Gbanwee otú ọ ga-esi egosi

Họrọ asụsụ

Gaa na menu nke abụọ

Gaa n'ebe e dere isiokwu ndị dị na ya

Gaa n'Isiokwu

Ndịàmà Jehova

Igbo

Baịbụl nke Dị n'Ịntanet

BAỊBỤL NSỌ—NSỤGHARỊ ỤWA ỌHỤRỤ NKE AKWỤKWỌ NSỌ

Levitikọs 16:1-34

16  Jehova wee gwa Mozis okwu mgbe ụmụ Erọn abụọ nwụsịrị bụ́ ndị nwụrụ n’ihi na ha bịara n’ihu Jehova n’ụzọ na-ekwesịghị ekwesị.+  Jehova wee gwa Mozis, sị: “Gwa Erọn nwanne gị nwoke na ọ bụghị mgbe niile ka ọ ga na-abata n’ebe nsọ,+ n’ime ákwà mgbochi ahụ,+ n’ihu ihe mkpuchi e ji kpuchie Igbe ahụ, ka ọ ghara ịnwụ;+ n’ihi na m ga na-apụta n’ígwé ojii+ n’elu ihe mkpuchi ahụ.+  “Erọn ga-eji ihe ndị a na-abata n’ebe nsọ:+ nwa oké ehi maka àjà mmehie+ na ebule maka àjà nsure ọkụ.+  Ọ ga-eyiri uwe mwụda dị nsọ nke e ji ákwà linin mee,+ ọ ga-eyirikwa uwe úkwù e ji linin mee,+ ọ ga-eke ákwà e ji linin mee n’úkwù+ ma kee ákwà e ji linin mee n’isi.+ Ha bụ uwe dị nsọ.+ Ọ ga-asa ahụ́ na mmiri+ wee yiri ha.  “Ọ ga-anata nzukọ ụmụ Izrel+ ụmụ mkpi abụọ maka àjà mmehie+ na otu ebule maka àjà nsure ọkụ.+  “Erọn ga-achụ oké ehi àjà mmehie, nke bụ́ maka onwe ya, n’àjà,+ ọ ga-ekpuchikwara+ onwe ya mmehie ya,+ kpuchiekwara ụlọ ya.+  “Ọ ga-akpụrụ mkpi abụọ ahụ mee ka ha guzo n’ihu Jehova n’ọnụ ụzọ ụlọikwuu nzute.  Erọn ga-efe nza+ maka mkpi abụọ ahụ, otu nza ga-ama nke ga-agara Jehova, nza nke ọzọ ga-ama nke ga-agara Azezel.+  Erọn ga-achụ mkpi nke nza maara+ Jehova n’àjà, ọ ga-eme ka ọ bụrụ àjà mmehie.+ 10  Ma, a ga-eme ka mkpi nke nza maara Azezel guzo n’ihu Jehova ná ndụ ka e were ya kpuchie mmehie, ka e wee kpụga+ ya n’ala ịkpa+ maka Azezel. 11  “Erọn ga-eweta oké ehi àjà mmehie ahụ, nke bụ́ maka onwe ya, wee kpuchiere onwe ya mmehie ya, kpuchiekwara ụlọ ya; ọ ga-egbukwa oké ehi àjà mmehie ahụ, nke bụ́ maka onwe ya.+ 12  “Ọ ga-ewere ihe ịgụ ọkụ+ nke a gụjuru icheku ọkụ nke si n’ebe ịchụàjà+ nke dị n’ihu Jehova, tinyere ihe nsure ọkụ na-esi ísì ụtọ+ o kpojuru aka ya abụọ,+ ọ ga-ewebatakwa ha n’ime ákwà mgbochi ahụ.+ 13  Ọ ga-awụsakwa ihe nsure ọkụ ahụ na-esi ísì ụtọ n’elu ọkụ ahụ n’ihu Jehova,+ anwụrụ ọkụ nke ihe nsure ọkụ ahụ na-esi ísì ụtọ ga-ekpuchi ihe mkpuchi Igbe ahụ,+ bụ́ nke dị n’elu Ihe Àmà ahụ,+ ka ọ ghara ịnwụ. 14  “Ọ ga-eweretụ ọbara oké ehi+ ahụ ma jiri mkpịsị aka ya fesa ya n’ihu ihe mkpuchi ahụ n’akụkụ ebe ọwụwa anyanwụ, ọ ga-ejikwa mkpịsị aka ya fesa+ ọbara ahụ ugboro asaa n’ihu ihe mkpuchi ahụ.+ 15  “Ọ ga-egbu mkpi àjà mmehie ahụ, nke bụ́ maka ụmụ Izrel,+ ọ ga-ewebata ọbara ya n’ime ákwà mgbochi+ ahụ ma were ọbara ya+ mee otu ihe ahụ o ji ọbara oké ehi ahụ mee; ọ ga-efesakwa ya n’ihu ihe mkpuchi ahụ. 16  “Ọ ga-ekpuchi mmehie nke ebe nsọ ahụ n’ihi adịghị ọcha+ nke ụmụ Izrel nakwa n’ihi nnupụisi ha na mmehie niile ha;+ otú ahụ ka ọ ga-eme maka ụlọikwuu nzute, bụ́ nke dị n’etiti ha n’adịghị ọcha ha. 17  “Mmadụ ọzọ agaghị anọ n’ụlọikwuu nzute ahụ malite n’oge ọ banyere n’ebe nsọ ahụ ịga kpuchie mmehie ruo mgbe ọ pụtara; ọ ga-ekpuchiri onwe ya mmehie ya,+ kpuchiere ụlọ ya, kpuchiekwara ọgbakọ Izrel dum.