Gbanwee otú ọ ga-esi egosi

Họrọ asụsụ

Gaa na menu nke abụọ

Gaa n'ebe e dere isiokwu ndị dị na ya

Gaa n'Isiokwu

Ndịàmà Jehova

Igbo

ỤLỌ NCHE Nke 4 n'Afọ 2016

 ISIOKWU ỤLỌ NCHE A | OLEE OTÚ BAỊBỤL SI DỊGIDE?

Akụkọ Dị́ Ezigbo Mkpa

Akụkọ Dị́ Ezigbo Mkpa

N’ime akwụkwọ okpukpe niile dị n’ụwa, e nweghị nke dị ka Baịbụl. N’akwụkwọ niile dịterela aka ka Baịbụl, o nweghị nke ọtụtụ ndị ka kweere ihe o kwuru otú ha si kwere n’ihe Baịbụl kwuru. Ma, e nwebeghị akwụkwọ a gbarala ụkwụ otú e si gbaa Baịbụl.

Dị ka ihe atụ, ụfọdụ ndị gụrụ oké akwụkwọ echeghị na ihe ndị e dere na Baịbụl ndị e nwere taa na ihe ndị mbụ dere Baịbụl dere bụ otu. Otu prọfesọ nke gụrụ gbasara okpukpe kwuru, sị: “Anyị ejighị n’aka na ndị sí na Baịbụl mbụ sụgharịa Baịbụl ndị anyị nwere taa sụgharịtara ya. E nwere ọtụtụ ihe ndị ha na-asụgharịtaghị. A sụgharịkwara ọtụtụ n’ime ha ọtụtụ narị afọ e dechara Baịbụl mbụ. Ihe ndị e dekwara na ha dị ezigbote iche.”

E nwekwara ndị ji maka ihe ndị a kụziiri ha n’okpukpe ha kwere na ihe ndị dị na Baịbụl ndị e nwere taa abụghị eziokwu. Otu nwoke aha ya bụ Faizal kwuru na ndị ezinụlọ ha na-abụghị Ndị Kraịst kụziiri ya na Baịbụl bụ akwụkwọ nsọ, mana a gbanweela ihe e dere na ya. O kwuru na o meziri ka ya na-enyo onye ọ bụla chọrọ ịgwa ya ihe dị na Baịbụl enyo. O kwukwara na a sịdị kwuwe, Baịbụl onye ahụ ji abụghị nke ezigbo ya, kama, ọ bụ nke adịgboroja.

Ọ̀ dị mkpa ka mmadụ chọpụta ma à gbanweela ihe e dere na Baịbụl ma ọ bụ na a gbanwebeghị ya? E nwere ajụjụ abụọ ga-enyere anyị aka ịma ma ọ̀ dị mkpa. Ha bụ: Ọ bụrụ na ị maghị ma ihe ọma ndị Baịbụl anyị na-agụ taa kwuru na Chineke ga-emere anyị n’ọdịnihu hà bụ ihe Baịbụl mbụ kwuru, obi ọ̀ ga-esi gị ike na ha ga-emezu? (Ndị Rom 15:4) Ọ bụrụ na ihe e dere na Baịbụl ndị e nwere taa dị iche n’ihe e dere na Baịbụl mbụ, ị̀ ga-eji ya na-ekpebi ụdị ọrụ ị ga-arụ, otú ihe ga-esi na-aga n’ezinụlọ gị, ma ọ bụkwanụ otú ị ga-esi na-efe Chineke?

Ọ bụ eziokwu na akwụkwọ ndị dere Baịbụl ná mmalite ji dee ya adịghịzi, anyị ka nwere ike ịhụ ọtụtụ akwụkwọ mpịakọta Baịbụl ndị e ji aka depụtaghachi n’oge ochie. Olee otú akwụkwọ mpịakọta Baịbụl ndị ahụ si dịrị ruo taa n’agbanyeghị na ha nwere ike irekasị, na e nwekwara ndị na-achọghị ka ha dịrị, nweekwa ndị chọrọ ịgbanwe ihe e dere na ha? Oleekwa otú otú a ha si dịrị ruo taa ga-esi mee ka obi sie gị ike na ihe e dere na Baịbụl ndị anyị nwere taa na ihe e dere na Baịbụl mbụ bụ otu? Gụọ isiokwu na-eso nke a ka ị mata azịza ajụjụ ndị a.