Gbanwee otú ọ ga-esi egosi

Họrọ asụsụ

Gaa na menu nke abụọ

Gaa n'ebe e dere isiokwu ndị dị na ya

Gaa n'Isiokwu

Ndịàmà Jehova

Igbo

Baịbụl nke Dị n'Ịntanet

BAỊBỤL NSỌ—NSỤGHARỊ ỤWA ỌHỤRỤ NKE AKWỤKWỌ NSỌ

Luk 18:1-43

18  O wee malite inye ha otu ihe atụ banyere mkpa ọ dị ka ha na-ekpe ekpere mgbe niile ma ghara ịda mbà,+  o wee sị: “N’otu obodo, e nwere otu ọkàikpe nke na-adịghị atụ egwu Chineke, nke na-adịghịkwa akwanyere mmadụ ùgwù.  Ma e nwere otu nwaanyị di ya nwụrụ n’obodo ahụ, ọ nọgidekwara na-agakwuru+ ọkàikpe ahụ, na-asị, ‘Hụ na m nwetara ikpe ziri ezi n’ikpe mụ na onye iro m.’  O kweghịkwa ná mmalite, ma e mesịa ọ gwara onwe ya, sị, ‘Ọ bụ ezie na adịghị m atụ egwu Chineke ma ọ bụ na-akwanyere mmadụ ùgwù,  ka o sina dị, n’ihi nsogbu nwaanyị a di ya nwụrụ na-enye m mgbe niile,+ m ga-ahụ na o nwetara ikpe ziri ezi, ka o wee ghara ịnọgide na-abịa enyegbu m ná nsogbu.’”+  Onyenwe anyị wee sị: “Nụrụnụ ihe ọkàikpe ahụ kwuru, ọ bụ ezie na ọ bụ onye ajọ omume!  Ya mere, ọ̀ bụ na Chineke agaghị eme ka ndị ọ họọrọ, bụ́ ndị na-etiku ya ehihie na abalị, nweta ikpe ziri ezi,+ ọ bụ ezie na ọ na-enwe ogologo ntachi obi+ n’ihi ha?  Ana m asị unu, Ọ ga-eme ka ha nweta ikpe ziri ezi ọsọ ọsọ.+ Otú o sina dị, mgbe Nwa nke mmadụ ga-abịarute, ọ̀ ga-ahụ okwukwe n’elu ụwa?”  Ma o nyekwara ụfọdụ ndị ihe atụ a, bụ́ ndị tụkwasịrị onwe ha obi na ha bụ ndị ezi omume,+ ndị na-ewerekwa ndị ọzọ dị ka ndị na-enweghị ihe ha bụ, sị:+ 10  “Ndị ikom abụọ gbagoro n’ụlọ nsọ ikpe ekpere, otu bụ onye Farisii, nke ọzọ bụ onye ọnaụtụ. 11  Onye Farisii ahụ guzoro ọtọ+ wee malite ikpe ekpere+ n’obi ya, sị, ‘Chineke, ana m ekele gị na adịghị m ka ụmụ mmadụ ndị ọzọ, bụ́ ndị na-apụnara mmadụ ihe, ndị ajọ omume, ndị na-akwa iko ma ọ bụ ọbụna dị ka onye ọnaụtụ a.+ 12  Ana m ebu ọnụ ugboro abụọ n’izu, ana m enye otu ụzọ n’ụzọ iri nke ihe niile m nwetara.’+ 13  Ma onye ọnaụtụ ahụ guzo n’ebe dị anya, ọ chọghị ọbụna ileli anya ya lee eluigwe, kama ọ nọ na-eti aka n’obi,+ na-asị, ‘Chineke, meere mụ onwe m bụ́ onye mmehie amara.’+ 14  Ana m asị unu, Nwoke a laruru n’ụlọ ya wee bụrụ onye ezi omume+ karịa nwoke ahụ; n’ihi na onye ọ bụla nke na-ebuli onwe ya elu, a ga-eweda ya ala, ma onye na-eweda onwe ya ala, a ga-ebuli ya elu.”+ 15  Ndị mmadụ wee malite ịkpọtara ya obere ụmụaka ha ka o bitụ ha aka; ma mgbe ndị na-eso ụzọ ya hụrụ nke a, ha malitere ịbara ha mba.+ 16  Otú ọ dị, Jizọs kpọrọ ụmụntakịrị ka ha bịakwute ya, sị: “Hapụnụ ụmụntakịrị ka ha bịakwute m, unu anwakwala igbochi ha. N’ihi na alaeze Chineke bụ nke ndị dị otú ahụ.+ 17  N’ezie, ana m asị unu, Onye ọ bụla nke na-anabataghị alaeze Chineke dị ka nwatakịrị agaghị aba n’ime ya ma ọlị.”