Gbanwee otú ọ ga-esi egosi

Họrọ asụsụ

Gaa na menu nke abụọ

Gaa n'ebe e dere isiokwu ndị dị na ya

Gaa n'Isiokwu

Ndịàmà Jehova

Igbo

Baịbụl nke Dị n'Ịntanet

BAỊBỤL NSỌ—NSỤGHARỊ ỤWA ỌHỤRỤ NKE AKWỤKWỌ NSỌ

Ọpụpụ 33:1-23

33  Jehova gwara Mozis ọzọ, sị: “Gawa, si n’ebe a gbagoo, gị na ndị ahụ i dupụtara n’ala Ijipt,+ gaanụ n’ala ahụ m ṅụụrụ Ebreham, Aịzik na Jekọb iyi, sị, ‘Ọ bụ mkpụrụ gị ka m ga-enye ya.’+  M ga-ezipụkwa mmụọ ozi ka o butere gị ụzọ+ wee chụpụ ndị Kenan, ndị Amọraịt, na ndị Het na ndị Perizaịt, ndị Haịvaịt na ndị Jibọs;+  gaanụ n’ala mmiri ara ehi na mmanụ aṅụ na-eru na ya,+ n’ihi na agaghị m eso unu agbago, n’ihi na unu bụ ndị na-ekwesi olu ike,+ ka m wee ghara ikpochapụ unu n’ụzọ.”+  Mgbe ndị Izrel nụrụ ozi ọjọọ a, ha malitere iru uju;+ ọ dịghịkwa onye ọ bụla n’ime ha yi ihe ịchọ mma ya.  Jehova wee sị Mozis: “Gwa ụmụ Izrel, sị, ‘Unu bụ ndị na-ekwesi olu ike.+ M pụrụ ịgbagote n’etiti unu n’otu ntabi anya+ wee kpochapụ unu. Ya mere, yipụnụ ihe ịchọ mma unu, n’ihi na m chọrọ ịmara ihe m ga-eme unu.’”+  Ụmụ Izrel wee yipụsịa ihe ịchọ mma ha malite n’Ugwu Horeb+ gaa n’ihu.  Ma Mozis fopụrụ ụlọikwuu ya wee maa ya ná mpụga ebe ha mara ụlọikwuu, n’ebe dị anya n’ebe ha mara ụlọikwuu; o wee kpọọ ya ụlọikwuu nzute. O wee ruo na onye ọ bụla nke chọrọ ịjụ Jehova ase+ na-aga n’ụlọikwuu nzute, nke dị ná mpụga ebe ha mara ụlọikwuu.  O wee ruo na ozugbo Mozis pụrụ gaa n’ụlọikwuu ahụ, mmadụ niile na-ebili,+ onye ọ bụla na-eguzokwa n’ọnụ ụzọ ụlọikwuu ya, ha na-elegide Mozis anya ruo mgbe ọ banyere n’ụlọikwuu ahụ.  Ọ na-erukwa na ozugbo Mozis banyere n’ụlọikwuu ahụ, ogidi ígwé ojii+ na-agbadata wee guzo n’ọnụ ụzọ ụlọikwuu ahụ, Chineke na Mozis ewee kwurịta okwu.+ 10  Mmadụ niile hụrụ ka ogidi ígwé ojii+ ahụ guzo n’ọnụ ụzọ ụlọikwuu ahụ, ha niile wee bilie kpọọ isiala, onye nke ọ bụla n’ọnụ ụzọ ụlọikwuu ya.+ 11  Jehova wee gwa Mozis okwu ihu na ihu,+ dị nnọọ ka mmadụ si agwa mmadụ ibe ya okwu. Mgbe ọ laghachiri n’ebe ha mara ụlọikwuu, onye ozi ya+ bụ́ Jọshụa, nwa Nọn,+ dị ka onye na-eje ozi, adịghị esi n’ime ụlọikwuu ahụ apụ. 12  Mozis wee sị Jehova: “Lee, ị na-asị m, ‘Duru ndị a gbagoo,’ ma gị onwe gị emebeghị ka m mara onye ị ga-edunye mụ na ya. Gị onwe gị asịwokwa, ‘Ama m gị n’aha,+ ihe gị masịkwara m.’ 13  Ugbu a, biko, ọ bụrụ na ihe m masịrị gị,+ biko, mee ka m mara ụzọ gị,+ ka m wee mara gị, ka ihe m wee masị gị. Chetakwa na mba a bụ ndị gị.”+ 14  N’ihi ya ọ sịrị: “Mụ onwe m ga-eso gị gaa,+ m ga-emekwa ka i zuru ike.”+ 15  Mozis wee sị ya: “Ọ bụrụ na gị onwe gị agaghị eso anyị gaa, edurula anyị pụọ n’ebe a. 16  Gịnịzi ka a ga-eji amara na ihe mụ na ndị gị masịrị gị? Ọ́ bụghị ma gị onwe gị soro anyị,+ n’ihi na e mewo ka mụ na ndị gị dị iche n’ebe ndị niile ọzọ nọ bụ́ ndị nọ n’elu ala?”+ 17  Jehova wee gaa n’ihu ịsị Mozis: “M ga-emekwa ihe a i kwuru okwu ya,+ n’ihi na ihe gị masịrị m, amakwaara m gị n’aha.” 18  O wee sị: “Biko, mee ka m hụ ebube gị.”+ 19  Ma ọ sịrị: “Mụ onwe m ga-eme ka ịdị mma m dum gabiga n’ihu gị,+ m ga-akpọsakwa aha Jehova n’ihu gị;+ onye m chọrọ imere amara ka m ga-emere amara, onye m chọkwara imere ebere ka m ga-emere ebere.”+ 20  Ọ sịkwara: “I nweghị ike ịhụ ihu m, n’ihi na ọ dịghị mmadụ ga-ahụ ihu m ma dị ndụ.”+ 21  Jehova kwukwara, sị: “Lee ebe a, n’akụkụ m, ị ga-eguzokwa n’elu oké nkume a. 22  Ọ ga-erukwa na mgbe ebube m na-agafe, m ga-eme ka ị banye n’otu ọgba dị n’oké nkume a, m ga-ejikwa ọbụ aka m kpuchie gị ruo mgbe m gafeworo. 23  E mesịa, m ga-ewepụ ọbụ aka m, ị ga-ahụkwa azụ m n’ezie. Ma ị gaghị ahụ ihu m.”+

Ihe E Dere n'Ala Ala Peeji