Gaa n'Isiokwu

Gaa na menu nke abụọ

Gaa n'ebe e dere isiokwu ndị dị na ya

Ndịàmà Jehova

Igbo

Ụlọ Nche  |  Febụwarị 2014

Ajụjụ Ndị Baịbụl Zara

Ajụjụ Ndị Baịbụl Zara

Baịbụl ọ̀ bụ Okwu Chineke?

Okwu Chineke kwesịrị ịbụ akwụkwọ pụrụ iche. Ọ́ bụghị ya? N’eziokwu, Baịbụl pụrụ iche. E bipụtala ya ihe ruru ọtụtụ narị ijeri, e nwekwara ya n’ọtụtụ narị asụsụ. Baịbụl nwere ike ịgbanwe ndụ ndị mmadụ, mee ka ha kpawa àgwà ọma.—Gụọ 1 Ndị Tesalonaịka 2:13; 2 Timoti 3:16.

Obi siri anyị ike na Baịbụl bụ Okwu Chineke n’ihi na o kwuo na ihe ga-eme, ihe ahụ na-emecha mee. O nweghị mmadụ ọ bụla na-ekwu ihe ga-eme echi, ihe ahụ emee otú ahụ o kwuru ya. Ma, ihe ọ bụla e kwuru na Baịbụl na-emerịrị otú e kwuru ya. Dị ka ihe atụ, e nwere akwụkwọ Aịzaya a hụrụ n’otu ọgba dị nso n’osimiri a na-akpọ Osimiri Nwụrụ Anwụ. E dere akwụkwọ ahụ ihe karịrị otu narị afọ tupu a mụọ Jizọs. Akwụkwọ ahụ kwuru na a ga-ebibi obodo Babịlọn, nakwa na o nweghị onye ga-ebi na ya. Ihe ahụ o kwuru mechara mezuo. O mezuru ọtụtụ afọ Jizọs kwusachara ozi ọma n’ụwa.—Gụọ Aịzaya 13:19, 20; 2 Pita 1:20, 21.

Olee otú e si dee Baịbụl?

Ọ bụ ihe dị ka mmadụ iri anọ dere Baịbụl. O were ha ihe karịrị otu puku afọ na narị afọ isii tupu ha edechaa ya. Ihe onye nke ọ bụla n’ime ha dere dabara n’ihe ibe ya dere. Gịnị mere ha ji nwee ike ide ya otú ahụ? Ọ bụ maka na Chineke ji mmụọ nsọ ya nyere ha aka.—Gụọ 2 Samuel 23:2.

Mgbe ụfọdụ, Chineke si n’aka ndị mmụọ ozi gwa ndị ahụ dere Baịbụl ihe ha ga-ede. O nwekwara mgbe ọ gwara ha okwu n’ọhụụ nakwa ná nrọ. Ma, otú Chineke si gwa ọtụtụ n’ime ha ihe ha dere bụ na o mere ka ha mata ihe ha kwesịrị ide, ya ahapụzie ha ka ha jiri aka ha dee ya otú ndị mmadụ ga-aghọta ya.—Gụọ Mkpughe 1:1; 21:3-5.