Abụ Ọma 41:1-13
Maka onye na-eduzi abụ. Abụ Devid.
41 Onye na-emetere onye ọ na-enweghị ka ọ hà ya ebere na-enwe obi ụtọ.+
Jehova ga-anapụta ya n’ụbọchị ọdachi ga-adakwasị ya.
2 Jehova ga-echebe ya ma dowe ya ndụ.
A ga-akpọ ya onye obi ụtọ n’ụwa.+
Ị gaghị ahapụ ya ka ndị iro ya mee ya ihe ha bu n’obi.+
3 Jehova ga-enyere ya aka mgbe o dina n’àkwà* ya na-arịa ọrịa.+
Ị ga-elekọta ya* n’oge ọ na-arịa ọrịa.
4 N’ihi na m kwuru, sị: “Jehova, biko, meere m amara.+
Gwọọ m,*+ n’ihi na emehiela m gị.”+
5 Ma ndị iro m na-ekwu ihe ọjọọ banyere m, sị:
“Olee mgbe ọ ga-anwụ, ka e wee chefuo aha ya?”
6 Ọ bụrụ na otu onye n’ime ha abịa ịhụ m, ọ* na-aghara m ụgha.
Ọ na-achọta ihe ọjọọ ọ ga-ekwu.
Ya pụzie, ya akọsawa ya.
7 Ndị niile kpọrọ m asị na-agbanyere ibe ha izu.
Ha na-akpa nkata ihe ọjọọ ha ga-eme m. Ha na-asị:
8 “Ihe ọjọọ abịarala ya.
Ugbu a o dinazi edina, ọ gaghị ebili ọzọ.”+
9 Onye mụ na ya dịdị ná mma, onye m tụkwasịrị obi,+Onye na-eri nri m, na-emegidezi m.*+
10 Ma, Jehova, biko, meere m amara ma kulite m,Ka m wee kwụọ ha ụgwọ ihe ha mere.
11 Mgbe m ga-amara na ihe m na-eme dị gị mmaBụ mgbe onye iro m na-enweghịzi ike ịṅụrị ọṅụ na ya emeriela m.+
12 Ma ị na-akwado m maka na m kwụsiri ike n’ebe ị nọ.+
Ị ga-eme ka m nọrọ n’ihu gị ruo mgbe ebighị ebi.+
13 Ka a na-eto Jehova bụ́ Chineke IzrelRuo mgbe ebighị ebi.*+
Amen na Amen.
Ihe E Dere n'Ala Ala Peeji
^ Ma ọ bụ “n’ihe ndina.”
^ Na Hibru, “ga-agbanwe ihe ndina ya.”
^ Ma ọ bụ “mkpụrụ obi m.”
^ Na Hibru, “obi ya.”
^ Na Hibru, “eweliela ikiri ụkwụ ya ka o megide m.”
^ Ma ọ bụ “Malite mgbe ebighị ebi ruo mgbe ebighị ebi.”