Gaa n'Isiokwu

Gaa na menu nke abụọ

Gaa n'ebe e dere isiokwu ndị dị na ya

Ndịàmà Jehova

Igbo

Akwụkwọ M nke Akụkọ Bible

Akụkọ nke 84: Otu Mmụọ Ozi Eleta Meri

Akụkọ nke 84: Otu Mmụọ Ozi Eleta Meri

NWANYỊ ọma a bụ Meri. Ọ bụ nwaanyị Izrel, nke bi n’obodo Nazaret. Chineke maara na ọ bụ ezigbo mmadụ. Ọ bụ ya mere o ji zite mmụọ ozi ya bụ́ Gebriel ịgwa ya okwu. Ị̀ ma ihe Gebriel bịara ịgwa Meri? Ka anyị lee.

Gebriel sịrị ya: ‘Ekelee m gị, onye nwere amara hie nne. Jehova nọnyeere gị.’ Meri ahụtụbeghị onye a mbụ. Meri nwere nchegbu n’ihi na ọ maghị ihe Gebriel na-ekwu. Ma Gebriel mere ka obi ruo ya ala ozugbo ahụ.

Meri

‘Meri, atụla egwu,’ ka ọ gwara ya. ‘Omume gị dị Jehova ezi mma. Ọ bụ ya mere ọ na-aga imere gị otu ihe dị ebube. Ị ga-amụ nwa n’isi nso. Ị ga-akpọkwa ya Jizọs.’

Gebriel gara n’ihu ịkọwa, sị: ‘Nwata ahụ ga-abụ onye ukwu, a ga-akpọkwa ya Ọkpara nke Chineke Kasị Ihe Niile Elu. Jehova ga-eme ya eze, dị ka e mere Devid. Ma Jizọs ga-abụ eze ruo mgbe ebighị ebi, alaeze ya agaghịkwa akwụsị akwụsị!’

‘Olee otú nke a pụrụ isi mee?’ ka Meri jụrụ. ‘Alụbeghịdị m di. Mụ na nwoke ebibeghịkwa, olee otú m ga-esi mụọ nwa?’

Gebriel wee zaa ya, sị: ‘Ike nke Chineke ga-abịakwasị gị. A ga-akpọkwa nwata ahụ Ọkpara Chineke.’ O wee sị Meri: ‘Cheta Elizabet onye ikwu gị. Ndị mmadụ sịrị na o meela agadi nke ukwuu, na ọ gaghịzi amụta nwa. Ma, ọ ga-amụ nwa n’oge na-adịghị anya. Ị̀ hụlanụ na ọ dịghị ihe karịrị Chineke ime.’

N’egbughị oge, Meri sịrị ya: ‘Abụ m ohu nke Jehova! Ya dịrị m dị ka i kwuru.’ Mmụọ ozi ahụ wee laa.

Meri jere ngwa ngwa ileta Elizabet. Mgbe Elizabet nụrụ olu Meri, nwa nọ n’afọ Elizabet wụliri elu n’ọṅụ. Mmụọ Chineke jupụtara Elizabet n’ahụ́, o wee gwa Meri, sị: ‘I nwere ngọzi dị iche n’etiti ndị inyom.’ Meri nọnyeere Elizabet ruo ihe dị ka ọnwa atọ, o wee laghachi Nazaret bụ́ ebe o bi.

Meri na-aga ịlụ otu nwoke aha ya bụ Josef. Ma mgbe Josef matara na Meri na-aga ịmụ nwa, o cheghị na ya kwesịrị ịlụ ya. Mgbe ahụ ka mmụọ ozi Chineke sịrị ya: ‘Atụla egwu ịkpọrọ Meri ka ọ bụrụ nwunye gị. N’ihi na ọ bụ Chineke nyere ya nwa nwoke.’ Ya mere, Meri na Josef lụrụ di na nwunye, ha wee na-eche ka a mụọ Jizọs.

Luk 1:26-56; Matiu 1:18-25.



Ajụjụ

  • Ònye bụ nwaanyị a nọ na foto a?
  • Gịnị ka Gebriel gwara Meri?
  • Olee otú Gebriel si kọwaara Meri na ọ ga-amụ nwa n’agbanyeghị na ọ lụbeghị di?
  • Gịnị mere mgbe Meri gara ileta onye ikwu ya bụ́ Elizabet?
  • Gịnị ka Josef chere n’echiche mgbe ọ matara na Meri dị ime, ma gịnị mere o ji gbanwee obi ya?

Ajụjụ ndị ọzọ

  • Gụọ Luk 1:26-56.

    Gịnị ka Luk 1:35 na-egosi banyere ezughị okè ọ bụla dị n’àkwá dị n’akpa nwa Meri mgbe e si n’ógbè ndị bụ́ mmụọ bufee ndụ nke Ọkpara Chineke n’akpa nwa Meri? (Hag. 2:11-13; Jọn 6:69; Hib. 7:26; 10:5)

    Olee otú Jizọs si bụrụ onye a sọpụụrụ ọbụna tupu a mụọ ya? (Luk 1:41-43)

    Ihe nlereanya ọma dị aṅaa ka Meri setịpụụrụ Ndị Kraịst nwetara ihe ùgwù ije ozi pụrụ iche taa? (Luk 1:38, 46-49; 17:10; Ilu 11:2)

  • Gụọ Matiu 1:18-25.

    N’agbanyeghị na e nyeghị Jizọs aha ahụ bụ́ Ịmanuel, olee otú ihe o mere mgbe ọ bụ mmadụ si mezuo ihe aha ahụ pụtara? (Mat. 1:22, 23; Jọn 14:8-10; Hib. 1:1-3)

GỤKWUO GBASARA YA

JIZỌS BỤ ỤZỌ, EZIOKWU, NA NDỤ

Ozi Abụọ Sí n’Aka Chineke

Mmụọ ozi Gebriel ezite ozi ndị siri ike nkweta.

KAADỊ AKỤKỌ NDỊ DỊ NA BAỊBỤL

Kaadị Akụkọ Meri

Gụọ ihe a ka ị mata ebe Meri ku Jizọs gaa mgbe ọ mụchara Jizọs abalị iri anọ agaa. Bipụta kaadị akụkọ Baịbụl a, chakapụta ya ma dozie ya.

ṄOMIE OKWUKWE HA

Meri—“Lee! Abụ M Nwa Agbọghọ Bụ́ Ohu Jehova!”

Olee otú ihe Meri gwara mmụọ ozi Gebriel si gosi na o nwere okwukwe? Olee àgwà ndị ọzọ Meri kpara?