+ 18  “Ọ ga-apụta gaa n’ebe ịchụàjà ahụ,+ bụ́ nke dị n’ihu Jehova wee kpuchie mmehie ya, ọ ga-eweretụ ọbara oké ehi ahụ na ọbara mkpi ahụ tee ya na mpi ebe ịchụàjà ahụ gburugburu.+ 19  Ọ ga-ejikwa mkpịsị aka ya fesa+ ọbara ahụ n’elu ya ugboro asaa wee mee ka ọ dị ọcha, dookwa ya nsọ pụọ n’adịghị ọcha nke ụmụ Izrel. 20  “Mgbe o kpuchisịịrị ebe nsọ ahụ na ụlọikwuu nzute ahụ na ebe ịchụàjà ahụ mmehie,+ ọ ga-akpụta mkpi ahụ dị ndụ.+ 21  Erọn ga-ebikwasị aka ya abụọ+ n’isi mkpi ahụ dị ndụ wee kwupụta+ njehie niile+ nke ụmụ Izrel na nnupụisi niile ha na mmehie niile ha+ n’isi ya, ọ ga-eme ka ha dịrị n’isi mkpi ahụ+ ma mee ka nwoke nọ na-echere+ kpụrụ ya kpụga n’ala ịkpa.+ 22  Mkpi ahụ ga-eburu njehie niile ha+ banye n’ọzara,+ ọ ga-akpụga mkpi ahụ n’ala ịkpa.+ 23  “Erọn ga-abata n’ụlọikwuu nzute wee yipụ uwe linin ahụ o yi mgbe ọ banyere n’ebe nsọ ahụ, ọ ga-awụsa ha n’ebe ahụ.+ 24  Ọ ga-asa ahụ́ na mmiri+ n’ebe dị nsọ+ ma yiri uwe ya+ pụta chụọ àjà nsure ọkụ nke ya+ na àjà nsure ọkụ nke ụmụ Izrel+ wee kpuchiere onwe ya mmehie ya, kpuchiekwara ụmụ Izrel mmehie ha.+ 25  Ọ ga-esure abụba nke anụ àjà mmehie ahụ n’ọkụ n’elu ebe ịchụàjà.+ 26  “Ma onye+ ahụ nke kpụpụrụ mkpi ahụ maka Azezel+ ga-asụ uwe ya, ọ ga-asa ahụ́ na mmiri,+ e mesịakwa, ọ ga-abata n’ebe unu mara ụlọikwuu. 27  “Otú ọ dị, ọ ga-ahụ na e bupụrụ oké ehi àjà mmehie ahụ na mkpi àjà mmehie ahụ, bụ́ ndị e bubatara ọbara ha n’ebe nsọ maka iji kpuchie mmehie, ná mpụga ebe unu mara ụlọikwuu; ha ga-akpọ akpụkpọ ha na anụ ha na nsị ha ọkụ.+ 28  Onye kpọrọ ha ọkụ ga-asụ uwe ya, ọ ga-asa ahụ́ na mmiri, e mesịakwa, ọ ga-abata n’ebe unu mara ụlọikwuu. 29  “Ọ ga-abụrụ unu ụkpụrụ na-adịru mgbe a na-akaghị aka:+ N’ọnwa nke asaa, n’abalị iri n’ọnwa ahụ,+ unu ga-emekpa mkpụrụ obi unu ahụ́,+ unu arụla ọrụ ọ bụla,+ ma nwa afọ ma onye mbịarambịa nke bi dị ka ọbịa n’etiti unu. 30  N’ihi na ọ bụ n’ụbọchị ahụ ka a ga na-ekpuchiri unu mmehie+ unu iji kwupụta na unu dị ọcha. A ga-asachapụ mmehie unu niile n’ihu Jehova.+ 31  Ọ bụ ụbọchị izu ike,+ nke a ga-ezu naanị ike na ya, unu ga-emekpakwa mkpụrụ obi unu ahụ́. Ọ bụ ụkpụrụ ga-adịru mgbe a na-akaghị aka. 32  “Onye nchụàjà a ga-ete mmanụ+ bụ́ onye a ga-enye ikike ịrụ ọrụ dị ka onye nchụàjà,+ dị ka onye ga-anọchi+ nna ya, ga na-ekpuchi mmehie, ọ ga-eyirikwa uwe ndị ahụ e ji linin mee.+ Ha bụ uwe dị nsọ.+ 33  Ọ ga-ekpuchiri ebe nsọ ahụ mmehie,+ ọ ga-ekpuchikwara ụlọikwuu+ nzute ahụ na ebe ịchụàjà+ ahụ mmehie; ọ ga-ekpuchikwara ndị nchụàjà mmehie ha, kpuchiekwara mmadụ niile n’ọgbakọ ahụ.+ 34  Nke a ga-abụrụ unu ụkpụrụ na-adịru mgbe a na-akaghị aka,+ iji na-ekpuchiri ụmụ Izrel mmehie niile ha otu ugboro kwa afọ.”+ O wee mee nnọọ dị ka Jehova nyere Mozis n’iwu.

Ihe E Dere n'Ala Ala Peeji