Gbanwee otú ọ ga-esi egosi

Họrọ asụsụ

Gaa na menu nke abụọ

Gaa n'ebe e dere isiokwu ndị dị na ya

Gaa n'Isiokwu

Ndịàmà Jehova

Igbo

Baịbụl nke Dị n'Ịntanet

BAỊBỤL NSỌ—NSỤGHARỊ ỤWA ỌHỤRỤ NKE AKWỤKWỌ NSỌ

Levitikọs 25:1-55

25  Jehova wee gwa Mozis okwu ọzọ n’Ugwu Saịnaị, sị:  “Gwa ụmụ Izrel okwu, sị ha, ‘Mgbe unu mesịrị bata n’ala m ga-enye unu,+ ala ahụ ga-edebere Jehova ụbọchị izu ike.+  Afọ isii ka unu ga-agha mkpụrụ n’ubi unu, afọ isii ka unu ga-akwacha ubi vaịn unu, unu ga-aghọrọkwa mkpụrụ ala unu.+  Ma n’afọ nke asaa, ala ga-ezu nnọọ ike,+ bụ́ izu ike a ga-edebere Jehova. Unu agaghị agha mkpụrụ n’ubi unu, unu agaghịkwa akwacha ubi vaịn unu.  Unu ewerela ihe mkpụrụ dapụrụ adapụ n’ihe ubi unu mịpụtara, unu aghọrọkwala mkpụrụ nke osisi vaịn unu a na-akwachaghị akwacha mịrị. Ala ga-ezu nnọọ ike ruo otu afọ.  Ihe ala unu mepụtara n’afọ ahụ ọ na-ezu ike ga-abụrụ unu ihe oriri, maka gị na ohu gị nwoke na ohu gị nwaanyị na onye ọrụ e goro ego na onye ọbịa gị na ya bi, ndị mbịarambịa gị na ha bi,  nakwa maka anụ ụlọ gị na anụ ọhịa ndị bi n’ala gị. A ga-eri ihe niile o mepụtara eri.  “‘Unu ga-agụpụtara onwe unu afọ izu ike asaa, afọ asaa ụzọ asaa, afọ izu ike asaa ahụ ga-abụrụ unu afọ iri anọ na itoolu.  Unu ga-afụ opi na-adasị ụda ike+ n’ọnwa nke asaa, n’abalị iri n’ọnwa ahụ;+ unu ga-afụ opi ahụ n’ala unu dum n’ụbọchị mkpuchi mmehie.+ 10  Unu ga-edo afọ nke iri ise nsọ ma kpọsaara ndị niile bi n’ala unu nnwere onwe.+ Ọ ga-abụrụ unu afọ Jubili,+ onye nke ọ bụla n’ime unu ga-alaghachi n’ala ya, onye nke ọ bụla n’ime unu ga-alaghachikwuru ezinụlọ ya.+ 11  Afọ Jubili ka afọ nke iri ise ga-abụrụ unu.+ Unu agaghị agha mkpụrụ, unu agaghịkwa ewere ihe mkpụrụ dapụrụ adapụ mịpụtara, unu agaghịkwa aghọrọ mkpụrụ nke osisi vaịn a na-akwachaghị akwacha mịrị.+ 12  N’ihi na ọ bụ afọ Jubili. Ọ ga-abụrụ unu ihe dị nsọ. Unu pụrụ iri ihe ala mepụtara n’ubi unu.+ 13  “‘N’afọ Jubili, onye ọ bụla n’ime unu ga-alaghachi n’ihe nketa ya.+ 14  Ọ bụrụ na unu eresị mmadụ ibe unu ngwá ahịa ma ọ bụ zụta ihe n’aka mmadụ ibe unu, unu emejọla ibe unu.+ 15  Unu ga-azụrụ ihe n’aka mmadụ ibe unu dabere n’afọ ole gafeworo mgbe afọ Jubili gasịrị; ọ ga-eresị gị ihe dabere n’afọ ole fọdụụrụ ihe ubi ahụ.+ 16  Ọ ga-ebuli ọnụ ahịa ya dabere n’otú afọ dịruru ọtụtụ,+ ọ ga-ewedakwa ọnụ ahịa ya dabere n’otú afọ dịruru ole na ole, n’ihi na ihe ọ na-eresị gị dabeere n’ihe ole dị n’ubi ahụ. 17  Onye ọ bụla n’ime unu emejọla ibe ya,+ tụọnụ egwu Chineke unu,+ n’ihi na abụ m Jehova bụ́ Chineke unu.+ 18  Ya mere, debenụ ụkpụrụ m, debekwanụ mkpebi ikpe m, meekwanụ ha. Mgbe ahụ unu ga-ebi n’ala ahụ n’obi iru ala.