Gbanwee otú ọ ga-esi egosi

Họrọ asụsụ

Gaa na menu nke abụọ

Gaa n'ebe e dere isiokwu ndị dị na ya

Gaa n'Isiokwu

Ndịàmà Jehova

Igbo

Jizọs Bụ Ụzọ, Eziokwu, na Ndụ

 ISI NKE 62

Jizọs Akụzie Gbasara Ịdị Umeala n’Obi

Jizọs Akụzie Gbasara Ịdị Umeala n’Obi

MATIU 17:22–18:5 MAK 9:30-37 LUK 9:43-48

  • JIZỌS EKWUGHACHIKWA GBASARA ỌNWỤ YA

  • JIZỌS EJIRI EGO SI N’ỌNỤ AZỤ̀ TỤỌ ỤTỤ ISI YA

  • ÒNYE GA-ABỤ ONYE KACHA UKWUU N’ALAEZE ELUIGWE?

Mgbe Jizọs nwoghachara, si n’elu ugwu rịdata ma gwọọ nwata nwoke ahụ mmụọ ọjọọ ji na Sesaria Filipaị, ya na ndị na-eso ụzọ ya gawaziri Kapaniọm. Naanị ya na ha so na-aga n’ihi na ọ chọghị ka ndị mmadụ “mara banyere” ebe ọ na-aga. (Mak 9:30) Ihe mere o ji mee ihe a bụ ka o nwekwuo ohere ọ ga-eji kwadebe ndị na-eso ụzọ ya maka ọnwụ ya, kwadebekwa ha maka ọrụ ha na-aga ịrụ. Ọ gwara ha, sị: “A kawo ya aka na a ga-arara Nwa nke mmadụ nye n’aka ndị mmadụ, ha ga-egbu ya, a ga-akpọlitekwa ya n’ụbọchị nke atọ.”—Matiu 17:22, 23.

Nke a abụghị nke mbụ ọ na-agwa ndị na-eso ụzọ ya banyere ọnwụ ya. Ọ gwabuola ha na a ga-egbu ya, ọ bụ eziokwu na Pita ekwetaghị na ụdị ihe ahụ ga-eme ya. (Matiu 16:21, 22) Mmadụ atọ n’ime ndịozi ya hụkwara mgbe o nwoghara, nụkwa mgbe e kwuru banyere “ọlịla” ya. (Luk 9:31) Ndị na-eso ụzọ Jizọs “nwere mwute dị nnọọ ukwuu” n’ihi ihe a Jizọs na-agwa ha n’agbanyeghị na ha aghọtachabeghị ihe ihe ọ na-ekwu pụtara. (Matiu 17:23) Ma, ụjọ ji ha ịgwa ya ka ọ kọwakwuoro ha ihe ọ na-ekwu.

Obere oge, ha rutere Kapaniọm. Ọ bụ na Kapaniọm ka Jizọs na-anọkarị, ọ bụkwa ebe ahụ ka ọtụtụ ndịozi ya si. Ndị na-ana ụtụ isi maka ụlọ nsọ bịakwutere Pita, jụwa ya, sị: “Ọ̀ bụ na onye ozizi unu adịghị atụ ụtụ mkpụrụ ego drakma abụọ ahụ?” Ọ ga-abụ na ha na-achọ ibo Jizọs ebubo na ọ naghị atụ ụtụ isi.—Matiu 17:24.

Pita zara ha “Ee.” Ma tupu Pita alọta, Jizọs amatala ihe merenụ. Mgbe Pita batara n’ime ụlọ, Jizọs jụrụ ya gbasara ihe ahụ merenụ tupudị ya ekwuo ya. Ọ jụrụ ya, sị: “Saịmọn, gịnị ka i chere? Ọ̀ bụ n’aka ole ndị ka ndị eze nke ụwa na-anata ụtụ ahịa ma ọ bụ ụtụ isi? Ọ̀ bụ n’aka ụmụ ha ka ọ̀ bụ n’aka ndị bịara abịa?” Pita zara ya, sị: “Ọ bụ n’aka ndị bịara abịa.” Jizọs sịziri ya: “Ya mere, n’ezie, ụmụ ha anaghị atụ ụtụ.”—Matiu 17:25, 26.

