Aịzaya 2:1-22
2 Ihe a ka Aịzaya nwa Emọz hụrụ n’ọhụụ gbasara Juda na Jeruselem:+
2 N’oge ikpeazụ,Ugwu nke ụlọ Jehova dị n’elu yaGa-akwụsi ike n’ebe dị elu karịa ugwu ukwu niile.+
A ga-ebulikwa ya ka ọ dị elu karịa ugwu nta niile.
Mba niile ga-enurukwa na-agbago na ya.+
3 Ọtụtụ ndị ga-ejekwa, sị:
“Bịanụ ka anyị gbagoo n’ugwu Jehova,Gbagookwa n’ụlọ Chineke Jekọb.+
Ọ ga-akụziri anyị ụzọ ya.
Anyị ga-ejekwa ije n’ụzọ ya.”+
N’ihi na a ga-esi na Zayọn nye iwu,*Sikwa na Jeruselem kwuo ihe Jehova kwuru.+
4 Ọ ga-ekpere mba dị iche iche ikpe,Doziekwara ọtụtụ ndị okwu ha.
Ha ga-akpụgharị mma agha ha ka ha bụrụ mma ogè,Kpụgharịakwa ube ha ka ha bụrụ mma e ji akwa osisi.+
Mba agaghị eweli mma agha lụso mba ọzọ agha.
Ha agaghịkwa amụ otú e si alụ agha.+
5 Ndị ezinụlọ Jekọb, bịanụKa anyị jee ije n’ìhè Jehova.+
6 Chineke, ị hapụla ndị gị, bụ́ ndị ezinụlọ Jekọb,+N’ihi na ha emewela ọtụtụ ihe a na-eme n’Ebe Ọwụwa Anyanwụ.
Ha na-eme anwansi*+ ka ndị Filistia.
Ha na ụmụ ndị ala ọzọ bikwa.
7 Ọlaọcha na ọlaedo juru eju n’obodo ha.
Akụ̀ ha anaghịkwa agwụ agwụ.
Ịnyịnya juru eju n’obodo ha.
Ụgbọ ịnyịnya ha bụkwa agụta agụta.+
8 Chi dị iche iche na-abaghị uru juru n’obodo ha.+
Ihe ha na-akpọrọ isiala bụ ihe ha ji aka ha rụọ,Ya bụ, ihe mkpịsị aka ha rụrụ.
9 Otú a ka ha si eweda onwe ha ala, na-emenyekwa onwe ha ihere.
Ị gaghịkwa agbaghara ha.
10 Banyenụ n’ọgba nkume, zookwanụ n’ájáN’ihi na ike Jehova na-emenye ụjọ.
Ọ dị ebube, bụrụkwa onye ukwu.+
11 A ga-eme ka ndị dị mpako dị ala.
A ga-ewedakwa ndị dị elu ala.
Ọ bụ naanị Jehova ka a ga-ebuli elu n’ụbọchị ahụ.
12 N’ihi na ọ bụ ụbọchị Jehova nke ụsụụ ndị agha.+
Ọ ga-abịa n’ihi ndị niile dị mpako na ndị na-ebuli onwe ha elu.
Ọ ga-abịakwa n’ihi mmadụ niile, ma onye ukwu ma onye nta.+
13 Ọ ga-abịa n’ihi osisi sida niile dị na Lebanọn, ma ndị nke dị elu ma ndị nke e buliri elu.
Ọ ga-abịakwa n’ihi osisi ook niile dị na Beshan.
14 Ụbọchị ahụ ga-abịakwa n’ihi ugwu ukwu niile dị eluNa ugwu nta niile dị elu.
15 Ọ ga-abịakwa n’ihi ụlọ nche niile dị elu, nakwa n’ihi mgbidi niile a rụsiri ike.
16 Ọ ga-abịakwa n’ihi ụgbọ mmiri niile na-aga Tashish+Nakwa n’ihi ụgbọ epeepe niile mara ezigbo mma.
17 A ga-eme ka ndị dị mpako dị ala.
A ga-ewedakwa ndị dị elu ala.
Ọ bụ naanị Jehova ka a ga-ebuli elu n’ụbọchị ahụ.
18 A gaghị ahụkwa chi dị iche iche na-abaghị uru.+
19 Mgbe Jehova ga-ebili mee ka ụwa maa jijiji,Ndị mmadụ ga-abanye n’ọgba nkume,Banyekwa n’ime ọnụ ndị dị n’ala,+N’ihi na ike ya na-emenye ụjọ.
Ọ dị ebube, bụrụkwa onye ukwu.+
20 N’ụbọchị ahụ, ndị mmadụ ga-atụfusị chi ha dị iche iche na-abaghị uru, ma ndị e ji ọlaọcha mee ma ndị e ji ọlaedo mee,Ndị ha meere onwe ha ka ha na-akpọrọ isiala.
Ha ga-atụpụrụ ha nkapị na ụsụ,+
21 Ka ha nwee ike banye n’oghere ndị dị n’oké nkumeNakwa n’ebe ndị gbawara agbawa ná nnukwu nkume,Mgbe Jehova ga-ebili mee ka ụwa maa jijiji,N’ihi na ike ya na-emenye ụjọ.
Ọ dị ebube, bụrụkwa onye ukwu.
22 Maka ọdịmma unu, unu atụkwasịzila mmadụ nkịtị obi,Onye naanị ihe ji ya ndụ bụ ume ọ na-eku.*
Gịnị mere a ga-eji jiri ya kpọrọ ihe?