+ 19  Ala ahụ ga-emepụtakwa mkpụrụ ya,+ unu ga-erijụkwa afọ ma biri na ya n’obi iru ala.+ 20  “‘Ma ọ bụrụ na unu asị: “Gịnị ka anyị ga-eri n’afọ nke asaa ebe ọ bụ na anyị agaghị agha mkpụrụ ma ọ bụ wee ihe ubi?”+ 21  mgbe ahụ, m ga-enye ngọzi m iwu ka ọ bịakwasị unu n’afọ nke isii, ala unu ga-amịkwa mkpụrụ ga-ezu afọ atọ.+ 22  Unu ga-aghakwa mkpụrụ n’afọ nke asatọ, unu ga na-eri ihe ubi nke ochie ruo afọ nke itoolu. Unu ga na-eri nke ochie ruo mgbe ihe ubi ọhụrụ ga-apụta. 23  “‘Ya mere, a gaghị ere ala n’enweghị mgbe a ga-agbara ya,+ n’ihi na ọ bụ m nwe ala.+ N’ihi na n’anya m, unu bụ ndị mbịarambịa na ndị ọbịa.+ 24  N’ala niile bụ́ nke unu, unu ga-eme ka e nwee ikike ịgbara ala e rere ere.+ 25  “‘Ọ bụrụ na nwanne gị adaa ogbenye wee ree ụfọdụ n’ime ala ya, onye bụ́ ezigbo onye ikwu ya ga-abịa gbara ihe ahụ nwanne ya rere.+ 26  Ọ bụrụ na ọ dị onye na-enweghị onye ga-agbara ihe o rere, o wee nweta uru, nwetakwa ihe ga-ezuru ya ịgbara ya, 27  ọ ga-agbakọ afọ ole gabigara malite na mgbe o rere ya, ọ ga-enyeghachi onye o resịrị ya ego ole fọdụrụ, ọ ga-alaghachikwa n’ihe nketa ya.+ 28  “‘Ma ọ bụrụ na o nwetaghị ihe zuru iji kwụghachi ya, ihe ahụ o rere ga-adịgide n’aka onye zụrụ ya ruo n’afọ Jubili;+ ọ ga-apụ ya n’aka n’afọ Jubili, ọ ga-alaghachi n’ihe nketa ya.+ 29  “‘Ọ bụrụ na mmadụ eree ụlọ obibi nke dị n’obodo nwere mgbidi, ọ ga-anọgide na-enwe ikike ịgbara ya ruo mgbe otu afọ gabigara malite na mgbe o rere ya; ikike o nwere ịgbara ya+ ga-adịgide ruo otu afọ zuru ezu. 30  Ma ọ bụrụ na a agbaraghị ya tupu otu afọ ahụ ezuo, ụlọ ahụ nke dị n’obodo nwere mgbidi ga na-abụ ihe onwunwe nke onye zụrụ ya ruo n’ọgbọ ya niile. Ọ gaghị apụ ya n’aka n’afọ Jubili. 31  Otú ọ dị, a ga-ewere ụlọ ndị dị n’obodo nta na-enweghị mgbidi dị ka ala ubi ndị dị n’ime ime obodo. A ka ga-enwe ikike ịgbara ya,+ ọ ga-apụ mmadụ n’aka n’afọ Jubili.+ 32  “‘Ma obodo ndị Livaị na ụlọ ndị dị n’obodo ndị bụ́ ihe nketa ha,+ ndị Livaị ga na-enwe ikike ịgbara ya ruo mgbe a na-akaghị aka.+ 33  Ọ bụrụ na a gbaraghị ihe onwunwe ndị Livaị, ụlọ e rere n’obodo ebe ihe nketa ya dị ga-apụ n’aka onye zụrụ ya n’afọ Jubili;+ n’ihi na ụlọ ndị dị n’obodo ndị Livaị bụ ihe nketa ha n’etiti ụmụ Izrel.+ 34  A gaghịkwa ere ala ịta ahịhịa+ nke obodo ha ere, n’ihi na ọ bụ ihe nketa ha ruo mgbe a na-akaghị aka. 35  “‘Ọ bụrụkwa na nwanne gị nke bi gị nso adaa ogbenye,+ o nweghịkwa ego, ị ga-enye ya ihe na-akpa ya.+ Dị ka onye mbịarambịa na onye ọbịa,+ ọ ga-eso gị dịrị ndụ. 36  Anala ya ọmụrụ nwa, anakwala ya ụma,+ kama tụọ egwu Chineke gị;+ nwanne gị ga-esoro gị dịrị ndụ. 37  Enyela ya ego wee chọọ ka o nye gị ọmụrụ nwa,+ enyekwala ya ihe oriri gị wee nara ya ụma. 38  Abụ m Jehova bụ́ Chineke unu, onye kpọpụtara unu n’ala Ijipt ka m wee nye unu ala Kenan,+ iji gosi na m bụ Chineke unu.