Nna Jizọs bụ Eze nke eluigwe na ala, ọ bụkwa Ya ka a na-efe n’ụlọ nsọ ahụ. N’ihi ya, iwu ejighị Jizọs ịtụ ụtụ isi maka ụlọ nsọ. Ma, Jizọs gwara Pita, sị: “Ka anyị wee ghara ime ka ha sụọ ngọngọ, gaa n’oké osimiri, tụnye nko azụ̀, werekwa azụ̀ mbụ i gbutere. Mgbe i meghere ọnụ ya, ị ga-ahụ otu mkpụrụ ego steta. Were ya nye ha maka mụ na gị.”—Matiu 17:27.

Obere oge, ndị na-eso ụzọ ya bịakwutere ya jụwa ya banyere onye ga-abụ onye kacha ukwuu n’alaeze eluigwe. Ụjọ jibu ndị na-eso ụzọ ya a ịjụ ya gbasara ọnwụ ọ na-aga ịnwụ, ma ugbu a, ụjọ atụghị ha ịjụ ya gbasara otú ihe ga-adịrị hanwa n’ọdịnihu. Ma, Jizọs ma ihe mere ha ji na-ajụ ajụjụ a. Ihe mere ha ji na-ajụ ya bụ maka ihe ha nọ n’azụ na-arụrịta ka ha na Jizọs nọ n’ụzọ na-aga Kapaniọm. Jizọs jụrụ ha, sị: “Gịnị ka unu na-arụ ụka ya n’okporo ụzọ?” (Mak 9:33) Ha gbachiri nkịtị n’ihi na ha nọ na-arụrịta ụka gbasara onye kacha ukwuu. N’ikpeazụ, ndịozi ahụ jụziri Jizọs, sị: “Ònye n’ezie bụ onye kasị ukwuu n’alaeze eluigwe?”—Matiu 18:1.

Ọ dị ịtụnanya na ndị na-eso ụzọ Jizọs na-arụrịta ụka banyere onye kacha ukwuu n’agbanyeghị na Jizọs akụzierela ha ihe ihe fọrọ obere ka ọ bụrụ afọ atọ. Ma, anyị ma na ha ezughị okè. Ha tokwara n’ebe ndị okpukpe na-azọ onye ka ibe ya ukwuu. Ihe ọzọ bụkwa na o tebeghị aka Jizọs gwara Pita na ya ga-enye ya “mkpịsị ugodi” nke Alaeze. Ihe a Jizọs gwara ya nwere ike ime ka o chewe na ọ ka ndị ọzọ. Jems na Jọn nwekwara ike ichewe na ha ka ndị ọzọ ebe ha hụrụ mgbe Jizọs nwoghara.

N’agbanyeghị ihe ọ bụ ya mere ha ji na-achọ ịma onye kacha ukwuu, Jizọs kụziiri ha otú ha kwesịrị isi na-ele onwe ha anya. Ọ kpọtara otu nwatakịrị, guzo ya n’etiti ha, ma gwa ha, sị: “Ọ bụrụ na unu echigharịghị wee dịrị ka ụmụntakịrị, unu agaghị aba n’alaeze eluigwe ma ọlị. Ya mere, onye ọ bụla nke ga-eweda onwe ya ala dị ka nwatakịrị a bụ onye kasị ukwuu n’alaeze eluigwe; onye ọ bụla nke na-anabata nwatakịrị dị otú a n’aha m na-anabatakwa m.”—Matiu 18:3-5.

O nweghị ihe dị ka otú a Jizọs si kụziere ha ịdị umeala n’obi. Jizọs ejighị maka ihe ahụ ndị na-eso ụzọ ya mere wewe iwe ma kpọwa ha ndị anyaukwu ma ọ bụ ndị oké ọchịchọ. Kama, o ji obere nwa kụziere ha ihe. Ụmụaka anaghị anọ n’ọkwá ukwu ma ọ bụ bụrụ ndị a ma ama. Jizọs si otú ahụ mee ka ndị na-eso ụzọ ya mata na ha kwesịrị iwere onwe ha ka ndị dị ala. Jizọs gwaziri ha, sị: “Onye na-eme onwe ya dị ka onye ka nta n’etiti unu niile bụ onye dị ukwuu.”—Luk 9:48.