Gbanwee otú ọ ga-esi egosi

Họrọ asụsụ

Gaa na menu nke abụọ

Gaa n'ebe e dere isiokwu ndị dị na ya

Gaa n'Isiokwu

Ndịàmà Jehova

Igbo

TETA! SEPTEMBA 2013

Mmegbu Juru Ebe Niile

Mmegbu Juru Ebe Niile

ABỤ m onye Nọtan Ayaland. A mụrụ m n’afọ 1965. Mama m na papa m bụ ndị ogbenye. Mgbe m na-eto n’obodo a na-akpọ Deri, ndị Katọlik na ndị Protestant anaghị esi otu ụzọ aga. Esemokwu ha ruru ihe karịrị afọ iri atọ. Ndị Protestant ka ndị Katọlik n’obodo anyị. Ndị Katọlik na-ekwu na ndị Protestant anaghị ekwe ka ndị nọ n’òtù ndọrọ ndọrọ ọchịchị ha megharịa ahụ́ nakwa na ha anaghị ekwe ewe ha n’ọrụ. Ha na-ekwukwa na ha ji ndị uwe ojii na-echi ha ọnụ n’ala nakwa na a naghị ekwe enye ha ebe ha ga-ebi.

Mmegbu juru ebe niile n’obodo anyị, a na-echikwa ndị mmadụ ọnụ n’ala. Enweghị m ike ịgụta ugboro ole e tiri m ihe ma ọ bụ ugboro ole a kpụpụtara m n’ụgbọala tụdo m égbè ma ọ bụkwanụ ugboro ole ndị uwe ojii ma ọ bụ ndị soja jidere m gbaa m ajụjụ. Ha jidekwara m ọtụtụ ugboro tinyecha m aka n’ahụ́ na-achọ ma ha ga-ahụ ihe dị ka égbè. Ihe a niile were m iwe, m wee kpebie na mụ na ha ga-achịpụ ya.

E nwere mmadụ iri na anọ ndị amị gbagburu mgbe ha na-eme ngagharị iwe n’obodo anyị. Iji na-echeta ndị ahụ, ụfọdụ ndị obodo anyị malitere ịna-eme ngagharị iwe kwa afọ. Eso m ná ndị mere ngagharị iwe nke afọ 1972. N’afọ 1981, mmadụ iri nọ na mkpọrọ nwụrụ n’ihi na ha jụrụ iri nri maka na ike mkpọrọ agwụla ha. A na-emekwa ngagharị iwe iji cheta ha, esokwa m mee ngagharị iwe ndị ahụ. N’oge ahụ, ndị Briten  anaghị ekwe ka onye ọ bụla jiri ọkọlọtọ ndị Ayaland, ma m na-eji ya, m na-edekwa ihe n’ebe ọ bụla m hụrụ iji katọọ ndị Briten. O nweghị mgbe a na-anaghị enwe arụ a kpasara onye Katọlik. Nke a na-emekwa ka a malite ime ngagharị iwe. A malite ya, ọ na-adị ka ngagharị iwe nkịtị, ma, ọ naghị adị anya a malite imebisi ihe.

Mgbe m nọ mahadum, m na-eso ụmụ akwụkwọ ndị ọzọ eme ngagharị iwe. M mechara kwaga Lọndọn. Eso m na-eme ngagharị iwe iji gosi na obi adịghị anyị mma maka otú ndị gọọmenti si eme iwu na-abara naanị ndị ọgaranya uru. Ha na-ejikwa iwu ndị ahụ emesi ndị ogbenye ike. O nwekwara mgbe ndị ọchịchị bepụrụ ego n’ụgwọ ọnwa ndị ọrụ bekee. Nke a mere ka ndị ọrụ bekee gbaa abụbụ ọrụ. Esokwa m gbaa abụbụ ọrụ ahụ. Esokwa m mee ngagharị iwe n’afọ 1990 mgbe gọọmenti kwuru na onye ọ bụla torola eto ga na-atụ ụtụ isi. Mgbe anyị mere ngagharị iwe a, e mebisiri ihe n’otu ámá ndị mmadụ na-ezukọtakarị na Lọndọn.

Nsogbu niile a bịara gwụ m ike. Ọ na-abụ anyị mechaa ngagharị iwe, ihe akakwuo njọ kama ịdị mma.

Ọ bụ n’oge ahụ ike ihe a niile gwụrụ m ka otu enyi m nwoke gwara m banyere Ndịàmà Jehova. Ha ji Baịbụl kụziere m na Chineke hụrụ mmadụ niile n’anya nakwa na ọ ga-edozi nsogbu niile ọchịchị ụmụ mmadụ kpatarala. (Aịzaya 65:17; Mkpughe 21:3, 4) N’agbanyeghị na ndị mmadụ na-eburu ndị ha na-achị ihe ọma n’obi, ha enweghị ike ime ka ndị mmadụ kwụsị ịkpọ ibe ha asị. Ihe mere ya bụ na ọ bụ ndị mmụọ ọjọọ na-akpata nsogbu ndị dị n’ụwa. Ma, ọ bụ Chineke kwesịrị ịna-achị ụmụ mmadụ, ọ ga-enyere anyị aka imeri ná mgba anyị na ha na-agba.—Jeremaya 10:23; Ndị Efesọs 6:12.

Mgba niile m gbara n’oge ahụ dị ka ebe mmadụ ji nkata na-ekuru mmiri. Obi dị m mma ugbu a maka na amarala m na o nwere mgbe mmegbu na-agaghịzi adị n’ụwa a. N’oge ahụ, e nweghị onye ga-aka ibe ya.

Baịbụl kwuru na Jehova Chineke “hụrụ ikpe ziri ezi n’anya.” (Abụ Ọma 37:28) O so n’ihe mere obi ji sie anyị ike na ọ ga-eme ka ndị mmadụ kwụsị imegbu ibe ha. Anyị manụ na ọchịchị mmadụ enweghị ike ịkwụsị mmegbu. (Daniel 2:44) Ọ bụrụ na ị chọrọ ịmatakwu otú Jehova ga-esi kwụsị mmegbu, gwa Ndịàmà Jehova nọ n’ebe i bi. I nwekwara ike ịga n’adres bụ́ www.jw.org/ig.

N’agbanyeghị na ndị mmadụ na-eburu ndị ha na-achị ihe ọma n’obi, ha enweghị ike ime ka ndị mmadụ kwụsị ịkpọ ibe ha asị

GỤKWUO GBASARA YA

Gịnị Mere Chineke Ji Kwe Ka Ihe Ọjọọ na Ahụhụ Dịrị?

Olee otú ihe ọjọọ si malite, gịnị mere Chineke ji gbachi nkịtị ka ụmụ mmadụ na-ata ahụhụ ruo ugbu a? È nwere mgbe ahụhụ ga-akwụsị?

Olee Uru Ịmụ Baịbụl Ga-abara Gị?

Baịbụl na-enyere ọtụtụ ndị aka ịmata azịza ajụjụ ndị dị ezigbo mkpa. Ị̀ ga-achọ ka Baịbụl nyere gị aka?