Gbanwee otú ọ ga-esi egosi

Họrọ asụsụ

Gaa na menu nke abụọ

Gaa n'ebe e dere isiokwu ndị dị na ya

Gaa n'Isiokwu

Ndịàmà Jehova

Igbo

Baịbụl nke Dị n'Ịntanet

BAỊBỤL NSỌ—NSỤGHARỊ ỤWA ỌHỤRỤ NKE AKWỤKWỌ NSỌ

Ọpụpụ 14:1-31

14  Jehova wee gwa Mozis, sị:  “Gwa ụmụ Izrel ka ha laghachi azụ maa ụlọikwuu n’ihu Paịhahaịrọt n’agbata Migdọl na oké osimiri nke chere Bel-zifọn ihu.+ N’ihu ya ka unu ga-ama ụlọikwuu n’akụkụ oké osimiri ahụ.  Mgbe ahụ Fero ga-ekwu banyere ụmụ Izrel, sị, ‘Ha nọ ná mgbagwoju anya wee na-awagharị n’ala a. Ala ịkpa agbachibidowo ha.’+  Ya mere, m ga-ekwe n’ezie ka obi Fero kpọchie,+ ọ ga-achụwakwa ha, m ga-enwetara onwe m otuto site n’imeri Fero na ìgwè ndị agha ya niile;+ ndị Ijipt ga-amara na mụ onwe m bụ Jehova.”+ Ha wee mee nnọọ otú ahụ.  E mesịa, a kọọrọ eze Ijipt na ndị Izrel agbaala ọsọ. Ozugbo ahụ, obi Fero na ndị na-ejere ya ozi gbanwere n’ebe ndị Izrel nọ,+ nke mere na ha sịrị: “Gịnị bụ ihe a anyị meworo, nke na anyị hapụrụ Izrel ka ha laa wee kwụsị ịgbara anyị ohu?”+  O wee kwadebe ụgbọ ịnyịnya agha ya, ọ kpọkwaara ndị ya.+  O wee were narị ụgbọ ịnyịnya isii a họrọ ahọ na ụgbọ ịnyịnya+ niile ndị ọzọ nke Ijipt, kpọrọkwa ndị dike ka ha nọkwasị na nke ọ bụla n’ime ha.  Jehova wee si otú ahụ kwe ka obi Fero eze Ijipt kpọchie,+ o wee chụwa ụmụ Izrel, ka ụmụ Izrel weliri aka ha elu+ na-apụ.  Ndị Ijipt wee chụwa ha, ụgbọ ịnyịnya niile nke Fero na ndị agha ịnyịnya+ ya na ìgwè ndị agha ya wee chụkwute ha n’ebe ha mara ụlọikwuu n’akụkụ oké osimiri ahụ, n’akụkụ Paịhahaịrọt nke chere Bel-zifọn ihu.+ 10  Mgbe Fero rutere nso, ụmụ Izrel malitere ilepụ anya, ma, lee, ndị Ijipt na-abịa n’azụ ha; ụmụ Izrel wee tụọ nnọọ egwu ma malite itiku Jehova.+ 11  Ha wee gwa Mozis, sị: “Ọ̀ bụ maka na e nweghị ebe ili ozu ma ọlị n’Ijipt ka i ji kpọta anyị n’ebe a ka anyị nwụọ n’ala ịkpa?+ Gịnị bụ ihe a i mere anyị site n’ịkpọpụta anyị n’Ijipt? 12  Ọ́ bụghị ihe a ka anyị gwara gị n’Ijipt, sị, ‘Hapụ anyị, ka anyị jewere ndị Ijipt ozi’? N’ihi na ọ kara anyị mma ijere ndị Ijipt ozi kama ịnwụ n’ala ịkpa.”+ 13  Mozis wee sị ndị Izrel: “Unu atụla egwu.+ Guzosienụ ike hụ nzọpụta Jehova, nke ọ ga-azọpụta unu taa.+ N’ihi na ndị Ijipt a unu na-ahụ taa, unu agaghị ahụ ha ọzọ, ee e, ọ dịghị mgbe unu ga-ahụ ha ọzọ.+ 14  Jehova n’onwe ya ga-eburu unu agha,+ unu onwe unu ga-agba nkịtị.” 15  Jehova wee gwa Mozis, sị: “Gịnị mere i ji na-etiku m?+ Gwa ụmụ Izrel ka ha kwalie. 16  Ma gị onwe gị, welie mkpara gị+ ma setịa aka gị n’elu oké osimiri mee ka o kewaa,+ ka ụmụ Izrel wee gabiga n’etiti oké osimiri, n’ala akọrọ.