Gaa n'Isiokwu

Gaa na menu nke abụọ

Gaa n'ebe e dere isiokwu ndị dị na ya

Ndịàmà Jehova

Igbo

Unu Ga-enweli Obi Ụtọ n’Ezinụlọ Unu

 ISIOKWU NKE 8

Mgbe Nsogbu Batara n’Ezinụlọ

Mgbe Nsogbu Batara n’Ezinụlọ

‘Unu na-aṅụrị ọṅụ nke ukwuu, ọ bụ ezie na e mewo ka unu nwee mwute site n’ọnwụnwa dị iche iche.’—1 Pita 1:6

N’agbanyeghị na ị na-agbalịsi ike ka gị na di gị ma ọ bụ nwunye gị na-enwe obi ụtọ n’ezinụlọ unu, ihe unu na-atụghị anya ya nwere ike ime ka unu ghara ịna-enwezi obi ụtọ. (Ekliziastis 9:11) Chineke na-enyere anyị aka ma nsogbu bịara anyị n’ihi na ọ hụrụ anyị n’anya. Ọ bụrụ na gị na di gị ma ọ bụ nwunye gị emee ihe ndị e kwuru n’isiokwu a, unu na ndị ezinụlọ unu ga-enwe ike idi ụdị nsogbu ọ bụla bịaara unu.

 1 TỤKWASỊ JEHOVA OBI

IHE BAỊBỤL KWURU: ‘Tụkwasị ya nchegbu gị niile, n’ihi na ihe banyere gị na-emetụ ya n’obi.’ (1 Pita 5:7) Echefula na nsogbu ọ bụla bịaara gị esighị Chineke n’aka. (Jems 1:13) Ọ bụrụ na ị bịaruo Jehova nso, ọ ga-enyere gị aka idi nsogbu ndị ị na-enwe. (Aịzaya 41:10) Baịbụl gbara anyị ume ka anyị gwa ya ihe ọ bụla na-enye anyị nsogbu n’obi.—Abụ Ọma 62:8.

Ịgụ Baịbụl kwa ụbọchị bụ ihe ọzọ ga-enyere gị aka. Jehova na-eji ihe anyị gụtara akasi “anyị obi ná mkpagbu anyị niile.” (2 Ndị Kọrịnt 1: 3, 4; Ndị Rom 15:4) O kwere anyị nkwa na ya ga-eme ka anyị nwee udo “nke karịrị echiche niile.”—Ndị Filipaị 4:6, 7, 13.

IHE I NWERE IKE IME:

  • Rịọ Jehova ka o mee ka isi jụọ gị oyi ka i nwee ike iche echiche nke ọma

  • Ihe niile i chetara i nwere ike ime ma nsogbu bịara gị, chebara ha echiche. Si n’ime ha họrọ nke ga-akacha abara gị uru

2 LEKỌTA ONWE GỊ, LEKỌTAKWA NDỊ EZINỤLỌ GỊ

IHE BAỊBỤL KWURU: “Obi onye nwere nghọta na-enweta ihe ọmụma, ntị ndị maara ihe na-achọkwa ihe ọmụma.” (Ilu 18:15) Chọpụta ihe kpatara nsogbu ahụ. Chọpụtakwa otú ị ga-esi enyere ndị ezinụlọ unu aka. Gị na ha na-ekwurịta ihe ụfọdụ, geekwa ha ntị ma ha kwuwe otú obi dị ha.—Ilu 20:5.

Gịnị ka ị ga-eme ma onye nke gị nwụọ? Echekwala na iru uju adịghị mma. Cheta na e nwere mgbe “anya mmiri gbara Jizọs.” (Jọn 11:35; Ekliziastis 3:4) Mgbe ọ bụla nsogbu bịaara anyị, izu ike na ihi ụra nke ọma ga-enyere anyị aka. (Ekliziastis 3:6) Ime otú a ga-eme ka ọ dịrị anyị mfe idi nsogbu bịara anyị.

IHE I NWERE IKE IME:

  • Tupu nsogbu abịa, gbaa mbọ ka gị na ndị ezinụlọ gị na-ekwurịta okwu mgbe niile. Nsogbu bịazie, ọ gaghị esiri onye ọ bụla ike ịgwa ibe ya okwu

  • Gakwuru ndị nwetụrụla ụdị nsogbu ahụ ka ha nyere gị aka

 3 ỤMỤNNA GỊ GA-ENYERE GỊ AKA

IHE BAỊBỤL KWURU: “Ezi enyi nwere ịhụnanya mgbe niile, ọ bụkwa nwanne a mụrụ maka oge nsogbu.” (Ilu 17:17) Ndị enyi gị nwere ike chọọ inyere gị aka ma ha agaghị ama ihe ha ga-eme. N’ihi ya, mee ka ha mara ihe bụ́ mkpa gị. (Ilu 12:25) Ihe ọzọ i nwere ike ime bụ ịgakwuru ndị ma Baịbụl nke ọma ka ha nyere gị aka. Ihe ha ga-agwa gị nwere ike inyere gị aka idi nsogbu gị.—Jems 5:14.

Ọ bụrụ na gị na ndị nwere okwukwe na Chineke na ndị tụkwasịrị obi ná nkwa ya niile ana-akpa, ha ga-enyere gị aka mgbe nsogbu ọ bụla bịaara gị. Ọ bụrụkwa na ị na-enyere ndị ọzọ nọ ná nsogbu aka ma na-agwa ha banyere nkwa dị iche iche Jehova kwere, ọ ga-eme ka obi sikwuo gị ike, meekwa ka obi ruo gị ala. Anọkwala nkịtị, na-enyere ndị ọzọ nọ ná mkpa aka. Nọrọkwa ndị hụrụ gị n’anya nso.—Ilu 18:1; 1 Ndị Kọrịnt 15:58.

IHE I NWERE IKE IME:

  • Gwa ezigbo enyi gị ihe gị na ya na-alụ ka o nyere gị aka

  • Kpọọrọ ya okwu aha. Ezorola ya ihe ọ bụla ezo

GỤKWUO GBASARA YA

TETA!

Ihe Ị Ga-eme ma Nwa Gị Jụọ Gị Ajụjụ Gbasara Ọnwụ

Gụọ gbasara ihe anọ ga-enyere gị aka ịza ajụjụ ụmụ gị nwere ike ịjụ gị gbasara onye unu nwụrụ anwụ nakwa ihe ga-enyere ha aka idi ọnwụ ya.

OZI ỌMA SI N’AKA CHINEKE!

Gịnị Mere Chineke Ji Kwe Ka Ihe Ọjọọ na Ahụhụ Dịrị?

Olee otú ihe ọjọọ si malite, gịnị mere Chineke ji gbachi nkịtị ka ụmụ mmadụ na-ata ahụhụ ruo ugbu a? È nwere mgbe ahụhụ ga-akwụsị?