Gbanwee otú ọ ga-esi egosi

Họrọ asụsụ

Gaa na menu nke abụọ

Gaa n'ebe e dere isiokwu ndị dị na ya

Gaa n'Isiokwu

Ndịàmà Jehova

Igbo

Baịbụl nke Dị n'Ịntanet

BAỊBỤL NSỌ—NSỤGHARỊ ỤWA ỌHỤRỤ NKE AKWỤKWỌ NSỌ

1 Ndị Eze 12:1-33

12  Rehoboam+ wee gaa Shikem, n’ihi na ọ bụ na Shikem+ ka Izrel dum bịara ka ha mee ya eze.  O wee ruo na ngwa ngwa Jeroboam+ nwa Nibat nụrụ ya, mgbe ọ ka nọ n’Ijipt (n’ihi na ọ gbara ọsọ n’ihi Eze Sọlọmọn, ka Jeroboam wee biri n’Ijipt),+  ha wee zie ozi ka ọ bịa. E mesịa, Jeroboam na ọgbakọ Izrel dum bịara wee malite ịgwa Rehoboam, sị:+  “Nna gị mere ka yok anyị sie ike, ma gị onwe gị, mee ka ọrụ siri ike nna gị nyere anyị na yok ya dị arọ+ nke o boro anyị dị mfe,+ anyị ga-ejekwara gị ozi.”+  O wee sị ha: “Laanụ, bịaghachinụ n’ụbọchị nke atọ.”+ Ha wee laa.  Eze Rehoboam wee gakwuru ndị okenye+ bụ́ ndị jeere Sọlọmọn nna ya ozi mgbe ọ dị ndụ, ka ha nye ya ndụmọdụ, o wee sị ha: “Olee ihe unu na-adụ m ọdụ ka m zaa ndị a?”+  Ha wee sị ya: “Ọ bụrụ na ị ga-abụrụ ndị a ohu taa wee jeere ha ozi n’ezie,+ zaa ha ma gwa ha okwu ọma;+ ha ga-abụkwa ndị ohu gị mgbe niile.”+  Otú ọ dị, ọ hapụrụ ndụmọdụ ahụ ndị okenye nyere ya, o wee gakwuru ụmụ okorobịa ndị ya na ha tokọrọ,+ bụ́ ndị na-ejere ya ozi,+ ka ha nye ya ndụmọdụ.  O wee sị ha: “Olee ihe unu na-adụ m ọdụ+ ka anyị zaa ndị a gwara m, sị, ‘Mee ka yok nna gị boro anyị dị mfe’?”+ 10  Ụmụ okorobịa ahụ ya na ha tokọrọ wee sị ya: “Ihe a ka ị ga-agwa+ ndị a bụ́ ndị sịrị gị, ‘Nna gị mere ka yok anyị dị arọ, ma gị onwe gị mee ka ọ dị mfe n’ahụ́ anyị’; ihe a ka ị ga-agwa ha, ‘Mkpịsị aka nta m ga-adị okpotokpo karịa úkwù nna m.+ 11  Nna m boro unu yok dị arọ; ma mụ onwe m ga-atụkwasị ihe na yok unu.+ Nna m pịara unu ụtarị nkịtị, ma mụ onwe m ga-apịa unu ụtarị akpụkpọ anụ.’”+ 12  Jeroboam na ndị Izrel niile wee bịakwute Rehoboam n’ụbọchị nke atọ, dị nnọọ ka eze kwuru, sị: “Bịakwuteghachi m n’ụbọchị nke atọ.”+ 13  Eze wee zaa ha n’olu ike,+ o wee hapụ ndụmọdụ ndị okenye ahụ bụ́ ndị nyere ya ndụmọdụ.+ 14  O wee gaa n’ihu ịgwa ha okwu dị ka ndụmọdụ ụmụ okorobịa nyere ya si dị,+ sị: “Nna m mere ka yok unu dị arọ, ma mụ onwe m ga-atụkwasị ihe na yok unu. Nna m pịara unu ụtarị nkịtị, ma mụ onwe m ga-apịa unu ụtarị akpụkpọ anụ.”+ 15  Eze egeghịkwa ndị ahụ ntị,+ n’ihi na ihe a na-emenụ si n’aka Jehova,+ ka Jehova wee mezuo ihe ọ gwara+ Jeroboam nwa Nibat site n’ọnụ Ahaịja+ onye Shaịlo. 16  Mgbe Izrel dum hụrụ na eze egeghị ha ntị, ha zara eze, sị: “Olee òkè anyị nwere na Devid?+ Ọ dịghịkwa ihe nketa anyị nwere na nwa Jesi. Lakwuru chi gị,+ Izrel! Lekwa ụlọ gị, Devid!