Gbanwee otú ọ ga-esi egosi

Họrọ asụsụ

Gaa na menu nke abụọ

Gaa n'ebe e dere isiokwu ndị dị na ya

Gaa n'Isiokwu

Ndịàmà Jehova

Igbo

ỤLỌ NCHE ỌGỌST 2014

 ISIOKWU ỤLỌ NCHE A | CHINEKE Ò NWERE MMASỊ N’EBE Ị NỌ?

Chineke Ọ̀ Na-eche Banyere Gị?

Chineke Ọ̀ Na-eche Banyere Gị?

“Anọ m n’ahụhụ, adakwara m ogbenye. Jehova na-echeta m.” *Ọ BỤ EZE DEVID, ONYE CHỊRỊ IZREL N’OGE OCHIE, KWURU IHE A.

“Mba niile dị ka mmiri si na bọket tapụ.”—AỊZAYA 40:15

Devid ò kwesịrị ichewe na Jehova na-echeta ya? Chineke ọ̀ na-eche banyere gịnwa? Ọ na-esiri ọtụtụ ndị ike ikweta na Chineke onye pụrụ ime ihe niile ji ha kpọrọ ihe. Gịnị mere o ji esiri ha ike ikweta?

Otu ihe kpatara ya bụ na Chineke abụghị mmadụ, ọ kakwa ụmụ mmadụ. Ọ bụrụ na Chineke anọrọ n’eluigwe lee mba niile anya, ha dị ka “mmiri si na bọket tapụ; ọ na-ewerekwa ha dị ka uzuzu nke dị n’elu ihe ọ̀tụ̀tụ̀.” (Aịzaya 40:15) E nwere otu nwoke na-ede akwụkwọ n’oge a. O kweghị na Chineke. Ọ sịrị na “ọ bụrụ na mmadụ chere na Chineke dị nakwa na Chineke ji ya kpọrọ ihe, nweekwa mmasị n’ihe ndị ọ na-eme, onye ahụ mụ anya na-arọ nrọ.”

Ma, e nwere ndị chere na Chineke anaghị eche banyere ha n’ihi ihe ọjọọ ha na-eme. Dị ka ihe atụ, otu nwoke aha ya bụ Jim kwuru, sị: “M na-ekpe ekpere mgbe niile ka obi ruo m ala nakwa ka m na-ejide onwe m. Ma obere oge, mụ ebidokwa wewa iwe ọkụ. M bịaziri chee na ihe ọjọọ eriela m ahụ́ nke na Chineke enwelighị ike inyere m aka.”

Ebe Chineke nọ ọ̀ dị ezigbo anya nke na ọ naghị ahụ anyị? Olee otú o si were anyị bụ́ ndị na-ezughị okè? A sị na Chineke emeghị ka anyị mata ụdị onye ọ bụ, o nweghị onye gaara aza ajụjụ ndị a. Ma, Okwu Chineke e dere n’ike mmụọ nsọ, ya bụ, Baịbụl, mere ka o doo anyị anya na Chineke anọghị ebe dị anya, ọ bụghịkwa onye ihe gbasara anyị na-anaghị emetụ n’obi. Baịbụl sịrị na “ọ nọghị n’ebe dị anya n’ebe onye ọ bụla n’ime anyị nọ.” (Ọrụ Ndịozi 17:27) N’isiokwu anọ na-eso nke a, anyị ga-eleba anya n’ihe Chineke gwara anyị gbasara otú o si nwee mmasị n’ebe onye ọ bụla n’ime anyị nọ nakwa otú o sirila gosi na ya nwere mmasị n’ebe ndị mmadụ ibe anyị nọ, bụ́ ndị dịrị ndụ otú a anyị dị ndụ ugbu a.

^ para. 3 Abụ Ọma 40:17; Baịbụl kwuru na aha Chineke bụ Jehova.