Gbanwee otú ọ ga-esi egosi

Họrọ asụsụ

Gaa na menu nke abụọ

Gaa n'ebe e dere isiokwu ndị dị na ya

Gaa n'Isiokwu

Ndịàmà Jehova

Igbo

Baịbụl nke Dị n'Ịntanet

BAỊBỤL NSỌ—NSỤGHARỊ ỤWA ỌHỤRỤ NKE AKWỤKWỌ NSỌ

Ezikiel 1:1-28

1  O wee ruo n’afọ nke iri atọ, n’ọnwa nke anọ, n’abalị ise n’ọnwa ahụ, mgbe m nọ n’akụkụ osimiri Kiba+ n’etiti ndị a dọọrọ n’agha,+ na eluigwe meghere,+ m wee hụ ọhụụ Chineke.+  N’abalị ise n’ọnwa ahụ, ya bụ, n’afọ nke ise mgbe a dọrọsịịrị Eze Jehoyakin+ n’agha,  okwu Jehova ruru+ Ezikiel+ nwa Buzaị bụ́ onye nchụàjà ntị, n’ala ndị Kaldia,+ n’akụkụ osimiri Kiba, aka Jehova dịkwasịkwara ya n’ebe ahụ.+  M wee hụ, ma, lee! oké ifufe+ si n’ebe ugwu fere na-abịa, e nwekwara nnukwu ígwé ojii+ na ọkụ na-enwu enwu,+ ìhè na-enwukwa gburugburu ígwé ojii ahụ, ihe yiri ọla nke na-egbu maramara sikwa n’etiti ya na-egbukepụ, ya bụ, n’etiti ọkụ ahụ.+  Ihe yiri ihe anọ dị ndụ sikwa n’etiti ya pụta,+ otú a ka ha dị: ha yiri mmadụ.  Nke ọ bụla nwere ihu anọ,+ nke ọ bụla n’ime ha nwekwara nku anọ.+  Ụkwụ ha kwụụrụ akwụrụ, ọbụ ụkwụ ha yikwara ọbụ ụkwụ nwa ehi;+ ha na-egbukekwa dị ka ọla kọpa nke na-egbu maramara.+  Ha nwere aka mmadụ n’okpuru nku ha, n’akụkụ anọ ha,+ ha anọ nwere ihu, nweekwa nku.+  Nke ọ bụla n’ime nku ha na-emetụ ibe ya. Ha anaghị atụgharị atụgharị mgbe ha na-aga; nke ọ bụla na-aga ihu ihu.+ 10  A bịa n’otú ihu ha dị, ha anọ nwere ihu mmadụ,+ nweekwa ihu ọdụm+ n’akụkụ aka nri,+ ha anọ nwekwara ihu ehi+ n’akụkụ aka ekpe;+ ha anọ nwekwara ihu ugo.+ 11  Otú ahụ ka ihu ha dị. Ha gbasapụkwara nku+ ha agbasapụ ma chịlie ha elu. Nke ọ bụla nwere nku abụọ na-emetụ ibe ha, abụọ kpuchikwara ahụ́ ha.+ 12  Nke ọ bụla n’ime ha na-aga ihu ihu.+ Ebe ọ bụla mmụọ nsọ chọrọ ka ha gaa, ha agaa.+ Ha anaghị atụgharị atụgharị ma ha na-aga.+ 13  A bịa n’otú ihe anọ ahụ dị ndụ dị, ha yiri icheku ọkụ nke na-ere ere.+ Ihe yiri ọwa ọkụ+ na-aga ihu na azụ n’agbata ihe ndị ahụ dị ndụ, ọkụ ya na-enwukwa enwu, àmụ̀mà sikwa n’ọkụ ahụ na-egbu.+ 14  Ihe ndị ahụ dị ndụ yiri àmụ̀mà ka ha na-apụ ma na-alọghachi.+ 15  Ka m nọ na-ele ihe ndị ahụ dị ndụ, lee! e nwere otu wiil dị n’elu ala, n’akụkụ ihe ndị ahụ dị ndụ,+ n’akụkụ ihu anọ nke ọ bụla n’ime ihe ndị ahụ dị ndụ.+ 16  A bịa n’otú wiil ndị ahụ dị+ na otú e si mee ha, ha na-egbu maramara dị ka nkume krisolaịt;+ ha anọ yiri ibe ha. Otú ha dị na otú e si mee ha dị nnọọ ka wiil nke dị n’ime wiil ọzọ.