+ Ndị Izrel wee lawa n’ụlọikwuu ha. 17  Ma Rehoboam nọ na-achị ụmụ Izrel ndị bi n’obodo ndị dị na Juda.+ 18  Eze Rehoboam wee ziga Adọram,+ bụ́ onye na-elekọta ndị a kpọọrọ ịrụ ọrụ mmanye,+ ma Izrel dum ji nkume tụgbuo ya.+ Ma Eze Rehoboam jisiri ike rịgoro n’ụgbọ ịnyịnya gbalaa Jeruselem. 19  Ụmụ Izrel wee nọgide na-enupụrụ+ ụlọ Devid isi ruo taa.+ 20  O wee ruo na ozugbo Izrel dum nụrụ na Jeroboam alọghachiwo, ngwa ngwa ahụ ha zigara ozi wee kpọọ ya ka ọ bịa nzukọ ha, ha wee mee ya eze Izrel dum.+ Ọ dịghị ebo ọ bụla sooro ụlọ Devid ma e wezụga naanị Juda.+ 21  Mgbe Rehoboam rutere Jeruselem,+ ọ kpọkọtara ụlọ Juda na ebo Benjamin dum ozugbo,+ otu narị puku ndị ikom na iri puku asatọ ndị gbasiri ike a họrọ ahọ maka ibu agha, ka ha gaa buso ụlọ Izrel agha, iji mee ka Rehoboam nwa Sọlọmọn nwetaghachi ọchịchị. 22  Okwu nke ezi Chineke wee ruo Shemaya+ bụ́ onye nke ezi Chineke ntị,+ sị: 23  “Gwa Rehoboam nwa Sọlọmọn eze Juda nakwa ụlọ Juda na Benjamin dum na ndị fọdụrụ, sị, 24  ‘Nke a bụ ihe Jehova kwuru: “Unu agbagola ibuso ụmụnne unu, bụ́ ụmụ Izrel agha.+ Laghachinụ onye ọ bụla n’ụlọ ya, n’ihi na ihe a na-emenụ si m n’aka.”’”+ Ha wee rube isi n’ihe Jehova kwuru,+ wee laghachi n’ụlọ ha dị ka okwu Jehova si dị.+ 25  Jeroboam wee wuo Shikem+ n’ógbè Ifrem bụ́ ugwu ugwu wee biri na ya. O wee si n’ebe ahụ pụta wee wuo Penuel.+ 26  Jeroboam wee malite ịsị n’obi ya:+ “Alaeze a ga-alaghachiri ụlọ Devid.+ 27  Ọ bụrụ na ndị a anọgide na-agbago ịchụ àjà n’ụlọ Jehova na Jeruselem,+ obi ndị a ga-alaghachikwuru onyenwe ha, bụ́ Rehoboam eze Juda; ha ga-egburịrị m+ wee laghachikwuru Rehoboam eze Juda.” 28  Ya mere, eze natara ndụmọdụ+ wee mee nwa ehi ọlaedo abụọ+ ma gwa ndị ahụ, sị: “Ọ bụ ihe siri ike nke ukwuu unu ịgbagowe Jeruselem. Lee Chineke gị,+ Izrel, nke kpọpụtara gị n’ala Ijipt.”+ 29  O wee debe otu na Betel,+ debekwa nke ọzọ na Dan.+ 30  Ihe a wee bụrụ ihe na-eme ka ndị Izrel mehie,+ ha wee malite ịga n’ihu nke ahụ dị na Dan. 31  O wee malite ịrụ ụlọ n’ebe ndị dị elu,+ sikwa ná ndị nkịtị na-ahọrọ ndị ọ na-eme ndị nchụàjà, bụ́ ndị na-abụghị ụmụ Livaị.+ 32  Jeroboam wee mee ememme n’ọnwa nke asatọ n’abalị iri na ise n’ọnwa, dị ka ememme a na-eme na Juda,+ ka o wee chụọ àjà n’elu ebe ịchụàjà nke ọ rụrụ na Betel, ịchụrụ nwa ehi ndị ahụ o mere àjà; o wee debe ndị nchụàjà nke ebe ndị dị elu ndị ọ rụrụ ka ha na-eje ozi na Betel.+ 33  O wee malite ịchụ àjà n’elu ebe ịchụàjà nke ọ rụrụ na Betel n’abalị iri na ise n’ọnwa asatọ, n’ọnwa nke o chepụtara n’onwe ya;+ o wee meere ụmụ Izrel ememme, chụọkwa àjà n’elu ebe ịchụàjà iji suree ihe nsure ọkụ.+

Ihe E Dere n'Ala Ala Peeji