Gbanwee otú ọ ga-esi egosi

Họrọ asụsụ

Gaa na menu nke abụọ

Gaa n'ebe e dere isiokwu ndị dị na ya

Gaa n'Isiokwu

Ndịàmà Jehova

Igbo

Baịbụl nke Dị n'Ịntanet

BAỊBỤL NSỌ—NSỤGHARỊ ỤWA ỌHỤRỤ NKE AKWỤKWỌ NSỌ

Jeremaya 36:1-32

36  O wee ruo n’afọ nke anọ nke ọchịchị Jehoyakim+ nwa Josaya, eze Juda, na okwu a si n’ọnụ Jehova ruo Jeremaya ntị, sị:  “Were akwụkwọ mpịakọta+ dee ihe niile+ m gwara gị malite n’ụbọchị m gwara gị okwu, malite n’ụbọchị Josaya, ruo taa,+ bụ́ ihe niile m gwara gị na m ga-eme Izrel na Juda+ na mba niile.+  Ikekwe, ndị ụlọ Juda ga-ege ntị nụrụ ọdachi niile m bu n’obi ime ka ọ dakwasị ha,+ onye nke ọ bụla ewee hapụ ụzọ ọjọọ ya,+ ka m wee gbaghara ha njehie ha na mmehie ha.”+  Jeremaya wee kpọọ Barọk+ nwa Neraya ka Barọk dee n’akwụkwọ mpịakọta ihe niile Jehova kwuru site n’ọnụ Jeremaya, bụ́ ihe Ọ gwara ya.+  Jeremaya wee nye Barọk iwu, sị: “E gbochiri m ịpụ apụ. Enweghị m ike ịbanye n’ụlọ Jehova.+  Gị onwe gị, banye n’ụlọ Jehova, n’ụbọchị ibu ọnụ,+ gụpụta okwu Jehova nke m gwara gị ka i dee n’akwụkwọ mpịakọta,+ gụpụta ya ná ntị ndị nọ n’ebe ahụ; gụpụtakwa ya ná ntị ndị Juda niile bụ́ ndị si n’obodo ha dị iche iche na-abata.+  Ikekwe, Jehova ga-anụ arịrịọ ha na-arịọ ka o meere ha amara,+ onye ọ bụla n’ime ha ewee hapụ ụzọ ọjọọ ya,+ n’ihi na iwe na ọnụma nke Jehova kwuru na ọ ga-awụkwasị ndị a dị ukwuu.”+  Barọk+ nwa Neraya wee mee ihe niile Jeremaya onye amụma nyere ya n’iwu, ya bụ, ịga n’ụlọ Jehova+ gụpụta ihe Jehova kwuru n’akwụkwọ ahụ.+  O wee ruo n’afọ nke ise nke ọchịchị Jehoyakim+ nwa Josaya, bụ́ eze Juda, n’ọnwa nke itoolu,+ na ndị niile bi na Jeruselem nakwa ndị niile si n’obodo ndị dị na Juda na-abata Jeruselem kpọsara ibu ọnụ n’ihu Jehova.+ 10  Barọk wee malite ịgụpụta okwu Jeremaya nke dị n’akwụkwọ ahụ ná ntị mmadụ niile n’ụlọ Jehova, n’ụlọ iri ihe+ nke Gemaraya+ nwa Shefan+ bụ́ ọkà n’idepụta ihe,+ n’ogige nke dị ná mgbago, n’ebe e si abanye n’ọnụ ụzọ ámá ọhụrụ nke ụlọ Jehova.+ 11  Mịkaya nwa Gemaraya nwa Shefan+ wee nụ ihe niile Jehova kwuru, ndị a gụpụtara n’akwụkwọ ahụ. 12  O wee gaa n’ụlọ eze, n’ụlọ iri ihe nke odeakwụkwọ, ma, lee! ndị isi niile nọ ọdụ n’ebe ahụ, ya bụ, Elishama+ bụ́ odeakwụkwọ na Deleya+ nwa Shemaya na Elnetan+ nwa Akbọ+ na Gemaraya+ nwa Shefan+ na Zedekaya nwa Hananaya na ndị niile ọzọ bụ́ ndị isi. 13  Mịkaya+ wee gwa ha ihe niile ọ nụrụ mgbe Barọk gụpụtara ihe dị n’akwụkwọ ahụ ná ntị ndị mmadụ.+ 14  Ndị isi ahụ niile wee zie Jehudaị+ nwa Netanaya nwa Shelemaya nwa Kọshai ka ọ gaa gwa Barọk,+ sị: “Were akwụkwọ mpịakọta ahụ ị gụpụtara ná ntị ndị mmadụ bịa.” Barọk nwa Neraya wee were akwụkwọ mpịakọta ahụ bịakwute ha.