Gbanwee otú ọ ga-esi egosi

Họrọ asụsụ

Gaa na menu nke abụọ

Gaa n'ebe e dere isiokwu ndị dị na ya

Gaa n'Isiokwu

Ndịàmà Jehova

Igbo

TETA! Nke 4 n'Afọ 2016

 ISIOKWU TETA! A | OTÚ Ị GA-ESI AKWỤSỊ ÀGWÀ RIRILA GỊ AHỤ́

1 Mara Ike Gị

1 Mara Ike Gị

Ike nwere ike ịgwụ mmadụ ma ọ chọwa ịkwụsịcha àgwà ọjọọ niile riri ya ahụ́ n’otu ụbọchị. Dị ka ihe atụ, mmadụ nwere ike ikpebi na ya ga-akwụsị ịṅụ sịga, ikwu okwu rụrụ arụ, na ehighị ụra n’oge, kpebiekwa na ya ga-amalite imega ahụ́, iri nri na-edozi ahụ́, na ịkpọ nne nne ya na nna nna ya n’ekwentị. Ma, nke bụ́ eziokwu bụ na ọ bụrụ na onye ahụ na-achọ imecha ihe ahụ niile otu mgbe, o nweghị nke ọ ga-emete.

IHE BAỊBỤL KWURU: “Ndị dị obi umeala nwere amamihe.”Ilu 11:2.

Onye dị obi umeala anaghị eme ihe ọ ma ga-agbaji ya aka. Ọ ma na ọ bụghị ihe niile ka ọ ga-emeli otu mgbe. Ụdị onye a anaghị achọ ịgbanwe ihe niile riri ya ahụ́ n’otu ntabi anya, kama, ọ na-eji nwayọọ nwayọọ agbanwe.

Ọ bụrụ na mmadụ na-achọ imecha ihe niile otu mgbe, o nweghị nke ọ ga-emete

IHE I NWERE IKE IME

Na-agbanwe àgwà ndị riri gị ahụ́ otu otu. Legodị ihe ụfọdụ nwere ike inyere gị aka:

  1. Were otu akwụkwọ dee àgwà ọma ndị ị chọrọ ịna-akpa, werekwa akwụkwọ ọzọ dee àgwà ọjọọ ndị ị chọrọ ịkwụsị. Edekwala naanị ndị nke i chere ị ga-emeli. Dee àgwà ọma niile i kwesịrị ịna-akpa na ndị nke ọjọọ niile i kwesịrị ịkwụsị n’akwụkwọ nke ọ bụla.

  2. Chọpụta àgwà ọma ndị mbụ i kwesịrị ịkpawa na ndị nke ọjọọ i kwesịrị ịkwụsị.

  3. Si n’àgwà ndị ahụ i depụtara họrọ otu àgwà ọma ma ọ bụ abụọ ị ga-akpawa, họrọkwa otu àgwà ọjọọ ma ọ bụ abụọ ị ga-akwụsị. Lekwasị ha anya, ọ marawa gị ahụ́, gị agafee n’otu àgwà ọzọ ma ọ bụ abụọ na-eso ndị nke mbụ.

Bido ozugbo kpawa àgwà ọma ndị ga-amara gị ahụ́. Dị ka ihe atụ, o nwere ike ịbụ na otu n’ime àgwà riri gị ahụ́ ị chọrọ ịkwụsị bụ ile tiivi, ya abụrụkwa na otu n’ime àgwà ọma ị chọrọ ịkpawa bụ ịna-akpọtụrụ ndị ikwu na ibe gị. Ọ bụrụ otú ahụ, i nwere ike ikpebi na ihe mbụ ị ga na-eme ma ị lọta ọrụ bụ ịkpọ otu enyi gị ma ọ bụ onye ikwu gị n’ekwentị, ọ bụghị ịgbanye tiivi.