* eze Babịlọn ga-abịa ịlụso ndị Ijipt agha.+ Ọ gwara ya, sị:
14 “Kọọnụ ya n’Ijipt, kwusaanụ ya na Migdọl.+
Kwusaakwanụ ya na Nọf* nakwa na Tapanhis.+
Sịnụ, ‘Nọrọnụ ebe unu kwesịrị ịnọ, jikerekwanụ,N’ihi na a ga-eji mma agha gbuo ndị niile gbara unu gburugburu.
15 Gịnị mere e ji kpochapụ ndị agha unu dị ike?
Ha enweghị ike ịkwụrụ n’ụkwụ ha,N’ihi na Jehova akwatuola ha.
16 Ha na-akpọ ụkwụ n’ihe, na-adakwa n’ìgwè n’ìgwè.
Ha na-agwakwa ibe ha, sị:
“Bilienụ, ka anyị laghachikwuru ndị obodo anyị na ndị ikwu anyịN’ihi mma agha e ji na-egbu anyị n’eleghị anya n’azụ.”’
17 Ndị agha unu ahụ dị ike kwusara ebe ahụ, sị,‘Ọ bụ naanị mkpọtụ ka Fero eze Ijipt na-eme.
Ọ hapụla ohere* ọ gaara eji mee ihe, ya agafee.’+
18 Eze, onye aha ya bụ Jehova nke ụsụụ ndị agha, kwuru, sị,‘Ebe ọ bụ na m na-adị ndụ, ọ* ga-abata, dịrị otú ugwu Tebọ+ dị n’etiti ugwu ndị ọzọ,Dịrịkwa otú ugwu Kamel+ dị n’akụkụ oké osimiri.
19 Ndị bi n’Ijipt,Kwakọtanụ ngwongwo unu ga-ebu mgbe a ga-adọrọ unu n’agha.
N’ihi na Nọf* ga-aghọ ihe na-awụ akpata oyi.
A ga-agba ya ọkụ.* E nweghịkwa onye ga-ebi na ya.+
20 Ijipt yiri nwa ehi ahụ́ dị mma.
Ma, anwụnta ga-esi n’ebe ugwu bịa taa ya.
21 Ndị agha o goro ọrụ, bụ́ ndị nọ n’ime ya, yikwara ụmụ ehi gbara agba.
Ma ha niile atụgharịala gbaa ọsọ.
Ha enwelighị ike ịkwụrụ n’ụkwụ ha,+N’ihi na ọdachi adakwasịla haN’oge m na-ekpe ha ikpe.’
22 ‘Ọ na-eti mkpu, olu ya ana-ada ka agwọ na-agba ọsọ,N’ihi na ha ji anyụike bịakwute ya n’ike,Dị ka ndị na-egbutu osisi.’*
23 Jehova kwuru, sị, ‘Ha ga-asụ oké ọhịa ya, n’agbanyeghị na o yiri ebe a na-agaghị abanyeli abanye.
Ha dị ọtụtụ karịa igurube. E nweghịkwa ike ịgụta ha ọnụ.
24 A ga-emenye ndị bi n’Ijipt* ihere.
A ga-enyefe ha n’aka ndị si n’ebe ugwu.’+
25 “Jehova nke ụsụụ ndị agha, bụ́ Chineke Izrel, sịrị: ‘Ugbu a, m ga-ata Emọn+ bụ́ chi ndị Noo* ahụhụ,+ taakwa Fero, ndị Ijipt, chi ha dị iche iche,+ na ndị eze ha. M ga-ata Fero na ndị niile tụkwasịrị ya obi ahụhụ.’+
26 “Jehova kwuru, sị, ‘M ga-enyefe ha n’aka ndị na-achọ igbu ha,* ya bụ, n’aka Nebukadneza* eze Babịlọn+ na ndị na-ejere ya ozi. Ma, ndị mmadụ ga-emecha biri n’Ijipt otú ha bi ya n’oge gara aga.’+
27 ‘Ma gịnwa bụ́ Jekọb ohu m, atụla egwu.
Izrel, atụkwala ụjọ.+
N’ihi na m ga-esi ebe dị anya zọpụta gị,Zọpụtakwa ụmụ* gị n’ala a dọọrọ ha n’agha laa.+
Jekọb ga-alọta. Ahụ́ ga-erukwa ya ala. E nweghị ihe ga-enye ya nsogbu.
E nweghịkwa onye ga-emenye ya ụjọ.’+
28 Jehova kwuru, sị, ‘Jekọb ohu m, atụla egwu, n’ihi na m nọnyeere gị.
M ga-ebibi mba niile m chụgara gị n’ala ha.+
Ma agaghị m ebibi gị.+
Kama, m ga-adọ gị aka ná ntị* otú kwesịrị ekwesị.+
M ga-atarịrị gị ahụhụ.’”
Ihe E Dere n'Ala Ala Peeji
^ Na Hibru, “Nebukadreza.” Ọ bụ otú ọzọ e si ede aha a.
^ Na Hibru, “Ada na-amaghị nwoke bụ́ Ijipt.”
^ Na Hibru, “Nebukadreza.” Ọ bụ otú ọzọ e si ede aha a.
^ Ma ọ bụ “Memfis.”
^ Na Hibru, “oge a kara aka.”
^ Ya bụ, onye ga-emeri Ijipt.
^ Ma ọ bụ “Memfis.”
^ O nwere ike ịbụ, “Ọ ga-abụ ala na-abaghị uru.”
^ Ma ọ bụ “ndị na-akpa nkụ.”
^ Na Hibru, “ada bụ́ Ijipt.”
^ Ya bụ, Tibs.
^ Ma ọ bụ “na-achọ mkpụrụ obi ha.”
^ Na Hibru, “Nebukadreza.” Ọ bụ otú ọzọ e si ede aha a.
^ Na Hibru, “mkpụrụ.”
^ Ma ọ bụ “m ga-agbazi gị.”
