Mgbe Pọl gachara nke ugboro atọ ya kwusaa ozi ọma n’ebe dị iche iche, ọ gara Jeruselem. E jidere ya n’ebe ahụ ma tụọ ya mkpọrọ. N’otu abalị, ọ hụrụ ọhụụ, Jizọs agwa ya n’ọhụụ ahụ, sị: ‘Ị ga-aga Rom zie ozi ọma.’ E si Jeruselem kpọga ya Sizaria. Pọl nọrọ afọ abụọ n’ụlọ mkpọrọ n’ebe ahụ. Mgbe ọ na-azara ọnụ ya n’ihu Gọvanọ Festọs, ọ gwara gọvanọ, sị: ‘Achọrọ m ka Siza kpee m ikpe na Rom.’ Festọs gwara ya, sị: ‘Ebe ị sị na ị chọrọ ka Siza kpee gị ikpe, ọ bụ Siza ga-ekpe ya.’ E tinyeziri Pọl n’ụgbọ mmiri na-aga Rom, ụmụnna abụọ aha ha bụ Luk na Arịstakọs esoro ya gawa.

Mgbe ha nọ n’ụgbọ mmiri na-aga, oké ifufe malitere ife. O fegidere ruo ọtụtụ ụbọchị. Ndị niile nọ n’ụgbọ ahụ chere na ha ga-anwụ. Ma Pọl sịrị ha: ‘Otu mmụọ ozi gwara m ná nrọ, sị: “Atụla egwu, Pọl. Ị ga-eru Rom, o nweghịkwa ihe ga-eme onye ọ bụla nọ n’ụgbọ a.” Nweenụ obi ike. Anyị agaghị anwụ.’

Oké ifufe ahụ fegidere ruo abalị iri na anọ. N’ikpeazụ, mgbe ha ruwere ebe ala dị n’agwaetiti Mọlta, ụgbọ ha tọrọ n’ájá, ebili mmiri akụrisịa ya. Ma, narị mmadụ abụọ na iri asaa na isii (276) ndị nọ n’ụgbọ ahụ pụtara n’enweghị ihe mere ha. Ụfọdụ gwuuru mmiri pụta, ndị ọzọ ejide ibé osisi si n’ụgbọ ahụ aka, mmiri eburu ha pụta n’elu ala. Ndị Mọlta kwanyeere ha ọkụ ka ahụ́ kporo ha ọkụ, lekọtakwa ha.

Mgbe ọnwa atọ gachara, ndị agha kpọọrọ Pọl hà banye n’ụgbọ mmiri ọzọ gawa Rom. Mgbe o ruru Rom, ụmụnna nọ ebe ahụ gara hụ ya. Mgbe ọ hụrụ ha, o kelere Jehova, obi esiekwa ya ike. Ọ bụ eziokwu na e ji Pọl eji, a hapụrụ ya ka ọ nọrọ n’ụlọ ọ na-akwụ ụgwọ ya, onye agha ana-eche ya nche. Ọ nọrọ ebe ahụ afọ abụọ. Ndị mmadụ na-agakwa ahụ ya, ya ana-ezi ha ozi ọma gbasara Alaeze Chineke nakwa gbasara Jizọs. Pọl nọkwa ebe ahụ degara ọgbakọ dị iche iche dị n’Eshia Maịnọ nakwa na Judia akwụkwọ ozi. N’eziokwu, Jehova ji Pọl mee ka ozi ọma ruo ná mba dị iche iche.