Gaa n'Isiokwu

Gaa na menu nke abụọ

Gaa n'ebe e dere isiokwu ndị dị na ya

Ndịàmà Jehova

Igbo

Akwụkwọ M nke Akụkọ Bible

Akụkọ nke 69: Otu Nwa Agbọghọ Nta Enyere Otu Dike Aka

Akụkọ nke 69: Otu Nwa Agbọghọ Nta Enyere Otu Dike Aka

Ị̀ MA ihe nwa agbọghọ nta a na-ekwu? Ọ na-akọrọ nwaanyị a banyere Ilaịsha onye amụma Jehova, na ihe ndị dị ebube Jehova na-enyere ya aka ime. Nwaanyị a amaghị ihe ọ bụla banyere Jehova n’ihi na ọ bụghị onye Izrel. Ngwa, ka anyị hụ ihe mere nwata a ji nọrọ n’ụlọ nwaanyị a.

Nwaanyị a bụ onye Siria. Aha di ya bụ Neeman, onyeisi ụsụụ ndị agha Siria. Ndị Siria jidere nwata nwaanyị Izrel a wee dutere ya nwunye Neeman ka ọ bụrụ odibo ya.

Nwunye Neeman na odibo ya nwaanyị

Neeman na-arịa otu ajọ ọrịa a na-akpọ ekpenta. Ọrịa a pụrụ ọbụna ime ka anụ ahụ́ mmadụ na-adakapụsị. Lee ihe nwa agbọghọ nta a na-agwa nwunye Neeman: ‘Ọ na-agụ m ka onyenwe m jekwuru onye amụma Jehova n’Izrel. Ọ ga-agwọ ya ekpenta ya.’ Mgbe e mesịrị, a gwara di nwaanyị a ihe nwa agbọghọ nta a kwuru.

Neeman chọrọ nnọọ ka a gwọọ ya, n’ihi ya, o kpebiri ịga Izrel. Mgbe o ruru ebe ahụ, ọ gara n‘ụlọ Ilaịsha. Ilaịsha zigara ohu ya ka ọ gwa Neeman ka ọ gaa saa ahụ́ ugboro asaa n’ime Osimiri Jọdan. Nke a kpasuru Neeman iwe nke ukwuu, o wee sị: ‘Osimiri ala m dị mma karịa osimiri ọ bụla dị n’Izrel!’ Mgbe Neeman kwusịrị nke a, ya alawa.

Ma ndị ohu ya gwara ya, sị: ‘Onyenwe anyị, ọ bụrụ na Ilaịsha sịrị gị mee ihe dị ike, ị ga-eme ya. Oleekwanụ ihe mere na ị gaghị asa ahụ́ nkịtị, dị ka o kwuru?’ Neeman gere ndị ohu ya ntị wee danye ugboro asaa n’ime Osimiri Jọdan. Mgbe o mesịrị nke a, anụ ahụ́ ya wee dị mma, ahụ́ agbasiekwa ya ike!

Obi tọrọ Neeman ezigbo ụtọ. O wee jekwuru Ilaịsha, sị ya: ‘Ugbu a ka m maara na Chineke nke Izrel bụ naanị ezi Chineke dị n’ụwa niile. Biko nara m onyinye nke a.’ Ma Ilaịsha zara ya, sị: ‘Mba, agaghị m anara ya.’ Ilaịsha maara na ọ gaghị ezi ezi ma ọ bụrụ na ya anara onyinye ahụ n’ihi na ọ bụ Jehova gwọrọ Neeman. Ma Gehezaị, bụ́ ohu Ilaịsha, chọrọ onyinye ahụ.

N’ihi ya, leenụ ihe Gehezaị mere. Mgbe Neeman lawara, Gehezaị chụkwuuru ya wee sị ya: ‘Ilaịsha sịrị m gwa gị na ya chọrọ ka i nye ya ụfọdụ n’ime onyinye gị ahụ ka o were lee ndị enyi ya bịara ileta ya ọbịa.’ N’ezie, nke a bụ ụgha. Ma Neeman amaghị na ọ bụ ụgha; o wee nye Gehezaị ihe ụfọdụ.

Mgbe Gehezaị laruru ụlọ, Ilaịsha amaralarị ihe o mere. Jehova agwawo ya. Ya mere, Ilaịsha gwara ya, sị: ‘N’ihi ihe ọjọọ nke a i mere, ekpenta Neeman ga-abịakwasị gị.’ Nke ahụ mere, n’egbughị oge!

Gịnị ka anyị pụrụ ịmụta n’ihe a niile? Nke mbụ, anyị ga-adị ka nwata nwaanyị ahụ ma na-ekwu banyere Jehova. Ọ pụrụ ịrụpụta ihe ọma dị ukwuu. Nke abụọ, anyị ekwesịghị ịdị mpako otú Neeman dị na mbụ, kama nke ahụ, anyị kwesịrị ịdị na-erubere ndị ohu Chineke isi. Nke atọ kwa, anyị ekwesịghị ịdị na-agha ụgha dị ka Gehezaị ghara. Ọ̀ bụ anyị apụghị ịmụta ọtụtụ ihe site n’ịgụ Bible?

2 Ndị Eze 5:1-27.



Ajụjụ

  • Gịnị ka nwa agbọghọ nta a na-agwa nwaanyị a na foto a?
  • Ònye bụ nwaanyị a nọ na foto a, gịnịkwa ka nwa agbọghọ nta a nọ n’ụlọ nwaanyị a na-eme?
  • Gịnị ka Ilaịsha gwara ohu ya ka ọ gaa gwa Neeman, gịnịkwa mere iwe ji wee Neeman?
  • Gịnị mere mgbe Neeman gere ndị ohu ya ntị?
  • N’ihi gịnị ka Ilaịsha ji jụ ịnara onyinye Neeman, ma gịnị ka Gehezaị mere?
  • Gịnị mere Gehezaị, gịnịkwa ka anyị pụrụ ịmụta na nke a?

Ajụjụ ndị ọzọ

  • Gụọ 2 Ndị Eze 5:1-27.

    Olee otú ihe nlereanya nke nwa agbọghọ nta ahụ bụ́ onye Izrel pụrụ isi gbaa ndị na-eto eto ume taa? (2 Eze 5:3; Ọma 8:2; 148:12, 13)

    N’ihi gịnị ka o ji dị mma iburu ihe atụ Neeman n’uche mgbe a na-enye anyị ndụmọdụ dabeere n’Akwụkwọ Nsọ? (2 Eze 5:15; Hib. 12:5, 6; Jems 4:6)

    Olee ihe ndị anyị pụrụ ịmụta site n’ịchọpụta ọdịiche dị n’ihe Ilaịsha mere na ihe Gehezaị mere? (2 Eze 5:9, 10, 14-16, 20; Mat. 10:8; Ọrụ 5:1-5; 2 Kọr. 2:17)

GỤKWUO GBASARA YA

BỤRỤ ENYI JEHOVA

Jehova Ga-enyere Gị Aka Ịkata Obi

Olee ihe ga-enyere gị aka ịkata obi gwa ndị ọzọ banyere Jehova?

IHE NDỊ E JI AMỤ BAỊBỤL

A Gwọọ Onye Ekpenta!

Mata ihe a gwara Neeman mee ka ekpenta ya laa.

FOTO E JI AKỤZI IHE

Gehezaị Aghaa Ụgha

Olee ụgha abụọ Gehezaị ghara? Bipụta foto a, soro kpọm kpọm ndị dị na ya sechapụ ya ma mụta ihe n’akụkọ a a kọrọ na Baịbụl.