+ 17  Ọ bụrụ na ha gawa, ha nwere ike ịga n’akụkụ anọ ha.+ Ha anaghị atụgharị atụgharị ma ọ bụrụ na ha gawa n’ụzọ ọzọ.+ 18  A bịa na gburugburu elu wiil ndị ahụ, ha dị elu nke na ha na-atụ egwu; anya jupụtara gburugburu elu wiil ndị ahụ, gburugburu ha anọ.+ 19  Mgbe ihe ndị ahụ dị ndụ na-aga, wiil ndị ahụ na-aga n’akụkụ ha. Mgbe e si n’ala bulie ihe ndị ahụ dị ndụ elu, a na-ebuli wiil ndị ahụ elu.+ 20  Ebe ọ bụla mmụọ nsọ chọrọ ka ha gaa, ha agaa, ebe ọ bụ na mmụọ nsọ chọrọ ịga ebe ahụ; a na-ebulikwa wiil ndị ahụ elu n’akụkụ ha, n’ihi na mmụọ nsọ nke na-akpa ike n’ahụ́ ihe ndị ahụ dị ndụ dị na wiil ndị ahụ. 21  Ha gawa, wiil ndị ahụ agawa; ha guzoro otu ebe, wiil ndị ahụ eguzorokwa otu ebe; ọ bụrụ na e si n’ala bulie ha elu, a na-ebulikwa wiil ndị ahụ elu n’akụkụ ha, n’ihi na mmụọ nsọ nke na-akpa ike n’ahụ́ ihe ndị ahụ dị ndụ dị na wiil ndị ahụ.+ 22  N’elu isi ihe ndị ahụ dị ndụ, e nwere ihe yiri mbara igwe+ nke na-egbu maramara dị ka mkpụrụ mmiri dị egwu, ọ gbasapụrụ n’elu isi ha.+ 23  Ha gbasara nku ha agbasa n’okpuru mbara igwe ahụ, otu na-emetụ ibe ya. Nke ọ bụla n’ime ha nwere nku abụọ nke kpuchiri otu akụkụ ahụ́ ya, nke ọ bụla nwekwara nku abụọ nke kpuchiri akụkụ ahụ́ ya nke ọzọ. 24  M wee nụ ụda nku ha mgbe ha na-aga, bụ́ ụda yiri nke nnukwu mmiri,+ dị ka ụda nke Onye Pụrụ Ime Ihe Niile, dị ka mkpọtụ ọgba aghara,+ dị ka mkpọtụ nke ebe a mara ụlọikwuu.+ Mgbe ha guzoro otu ebe, ha na-achịtu nku ha. 25  M wee nụ otu olu n’elu mbara igwe ahụ nke dị n’elu isi ha. (Mgbe ha guzoro otu ebe, ha na-achịtu nku ha.) 26  N’elu mbara igwe ahụ nke dị n’elu isi ha, e nwere ihe yiri nkume safaya,+ ihe yiri ocheeze.+ N’elu ihe ahụ yiri ocheeze, e nwere onye yiri mmadụ nke nọkwasịrị ya,+ n’elu. 27  M wee hụ ihe yiri ọla na-egbu maramara+ dị ka ọkụ gbaa gburugburu n’ime ya,+ malite n’ihe yiri úkwù ya gbagoo; malitekwa n’ihe yiri úkwù ya gbadaa, m hụrụ ihe yiri ọkụ, ìhè na-enwukwa gburugburu ya. 28  E nwere ihe yiri ụta+ nke na-apụta n’ígwé ojii n’ụbọchị mmiri na-ezo. Ọ bụ otú ahụ ka ìhè nke na-enwu gburugburu ya dị. O yiri ebube Jehova.+ Mgbe m hụrụ ya, m gburu ikpere n’ala, kpudo ihu n’ala,+ m wee malite ịnụ olu onye ahụ nke na-ekwu okwu.

Ihe E Dere n'Ala Ala Peeji