Abụ Ọma 79:1-13
Abụ olu ụtọ Esaf.
79 Chineke, ndị mba ọzọ abatawo n’ihe nketa gị;+Ha emerụwo ụlọ nsọ gị;+Ha emewo ka Jeruselem bụrụ mkpọmkpọ ebe.+
2 Ha emewo ka ozu ndị ohu gị ghọọrọ nnụnụ nke eluigwe ihe oriri,+Werekwa anụ ahụ́ nke ndị na-eguzosi ike n’ebe ị nọ nye anụ ọhịa nke ụwa.+
3 Ha awụpụwo ọbara ha dị ka mmiriNa Jeruselem dum, ọ dịghịkwa onye ga-eli ha.+
4 Anyị aghọworo ndị agbata obi anyị ihe nkọcha,+Ghọọkwara ndị gbara anyị gburugburu ihe ọchị na ihe ịkwa emo.+
5 Jehova, ruo ole mgbe ka ị ga na-ewe oké iwe? Ọ̀ bụ ruo mgbe ebighị ebi?+Ruo ole mgbe ka iwe gị ga na-enwu dị ka ọkụ?+
6 Wụkwasị mba ndị na-amaghị gị ọnụma gị,+Wụkwasịkwa alaeze ndị na-adịghị akpọku aha gị ọnụma gị.+
7 N’ihi na ha eripịawo Jekọb,+Ha emewokwa ka ebe obibi ya tọgbọrọ n’efu.+
8 Echetala njehie nna nna anyị hà wee taa anyị ahụhụ n’ihi ya.+Meere anyị ebere ọsọ ọsọ,+N’ihi na ike agwụla anyị kpamkpam.+
9 Nyere anyị aka, Chineke nke nzọpụta anyị,+N’ihi ebube nke aha gị;+Napụta anyị, kpuchiekwa mmehie anyị n’ihi aha gị.+
10 Gịnị mere mba dị iche iche ga-eji sị: “Olee ebe Chineke ha nọ?”+Ka anyị hụ mgbe a ga-eme ka a mara n’etiti mba niile+Ọbọ ị ga-abọ maka ọbara ndị ohu gị a wụfuru.+
11 Ka ị nụ ude onye mkpọrọ na-asụ.+Dị ka ogwe aka gị si dị ukwuu, chebe ndị a mara ikpe ọnwụ.+
12 Jehova, kwụọ ndị agbata obi anyị ụgwọ nkọcha ha kọchara gị,+Kwụọ ha ụgwọ okpukpu asaa, wụnye ya n’obi uwe ha.+
13 Anyị bụ́ ndị gị na ìgwè atụrụ nke nọ n’ebe ịta nri gị,+Ga na-ekele gị ruo mgbe ebighị ebi;Anyị ga-akọ otuto gị site n’ọgbọ ruo n’ọgbọ.+
