Gaa n'Isiokwu

Gaa na menu nke abụọ

Gaa n'ebe e dere isiokwu ndị dị na ya

Ndịàmà Jehova

Igbo

Ụlọ Nche (Nke A Na-amụ Amụ)  |  Ọktoba 2017

Ị̀ Maara?

Ị̀ Maara?

Olee ihe ndị Juu na-eme nke mere Jizọs ji kwuo na ịṅụ iyi adịghị mma?

IWU Mozis kwuru na e nwere mgbe ndị Juu kwesịrị ịṅụ iyi. Ma n’oge Jizọs, ndị Juu na-aṅụkarị iyi nke na ha na-aṅụ iyi n’ọtụtụ ihe ha na-ekwu. Ha na-eme ya ka ndị mmadụ kweta n’ihe ha na-ekwu. Ma, Jizọs kwuru ugboro abụọ na ihe a ha na-eme adịghị mma. O kwuru, sị: “ka Ee unu kwuru bụrụ Ee, ka Ee e unu kwuru bụrụ Ee e.”​—⁠Mat. 5:​33-37; 23:​16-22.

Akwụkwọ bụ́ Theological Dictionary of the New Testament kwuru na ihe e dere n’akwụkwọ okpukpe ndị Juu bụ́ Talmud gosiri na ndị Juu na-aṅụkarị iyi iji gosi na ihe ha kwuru bụ eziokwu. Akwụkwọ okpukpe ndị Juu a kọwakwuru ụdị iyi mmadụ kwesịrị imezu na nke ọ na-agaghị emezu.

Ọ bụghị naanị Jizọs kwuru na ihe a ndị Juu na-eme adịghị mma. Dị ka ihe atụ, otu onye Juu na-ede akụkọ ihe mere n’oge ochie aha ya bụ Fleviọs Josifọs kwuru na e nwere otu òtù ndị Juu na-anaghị aṅụ iyi. Ndị òtù a kwuru na ịṅụ iyi ka ịgha ụgha njọ. Ha chere na onye na-aṅụ iyi ka ndị ọzọ kweta n’ihe ọ na-ekwu bụ onye ụgha. Akwụkwọ apọkrịfa ndị Juu a na-akpọ Wisdom of Sirach, ma ọ bụ Ecclesiasticus, (23:11) kwukwara otu ihe ahụ. O kwuru, sị: “Onye na-aṅụkarị iyi abụghị ezigbo mmadụ.” Jizọs kwuziri na ịṅụ iyi n’ihe ndị na-adịghị mkpa, adịghị mma. Ọ bụrụ na anyị ana-ekwu eziokwu mgbe niile, anyị ekwesịghị ịṅụ iyi iji mee ka ndị mmadụ kweta na ihe anyị na-ekwu bụ eziokwu.