Gaa n'Isiokwu

Gaa na menu nke abụọ

Gaa n'ebe e dere isiokwu ndị dị na ya

Ndịàmà Jehova

Igbo

Ụlọ Nche  |  Jun 2014

Ajụjụ Ndị Baịbụl Zara

Ajụjụ Ndị Baịbụl Zara

È nwere ihe mere e ji kee ụwa anyị a?

E kere ụwa ka ọ bụrụ ebe ndị mmadụ ga-ebi na-enwe obi ụtọ

E keziri ụwa anyị a ekezi ka ihe ndị dị ndụ nwee ike ịnọli na ya. E nwere mmiri buru ibu n’ụwa. Mmiri niile a e nwere na-eme ka ihe ndị dị ndụ n’ụwa ghara ịnwụ. Otú ụwa si nọrọ, otú o si atụgharị nakwa otú o si agba anyanwụ gburugburu bara ezigbo uru n’ihi na ọ bụ ya mere ka oké osimiri ghara ịkpụkọ ọnụ ma ọ bụkwanụ ka ọ ghara ịdị ezigbo ọkụ ka mmiri e sinyere n’ọkụ. E nwekwara ikuku ndị dị na mbara ígwé na ihe ndị dị n’ime ala na-eme ka a ghara inwe oké okpomọkụ n’ụwa. Otú e si kee ahịhịa na ụmụ anụmanụ na mmadụ ka ha si n’aka ibe ha na-enweta ihe ha ga na-eri dị ịtụnanya. Mgbe ọtụtụ ndị lechara otú ihe a niile si dịrị n’ụwa, ha kwuru na e nwere ezigbo ihe mere e ji kee ụwa.—Gụọ Aịzaya 45:18.

Ma i nwere ike ịjụ, sị: ‘Ahụhụ ndị mmadụ na-ata na mmegbu ndị mmadụ na-emegbu ibe ha hà so n’ihe mere e ji kee ya?’—Gụọ Diuterọnọmi 32:4, 5.

Chineke ọ̀ ga-emezuli ihe o bu n’obi kee ụwa?

E kere ụwa ka ọ bụrụ ebe ndị mmadụ ga-ebi na-enwe obi ụtọ, na-akwanyere ibe ha ùgwù ma hụ Onye kere ha n’anya. N’ihi ya, ihe Chineke bu n’obi kee mmadụ karịrị ihe o bu n’obi kee ahịhịa na ụmụ anụmanụ. Anyị nwere ike ịmata onye Onye kere anyị bụ. Anyị nwekwara ike ịmụta ịhụ ndị ọzọ n’anya na imeso ha otú Chineke na-eme.—Gụọ Ekliziastis 12:13; Maịka 6:8.

Onye kere anyị ga-emeli ihe niile o bu n’obi ime. N’ihi ya, obi kwesịrị isi anyị ike na ọ ga-eme ka ahụhụ ndị mmadụ na-ata na mmegbu ndị mmadụ na-emegbu ibe ha kwụsị, meekwa ka ụwa anyị a bụrụ ebe ndị mmadụ ga-ebi na-enwe ezigbo obi ụtọ.—Gụọ Abụ Ọma 37:11, 29; Aịzaya 55:11.