+ 15  Ha wee sị ya: “Biko, nọdụ ala, gụpụta ya ná ntị anyị.” Barọk+ wee gụpụta ya ná ntị ha. 16  O wee ruo na ozugbo ha nụrụ okwu ahụ dum, ha lerịtara ibe ha anya n’oké egwu; ha wee sị Barọk: “Anyị aghaghị ịgwa eze ihe a niile ị gụpụtara.”+ 17  Ha wee jụọ Barọk, sị: “Biko, gwa anyị, Olee otú i si dee ihe a niile o kwuru?”+ 18  Barọk wee gwa ha, sị: “O ji ọnụ ya na-akpọrọ m okwu a niile, m wee jiri ink na-ede ya n’akwụkwọ.”+ 19  N’ikpeazụ, ndị isi ahụ gwara Barọk, sị: “Gị na Jeremaya gaa zoo, ka mmadụ ọ bụla ghara ịma ebe unu nọ.”+ 20  Ha wee gakwuru eze n’ogige ya,+ ma ha debere akwụkwọ mpịakọta ahụ n’ụlọ iri ihe+ Elishama+ bụ́ odeakwụkwọ; ha wee malite ikwu ihe ahụ niile ná ntị eze. 21  Eze wee zie Jehudaị+ ka ọ gaa weta akwụkwọ mpịakọta ahụ. O wee gaa n’ụlọ iri ihe Elishama+ bụ́ odeakwụkwọ+ weta ya. Jehudaị wee malite ịgụpụta ya ná ntị eze nakwa ná ntị ndị isi niile guzo n’akụkụ eze. 22  Eze nọ ọdụ n’ụlọ ọ na-anọ n’oge oyi,+ n’ọnwa nke itoolu,+ ọkụ nọkwa na-enwu n’ite ọkụ+ dị n’ihu ya. 23  O wee ruo na mgbe ọ bụla Jehudaị gụrụ nkebi atọ ma ọ bụ anọ n’akwụkwọ ahụ na eze na-eji mma odeakwụkwọ chabie ya ma tụba ya n’ọkụ na-enwu n’ite ọkụ ahụ ruo mgbe ọkụ na-enwu n’ite ọkụ ahụ rechapụrụ akwụkwọ mpịakọta ahụ dum.+ 24  Ha atụghị ụjọ;+ ma eze ma ndị niile na-ejere ya ozi, bụ́ ndị nọ na-ege ntị n’okwu a niile, adọwaghi uwe ha.+ 25  Elnetan+ na Deleya+ na Gemaraya+ rịọrọ eze ka ọ ghara ịgba akwụkwọ mpịakọta ahụ ọkụ, ma o geghị ha ntị.+ 26  Eze nyekwara Jeramiel bụ́ nwa eze na Seraya nwa Azriel na Shelemaya nwa Abdiel iwu ka ha gaa kpọta Barọk bụ́ odeakwụkwọ na Jeremaya onye amụma.+ Ma Jehova zoro ha.+ 27  Okwu Jehova wee ruo Jeremaya ntị ọzọ mgbe eze gbasịrị akwụkwọ mpịakọta ahụ Barọk+ dere ihe Jeremaya kwuru ọkụ,+ sị: 28  “Were akwụkwọ mpịakọta ọzọ dee ihe mbụ ahụ niile e dere n’akwụkwọ mpịakọta mbụ ahụ, bụ́ nke Jehoyakim eze Juda gbara ọkụ.+ 29  Kwuokwa okwu megide Jehoyakim eze Juda, sị, ‘Nke a bụ ihe Jehova kwuru: “Gị onwe gị agbawo akwụkwọ mpịakọta a ọkụ,+ sị, ‘Gịnị mere i ji dee n’ime ya,+ sị: “Eze Babịlọn aghaghị ịbịa, ọ ghaghịkwa ibibi ala a ma kpochapụ mmadụ na anụmanụ na ya”?’+ 30  Ya mere, nke a bụ ihe Jehova kwuru megide Jehoyakim eze Juda, ‘Ọ dịghị onye nke ya ga-anọkwasị n’ocheeze Devid,+ a ga-atụpụkwa ozu ya+ n’anwụ ehihie, nakwa n’oyi abalị. 31  M ga-eme ka ya+ na ụmụ ya na ndị na-ejere ya ozi zaa ajụjụ maka njehie ha.+ M ga-emekwa ka ọdachi dum m kwuru na ọ ga-adakwasị ha na ndị bi na Jeruselem na ndị Juda, ma ha egeghị ntị,+ dakwasị ha.’”’”+ 32  Jeremaya wee were akwụkwọ mpịakọta ọzọ nye Barọk nwa Neraya, bụ́ odeakwụkwọ,+ o wee dee ihe niile Jeremaya kwuru,+ nke dị n’akwụkwọ ahụ Jehoyakim eze Juda gbara ọkụ;+ a gbakwụnyekwara ya ọtụtụ ihe ọzọ yiri ndị mbụ ahụ.

Ihe E Dere n'Ala Ala Peeji