Gbanwee otú ọ ga-esi egosi

Họrọ asụsụ

Gaa na menu nke abụọ

Gaa n'ebe e dere isiokwu ndị dị na ya

Gaa n'Isiokwu

Ndịàmà Jehova

Igbo

Baịbụl nke Dị n'Ịntanet

BAỊBỤL NSỌ—NSỤGHARỊ ỤWA ỌHỤRỤ NKE AKWỤKWỌ NSỌ

Emọs 9:1-15

9  Ahụrụ m Jehova ka ọ nọ n’elu ebe ịchụàjà,+ o wee sị: “Tie ihe n’isi ogidi, ka ụzọ mbata niile wee mee mkpatụ. Gbujipụ isi ha, ha niile.+ M ga-ejikwa mma agha gbuo ndị fọdụrụ n’ime ha. Ọ dịghị onye n’ime ha na-agbapụ agbapụ nke pụrụ ịgbala. Ọ dịghịkwa onye n’ime ha na-agba ọsọ nke ga-alanahụ.+  Ọ bụrụ na ha egwuo ala wee banye n’ime Shiol, aka m ga-esi n’ebe ahụ kpụrụ ha;+ ọ bụrụ na ha arịgoo n’eluigwe, m ga-esi n’ebe ahụ kpụdata ha.+  Ọ bụrụ na ha ezoo n’elu ugwu Kamel, m ga-achọ ha nke ọma n’ebe ahụ. M ga-ejiderịrị ha.+ Ọ bụrụkwa na ha ezoo n’ala ala oké osimiri+ ka m ghara ịhụ ha, m ga-enye agwọ iwu ka ọ taa ha n’ebe ahụ.  Ọ bụrụ na ndị iro ha adọrọ ha n’agha, m ga-enye mma agha iwu ka o gbuo ha n’ebe ahụ;+ m ga-eme ka anya m dị n’ebe ha nọ iji mee ha ihe ọjọọ, ọ bụghị imere ha ihe ọma.+  Ọ bụ Ọkaakaa Onyenwe anyị, bụ́ Jehova nke ụsụụ ndị agha, kpara ala a aka, o wee gbazee;+ ndị niile bi n’ime ya ga-eru uju;+ ọ ga-etokwa dị ka osimiri Naịl, talatakwa dị ka osimiri Naịl nke Ijipt.+  “‘Onye na-arụ ebe e si arịgo n’eluigwe,+ na-ewukwa ihe owuwu ya n’elu ụwa nke ọ tọrọ ntọala ya;+ onye na-akpọ mmiri nke oké osimiri òkù,+ ka o wee wụsa ya n’elu ala+—Jehova bụ aha ya.’+  “‘Unu ụmụ Izrel, ọ̀ bụ na unu adịghị ka ụmụ Kush n’anya m?’ ka Jehova kwuru. ‘Ọ̀ bụ na mụ esighị n’ala Ijipt kpọpụta ụmụ Izrel,+ si na Krit kpọpụta ndị Filistia,+ sikwa na Kia+ kpọpụta Siria?’  “‘Lee! Anya Ọkaakaa Onyenwe anyị Jehova na-ele alaeze nke na-eme mmehie.+ Ọ ga-ekpochapụkwa ya n’elu ala.+ Ka o sina dị, m gaghị ekpochapụ ụlọ Jekọb kpamkpam,’+ ka Jehova kwuru.  ‘N’ihi na, lee! m na-enye iwu, m ga-ayọgharịkwa ụlọ Izrel n’etiti mba niile,+ dị ka mmadụ si ayọgharị myọ, ma otu obere okwute agaghị ada n’ala. 10  A ga-eji mma agha gbuo ha, ya bụ, ndị niile na-eme mmehie n’etiti ndị m,+ bụ́ ndị na-asị: “Ọdachi ahụ agaghị abịaru anyị nso ma ọ bụ rute n’ebe anyị nọ.”’+ 11  “‘N’ụbọchị ahụ, m ga-ebuli+ ụlọ ndò+ Devid nke dara ada,+ m ga-edozikwa ebe ndị a kwadara akwada. M ga-ewu mkpọmkpọ ebe ya, m ga-ewuli ya elu dị ka ọ dị n’ogologo oge gara aga,+ 12  ka ha wee weghara ihe fọdụrụ n’Idọm,+ tinyere mba niile a kpọkwasịrị aha m,’+ ka Jehova kwuru, bụ́ onye na-eme ihe a. 13  “‘Lee! Ụbọchị na-abịa,’ ka Jehova kwuru, ‘mgbe onye na-akọ ihe ga-ejekwute onye na-ewe ihe ubi,+ onye na-azọcha mkpụrụ vaịn ga-ejekwutekwa onye bu mkpụrụ ọ na-agha;+ mmanya dị ụtọ ga-esi n’ugwu ukwu na-atapụta,+ ugwu nta niile ga na-agbazekwa.+ 14  M ga-akpọkọta ndị a dọọrọ n’agha n’ime ndị m Izrel.+ Ha ga-ewukwa ebe ndị tọgbọrọ n’efu ma biri n’ime ha,+ kọọ ubi vaịn ma ṅụọ mmanya ha, kọọkwa ubi ma rie mkpụrụ ha.’+ 15  “‘M ga-akụ ha n’ala ha dị ka mkpụrụ. A gaghị efopụkwa ha ọzọ n’ala ha nke m nyere ha,’+ ka Jehova bụ́ Chineke unu kwuru.”

Ihe E Dere n'Ala Ala Peeji