+ 39  “‘Ọ bụrụ na nwanne gị nke bi gị nso adaa ogbenye, o wee resị gị onwe ya,+ ị gaghị eji ya mere ohu.+ 40  Ọ ga-ebinyere gị dị ka onye ọrụ e goro ego,+ dị ka onye ọbịa. Ọ ga na-ejere gị ozi ruo n’afọ Jubili. 41  Ọ ga-ahapụkwa gị, ya na ụmụ ya, laghachikwuru ezinụlọ ya, ọ ga-alaghachikwa n’ihe nketa nna nna ya hà.+ 42  N’ihi na ha bụ ndị ohu m, ndị m kpọpụtara n’ala Ijipt.+ Ha agaghị ere onwe ha otú e si ere ohu. 43  Ejila obi ọjọọ zọda ya,+ tụọ egwu Chineke gị.+ 44  Ma ị pụrụ isi ná mba ndị gbara unu gburugburu nweta ohu gị nwoke na ohu gị nwaanyị; ọ bụ n’etiti ha ka unu pụrụ ịzụrụ ohu nwoke na ohu nwaanyị. 45  Unu pụkwara isi n’etiti ụmụ ndị ọbịa bụ́ ndị bi dị ka ndị mbịarambịa n’etiti unu+ nakwa n’ezinụlọ ha bụ́ ndị bi n’etiti unu, ndị a mụụrụ ha n’ala unu, zụrụ ha; ha ga-aghọkwa nke unu. 46  Ị ga-enyefekwa ha ụmụ gị ndị ga-anọchi gị dị ka ihe nketa ka ha bụrụ ihe nketa ha ruo mgbe a na-akaghị aka.+ Unu pụrụ iji ha mere ndị ọrụ, ma unu ejila obi ọjọọ zọda ụmụnne unu, bụ́ ụmụ Izrel, onye azọdala ibe ya.+ 47  “‘Ma ọ bụrụ na onye mbịarambịa ma ọ bụ onye ọbịa bi n’etiti unu abaa ọgaranya, ma nwanne gị bi ya nso adaa ogbenye, o wee resị onye mbịarambịa ma ọ bụ onye ọbịa bi n’etiti unu onwe ya, ma ọ bụ resị otu onye n’ezinụlọ onye mbịarambịa onwe ya, 48  mgbe o reworo onwe ya,+ a ga-enwe ikike ịgbara ya.+ Otu n’ime ụmụnne ya ndị ikom pụrụ ịgbara ya.+ 49  Nwanne nna ya ma ọ bụ nwa nwanne nna ya pụrụ ịgbara ya, ma ọ bụ onye ikwu ya ọ bụla nke ya na ya bụ otu ọbara,+ onye si n’ezinụlọ ya, pụrụ ịgbara ya. “‘Ma ọ bụ, ọ bụrụ na ọ baa ọgaranya, ọ ga-agbapụta onwe ya.+ 50  Ya na onye zụụrụ ya ga-agbakọ ihe niile malite n’afọ o resịrị ya onwe ya ruo n’afọ Jubili,+ ego ole o rere onwe ya ga-ekwekọ n’afọ ole ahụ.+ Ọ ga na-ejere ya ozi otú e si agụkọ ụbọchị ọrụ nke onye ọrụ e goro ego.+ 51  Ọ bụrụ na ọ ka fọrọ ọtụtụ afọ, ọ ga-akwụ ụgwọ iji gbara onwe ya site n’ịkwụghachi ihe fọdụrụ n’ego e ji zụrụ ya, dabere n’afọ ole fọdụrụ. 52  Ma ọ bụrụ na ọ bụ naanị afọ ole na ole fọdụrụ tupu afọ Jubili+ eruo, ọ ga-agbakọ ya. Ọ ga-akwụ ụgwọ iji gbara onwe ya dabere n’afọ ole fọdụụrụ ya. 53  Ọ ga na-ejere ya ozi dị ka onye ọrụ e goro ego+ site n’afọ ruo n’afọ. Ọ gaghị eji obi ọjọọ zọda ya+ n’ihu gị. 54  Otú ọ dị, ọ bụrụ na ọ gaghị agbapụtali onwe ya n’ụzọ kwekọrọ n’ihe ndị a e kwuru, ọ ga-enwere onwe ya n’afọ Jubili,+ ya na ụmụ ya. 55  “‘N’ihi na ụmụ Izrel bụ ndị ohu m. Ha bụ ndị ohu m,+ ndị m kpọpụtara n’ala Ijipt.+ Abụ m Jehova bụ́ Chineke unu.+

Ihe E Dere n'Ala Ala Peeji