Gaa n'Isiokwu

Gaa na menu nke abụọ

Gaa n'ebe e dere isiokwu ndị dị na ya

Ndịàmà Jehova

Igbo

Kụziere Ụmụ Gị Ihe

 ISI NKE 12

Nwa Nwanne Pọl Atụghị Ụjọ

Nwa Nwanne Pọl Atụghị Ụjọ

Ka anyị gụọ banyere nwa okorobịa mere ka a ghara igbu nwanne mama ya. Baịbụl ekwughị aha ya, ma ihe o mere gosiri na ụjọ atụghị ya. Ọ bụ Pọl onyeozi bụ nwanne mama nwa okorobịa a. Ị̀ ga-achọ ịma ihe nwa okorobịa a mere?—

A tụrụ Pọl mkpọrọ na Jeruselem. Ihe mere e ji tụọ ya mkpọrọ bụ na ọ na-ekwusa ozi ọma banyere Jizọs. Ụfọdụ ndị kpọrọ Pọl asị, ha wee kwuo otú ha ga-esi egbu ya. Ha sịrị: ‘Anyị ga-agakwuru onyeisi ndị soja gwa ya ka o dunye Pọl onye soja ga-akpọ ya aga ụlọikpe. Anyị ga-agazi chere ha n’ụzọ, Pọl gafetewe, anyị egbuo ya.’

Nwa nwanne Pọl gwara ma Pọl ma onyeisi ndị soja na e nwere ndị chọrọ igbu Pọl

Nwa nwanne Pọl nụrụ ihe a ha kwuru. Gịnị ka o mere? Ọ gara n’ụlọ mkpọrọ, gwa Pọl ihe ahụ ọ nụrụ. Pọl gwara ya ka ọ gaa gwa ya onyeisi ndị soja ozugbo. Ì chere na ọ dịịrị ya mfe ịgwa ya onyeisi ndị soja?— Mba. Onyeisi ndị soja ahụ abụghị obere mmadụ. Ma, ụjọ atụghị nwa nwanne Pọl ịga gwa ya ihe ọ nụrụ.

Onyeisi ndị soja ma ihe ọ ga-eme ka ha ghara igbu Pọl. Ọ kpọtara ndị soja dị ihe dị ka narị ise ka ha chebe Pọl. Ọ gwara ha ka ha duru Pọl gaa Sesaria n’abalị ahụ. È mechara gbuo Pọl?— Mba. Ndị ahụ chọrọ igbu ya enweghịzi ike imetụ ya aka. Ha enweghịzi ike ime Pọl onyeozi ihe ha chọrọ ime ya.

Gịnị ka ị mụtara n’akụkọ a?— Nwa nwanne Pọl atụghị onyeisi ndị soja ahụ ụjọ. Gịnwa nwekwara ike ime ka ya. Anyị ekwesịghị ịna-atụ ụjọ mgbe anyị na-agwa ndị mmadụ banyere Jehova. Obi ọ̀ ga-esi gị ike ịna-agwa ndị mmadụ banyere Jehova?— Ọ bụrụ na ị tụghị ụjọ, i nwere ike inyere mmadụ aka ka ọ dị ndụ.

GỤỌ EBE NDỊ A NA BAỊBỤL GỊ