Abụ Ọma 22:1-31
Ntụziaka e nyere onye na-eduzi abụ. A ga-eji ụda a na-akpọ “Nne Ele Isi Ụtụtụ”* kpọọ ya. Abụ Devid.
22 Chineke m, Chineke m, gịnị mere i ji hapụ m?+
Gịnị mere na ị bịaghị ka ị zọpụta m?
Gịnị mere na ị naghị anụ ákwá arịrị m na-ebe?+
2 Chineke m, m na-akpọ gị n’ehihie, ma ị naghị aza.+
M na-akpọkwa gị n’abalị, anaghị m emechi ọnụ.
3 Ma ị dị nsọ.+
Izrel ji abụ otuto gbaa gị gburugburu.
4 Ọ bụ gị ka nna anyị hà tụkwasịrị obi.+
Ha tụkwasịrị gị obi, ị nọkwa na-anapụta ha.+
5 Ọ bụ gị ka ha kpọrọ ka i nyere ha aka, e wee zọpụta ha.
Ha tụkwasịrị gị obi, i mechughịkwa ha ihu.*+
6 Ma ndị mmadụ ji m eme ihe ọchị, ha kpọkwara m asị,Ka à ga-asị na m bụ idide, na abụghị m mmadụ.+
7 Ndị niile na-ahụ m na-eji m eme ihe ọchị.+
Ha na-akwa m emo, na-efufekwa isi, na-asị:+
8 “Ọ tụkwasịrị Jehova obi. Ya napụta ya.
Ya zọpụta ya, ebe ọ bụ na ọ hụrụ ya n’anya nke ukwuu.”+
9 Ọ bụ gị bụ Onye si n’afọ nne m kupụta m,+Onye mere ka obi ruo m ala mgbe m na-aṅụ ara nne m.
10 Malite mgbe a mụrụ m, e nyefere m n’aka gị ka i lekọtawa m.
Ị bụ Chineke m malite mgbe m nọ n’afọ nne m.
11 Anọla m n’ebe dị anya n’ihi na nsogbu gbara m gburugburu,+Enweghịkwa m onye ọzọ ga-enyere m aka.+
12 Ọtụtụ ndị iro gbara m gburugburu.+
Ha dị ka oké ehi siri ike ndị si Beshan.+
13 Ha na-emeghe ọnụ ha na-eyi m egwu+Ka ọdụm na-agbọ ụja, nke na-adọrikwa anụ o jidere.+
14 Ike agwụla m. Adịzi m ka mmiri a kwafuru akwafu.
Ọkpụkpụ m niile ekwokapụla.
Obi m dịzi ka mgbá aṅụ na-agbaze agbaze.*+
Obi na-awụnye m n’afọ.+
15 Ike adịkwaghị m. Adịzi m ka mpekere ite ụrọ kpọrọ nkụ.+
Ire m na-arapara n’ágbụ̀ m.+
Ị na-ewetu m n’ájá ka m nwụọ.+
16 Ndị iro gbara m gburugburu ka nkịta.+
Ha na-agba m gburugburu ka ìgwè ndị na-eme ihe ọjọọ.+
Ha na-ata m arụ n’aka nakwa n’ụkwụ ka ọdụm.+
17 A na-ahụzi ọkpụkpụ m niile anya.*+
Ndị iro m na-ele m anya. Ha kporopụrụ anya na-ele m.
18 Ha kere uwe m,Ha fekwaara uwe m nza.+
19 Ma Jehova, biko, anọzila m n’ebe dị anya.+
Ọ bụ gị bụ ike m. Bịa ngwa ngwa nyere m aka.+
20 Zọpụta m* ka a ghara iji mma agha gbuo m.
Zọpụta ndụ m* ka nkịta ghara ịdọri m.+
21 Zọpụta m n’ọnụ ọdụm,+ zọpụtakwa m ka atụ́ ghara iji mpi ya sọgbuo m.
Za m ma zọpụta m.
22 M ga-akọsara ụmụnna m aha gị.+
M ga-eto gị n’ime ọgbakọ.+
23 Unu ndị na-atụ egwu Jehova, toonụ ya.
Unu niile bụ́ ụmụ* Jekọb, jaanụ ya mma.+
Tụọnụ egwu ya, unu niile bụ́ ụmụ* Izrel.
24 N’ihi na o legharaghị ahụhụ onye a na-emegbu emegbu na-ata anya.+
O zoroghị ya ihu ya.+
Mgbe o besaara ya ákwá ka o nyere ya aka, ọ nụrụ ya.+
25 M ga-anọ n’ọgbakọ buru ibu too gị.+
M ga-emezu nkwa m n’ihu ndị na-atụ egwu gị.
26 Ndị dị umeala n’obi ga-eri ihe rijuo afọ.+
Ndị na-achọ Jehova ga-eto ya.+
Na-enwenụ obi ụtọ* ruo mgbe ebighị ebi.
27 Ndị niile bi n’ebe niile n’ụwa ga-echeta Jehova ma laghachikwuru ya.
Ezinụlọ niile si ná mba dị iche iche ga-akpọ isiala n’ihu gị.+
28 N’ihi na ọ bụ Jehova bụ Eze.+
Ọ na-achị mba niile.
29 Ndị niile bara ọgaranya* n’ụwa ga-eri ihe ma kpọọ isiala.
Ndị niile na-alaghachi n’ájá ga-egbu ikpere n’ala n’ihu ya.
E nweghị onye n’ime ha ga-echebeli onwe ya.*
30 Ụmụ ha* ga-ejere ya ozi.
A ga-akọrọ ọgbọ na-abịa abịa banyere Jehova.
31 Ha ga-abịa kọọ banyere ezi omume ya.
Ha ga-akọrọ ndị a ka ga-amụ amụ ihe ndị o mere.
Ihe E Dere n'Ala Ala Peeji
^ Ihe a nwere ike ịbụ aha ụda egwú ma ọ bụ aha otú e si akpọ egwú.
^ Ma ọ bụ “i menyeghịkwa ha ihere.”
^ Mgbá aṅụ bụ ihe aṅụ na-anyụpụta nke na-adị n’ụgbụgbọ mmanụ aṅụ. Ihe a na-agbaze ngwa ngwa.
^ Na Hibru, “M ga-agụli ọkpụkpụ m niile ọnụ.”
^ Ma ọ bụ “mkpụrụ obi m.”
^ Ma ọ bụ “mkpụrụ obi m.”
^ Na Hibru, “mkpụrụ.”
^ Na Hibru, “mkpụrụ.”
^ Na Hibru, “Ka obi unu dị ndụ.”
^ Na Hibru, “buru ibu.”
^ Ma ọ bụ “mkpụrụ obi ya.”
^ Na Hibru, “Mkpụrụ.”