+ 17  Ma mụ onwe m, lee, m ga-ekwe ka obi ndị Ijipt kpọchie,+ ka ha wee chụrụ ha banye ka m wee nwetara onwe m otuto site n’imeri Fero na ìgwè ndị agha ya niile, ụgbọ ịnyịnya agha ya na ndị agha ịnyịnya ya.+ 18  Ndị Ijipt ga-amara na mụ onwe m bụ Jehova mgbe m ga-enwetara onwe m otuto site n’imeri Fero, ụgbọ ịnyịnya agha ya na ndị agha ịnyịnya ya.”+ 19  Mmụọ ozi+ nke ezi Chineke, bụ́ onye na-ebutere ndị Izrel ụzọ, pụrụ gaa n’azụ ha, ogidi ígwé ojii ahụ sikwa n’ihu ha pụọ wee guzoro n’azụ ha.+ 20  O wee bịa dịrị n’agbata ndị agha ndị Ijipt na ndị Izrel.+ N’otu aka, ọ ghọrọ ígwé ojii na ọchịchịrị. N’aka nke ọzọ, ọ nọ na-enye ìhè n’abalị.+ Otu ìgwè abịarughị ìgwè nke ọzọ nso n’abalị ahụ dum. 21  Mozis wee setịa aka ya n’elu oké osimiri ahụ;+ Jehova wee malite iji oké ifufe siri ike nke si n’ebe ọwụwa anyanwụ mee ka oké osimiri ahụ laghachi azụ n’abalị ahụ dum, meekwa ka ala oké osimiri ahụ ghọọ ala akọrọ,+ mmiri ahụ wee na-ekewa.+ 22  E mesịa, ụmụ Izrel gafere n’etiti oké osimiri ahụ, n’ala akọrọ,+ ka mmiri ahụ bụụrụ ha mgbidi n’aka nri ha nakwa n’aka ekpe ha.+ 23  Ndị Ijipt wee chụwa ha, ịnyịnya niile nke Fero, ụgbọ ịnyịnya agha ya na ndị agha ịnyịnya ya wee chụrụ ha+ banye n’etiti oké osimiri ahụ. 24  O wee ruo n’oge nche ụtụtụ na Jehova si n’ogidi ọkụ na nke ígwé ojii+ ahụ lepụ anya lee ndị agha Ijipt, o wee tinye ndị agha Ijipt n’ọgba aghara.+ 25  O wee na-ahịọpụsị ụkwụ ụgbọ ịnyịnya ha nke mere na ọ nọ na-esiri ha ike ịgba ya;+ ndị Ijipt wee malite ikwu, sị: “Ka anyị si n’ebe ndị Izrel nọ gbapụ, n’ihi na Jehova na-alụso ndị Ijipt ọgụ n’ihi ha.”+ 26  N’ikpeazụ, Jehova gwara Mozis, sị: “Setịa aka gị n’elu oké osimiri a,+ ka mmiri ya laghachite rikpuo ndị Ijipt, ụgbọ ịnyịnya agha ha na ndị agha ịnyịnya ha.” 27  Ozugbo ahụ, Mozis setịrị aka ya n’elu oké osimiri ahụ, oké osimiri ahụ wee malite ịlọghachi n’ọnọdụ ya n’isi ụtụtụ. Ka nke a na-eme, ndị Ijipt nọ na-agbapụ ka ọ ghara izute ha, ma Jehova tụbara ndị Ijipt n’etiti oké osimiri ahụ.+ 28  Mmiri ahụ wee na-alọghachi.+ N’ikpeazụ, o kpuchiri ụgbọ ịnyịnya agha ndị ahụ na ndị agha ịnyịnya nke ìgwè ndị agha niile nke Fero bụ́ ndị chụụrụ ha banye n’oké osimiri ahụ.+ Ọbụna otu n’ime ha afọdụghị.+ 29  Ma ụmụ Izrel jere ije n’ala akọrọ n’etiti ala oké osimiri ahụ,+ mmiri ahụ bụụrụ ha mgbidi n’aka nri ha nakwa n’aka ekpe ha.+ 30  Otú a ka Jehova si zọpụta Izrel n’aka ndị Ijipt n’ụbọchị ahụ,+ Izrel wee hụ ka ndị Ijipt nwụrụ n’ụsọ oké osimiri ahụ.+ 31  Izrel hụkwara aka dị ike nke Jehova ji mee ihe megide ndị Ijipt; ndị Izrel wee malite ịtụ egwu Jehova na inwe okwukwe n’ebe Jehova nọ nakwa n’ebe Mozis ohu ya nọ.+

Ihe E Dere n'Ala Ala Peeji