+ 18  Otu onye na-achị achị wee jụọ ya, sị: “Ezi Onye Ozizi, gịnị ka m ga-eme ka m wee keta ndụ ebighị ebi?”+ 19  Jizọs sịrị ya: “Gịnị mere i ji akpọ m ezi onye? Ọ dịghị onye bụ́ ezi onye, ma e wezụga otu onye, ya bụ, Chineke.+ 20  Ị manụ ihe ndị e nyere n’iwu,+ ‘Akwala iko,+ Egbula ọchụ,+ Ezula ohi,+ Agbala akaebe ụgha,+ Sọpụrụ nna gị na nne gị.’”+ 21  O wee sị: “M na-edebe ihe a niile kemgbe m bụ nwata.”+ 22  Mgbe Jizọs nụrụ ihe o kwuru, ọ sịrị ya: “Ọ dị otu ihe ị ka ga-eme: Ree ihe niile i nwere kesaara ndị ogbenye, ị ga-enwekwa akụ̀ n’eluigwe; bịakwa bụrụ onye na-eso ụzọ m.”+ 23  Mgbe ọ nụrụ ihe a, o wutere ya nke ukwuu, n’ihi na ọ bara ọgaranya nke ukwuu.+ 24  Jizọs lere ya anya wee sị: “Lee ka ọ ga-esi siere ndị nwere ego ike ịba n’alaeze Chineke!+ 25  N’eziokwu, ọ dịịrị kamel mfe isi n’anya agịga e ji akwa ákwà gafere karịa ọgaranya ịba n’alaeze Chineke.”+ 26  Ndị nụrụ ihe a sịrị: “Ònyezi ka a pụrụ ịzọpụta?” 27  O wee sị: “Ihe na-ekweghị omume n’ebe ụmụ mmadụ nọ kwere omume n’ebe Chineke nọ.”+ 28  Ma Pita sịrị: “Lee! Anyị ahapụwo ihe niile anyị nwere soro gị.”+ 29  O wee sị ha: “N’ezie, ana m asị unu, Ọ dịghị onye hapụrụ ụlọ ma ọ bụ nwunye ma ọ bụ ụmụnne ndị ikom ma ọ bụ nne na nna ma ọ bụ ụmụ n’ihi alaeze Chineke,+ 30  bụ́ onye na-agaghị enweta ihe ka ya okpukpu okpukpu n’oge a, nwetakwa ndụ ebighị ebi n’ime usoro ihe na-abịanụ.”+ 31  O wee kpọpụ mmadụ iri na abụọ ahụ n’akụkụ wee sị ha: “Lee! Anyị na-agbago Jeruselem, a ga-emezukwa ihe niile e dere site n’aka ndị amụma+ banyere Nwa nke mmadụ.+ 32  Dị ka ihe atụ, a ga-enyefe ya n’aka ndị mba ọzọ, a ga-ejikwa ya mee ihe ọchị+ ma mee ya ihe ihere,+ gbụọkwa ya ọnụ mmiri;+ 33  ha pịasịakwa ya ihe,+ ha ga-egbu+ ya, ma n’ụbọchị nke atọ, ọ ga-ebili.”+ 34  Otú ọ dị, ha aghọtaghị ihe nke ọ bụla n’ime ihe ndị a pụtara; kama e zochiiri ha okwu a, ha aghọtaghịkwa ihe ndị e kwuru.+ 35  Ma ka ọ na-eru Jeriko nso, otu onye ìsì nọ ọdụ n’akụkụ okporo ụzọ na-arịọ arịrịọ.+ 36  N’ihi na ọ nụrụ ka ìgwè mmadụ na-agafe, ọ malitere ịjụ ase ihe nke a pụtara. 37  Ha kọọrọ ya, sị: “Jizọs onye Nazaret na-agafe!”+ 38  O wee tie mkpu, sị: “Jizọs, Nwa Devid, meere m ebere!”+ 39  Ndị bu ụzọ wee malite ịgwasi ya ike ka o mechie ọnụ, ma ọ nọ na-etisikwu mkpu ike, sị: “Nwa Devid, meere m ebere.”+ 40  Jizọs wee guzoro otu ebe ma nye iwu ka e dutere ya nwoke ahụ.+ Mgbe o rutere nso, Jizọs jụrụ ya, sị: 41  “Gịnị ka ị chọrọ ka m meere gị?”+ O wee sị: “Onyenwe anyị, mee ka m hụwa ụzọ.”+ 42  Ya mere, Jizọs sịrị ya: “Hụwa ụzọ; okwukwe gị emewo ka ahụ́ dị gị mma.”+ 43  O wee hụwa ụzọ n’otu ntabi anya,+ ọ malitekwara iso ya, na-enye Chineke otuto.+ Mgbe ndị ahụ niile hụrụ ya, ha nyere Chineke otuto.

Ihe E Dere n'Ala Ala Peeji