Gbanwee otú ọ ga-esi egosi

Họrọ asụsụ

Gaa na menu nke abụọ

Gaa n'ebe e dere isiokwu ndị dị na ya

Gaa n'Isiokwu

Ndịàmà Jehova

Igbo

ỤLỌ NCHE Nke 1 n'Afọ 2016

 IHE E KWURU N’OGE OCHIE NKE KA BARA URU

Echegbula Onwe Gị

Echegbula Onwe Gị

IHE BAỊBỤL KWURU: “Kwụsịnụ ichegbu onwe unu banyere mkpụrụ obi unu.”—Matiu 6:25.

Gịnị ka ọ pụtara? Jizọs kwuru ihe ahụ mgbe ọ na-akụziri ndị mmadụ ihe n’elu ugwu. Otu akwụkwọ na-akọwa okwu ndị dị na Baịbụl kwuru na n’asụsụ Grik, a sị na mmadụ na-echegbu onwe ya, o nwere ike ịbụ “echiche mmadụ na-eche n’ihi na ọ dara ogbenye ma ọ bụ n’ihi na agụụ na-agụ ya ma ọ bụkwanụ n’ihi nsogbu ndị ọzọ na-abịara ya kwa ụbọchị.” Mmadụ nwekwara ike ịna-echegbu onwe ya gbasara ihe ndị nwere ike ime n’ọdịnihu. Ọ dịghị njọ ma anyị na-eche gbasara ihe ndị na-akpa anyị na otú ihe ga-esi agara ndị ikwu na ibe anyị. (Ndị Filipaị 2:20) Ma, Jizọs gwara ndị na-eso ụzọ ya sị: “Unu echegbula onwe unu.” Ọ chọghị ka ha na-echegbu onwe ha maka echi, n’ihi na ọ ga-eme ka ha ghara inwe obi ụtọ ha kwesịrị inwe maka ụbọchị ọ bụla ha dị ndụ.—Matiu 6:31, 34.

Ọ̀ bara uru taa? Anyị mee ihe a Jizọs kwuru, ọ ga-abara anyị uru. N’ihi gịnị? Ihe e kwuru n’akwụkwọ ụfọdụ e ji eme nchọnchọ gosiri na ọ bụrụ na anyị ana-eche oké echiche, ọ ga-eme ka akwara ndị dị́ anyị n’ahụ́ na-arụ ọrụ n’ezughị ike. Ihe a nweziri ike ime ka anyị nwee ọrịa ndị dị ka ọnyá afọ, ọrịa obi na ụkwara ume ọkụ.

Jizọs kwuru ihe mere anyị kwesịrị iji ghara ịna-echegbu onwe anyị. O kwuru na ọ baghị uru. Jizọs jụrụ, sị: “Ònye n’ime unu pụrụ ịgbakwụnye otu kubit n’afọ ndụ ya site n’ichegbu onwe ya?” (Matiu 6:27) Ichegbu onwe anyị agaghị emeli ka ndụ anyị gbatịkwuo, ma ya fọdụzie ime ka ndụ anyị ka mma. Mgbe ụfọdụ, ihe anyị na-atụ ụjọ na ọ ga-eme anaghịdị emecha mee. Otu nwoke gụrụ akwụkwọ kwuru, sị: “Mmadụ ichegbu onwe ya maka ọdịnihu abaghị uru, n’ihi na ọdịnihu anaghị adịcha njọ otú anyị chere.”

Oleezi otú anyị ga-esi kwụsị ịna-echegbu onwe anyị? Ihe mbụ anyị ga-eme bụ ịtụkwasị Chineke obi. Ọ bụrụ na Chineke na-enye anụ ufe nri, na-eyiwe okooko osisi uwe mara mma, ọ̀ bụ na ọ gaghị enye ụmụ mmadụ, ndị ji obi ha niile na-efe ya, ihe niile dị́ ha mkpa ná ndụ? (Matiu 6:25, 26, 28-30) Ihe nke abụọ anyị ga-eme bụ ịghara ịna-echegbu onwe anyị maka echi. Jizọs kwuru, sị: “Unu echegbula onwe unu mgbe ọ bụla maka echi, n’ihi na echi ga-enwe nchegbu nke ya.” Ọ̀ bụ na i kwetaghị na “ihe ọjọọ nke ụbọchị nke ọ bụla ezuworo ya”?—Matiu 6:34.

Ọ bụrụ na anyị emee ihe a Jizọs kwuru, anyị agaghị na-arịa ọrịa ndị oké echiche na-akpata. Nke kadị mkpa bụ na obi ga-eru anyị ala, ya bụ, na anyị ga-enwe ihe Baịbụl kpọrọ “udo nke Chineke.”— Ndị Filipaị 4:6, 7.

GỤKWUO GBASARA YA

Ị̀ Ga-atụkwasị Chineke Obi?

Ị ga-ahụ otú obi ga-esi adị gị ụtọ ma ị mata na Chineke bụ ezigbo enyi ị ga-atụkwasịli obi.