Gbanwee otú ọ ga-esi egosi

Họrọ asụsụ

Gaa na menu nke abụọ

Gaa n'ebe e dere isiokwu ndị dị na ya

Gaa n'Isiokwu

Ndịàmà Jehova

Igbo

Jizọs Bụ Ụzọ, Eziokwu, na Ndụ

 ISI NKE 98

Ndịozi Ahụ Achọwakwa Ịbụ Ndị A Ma Ama Ọzọ

Ndịozi Ahụ Achọwakwa Ịbụ Ndị A Ma Ama Ọzọ

MATIU 20:17-28 MAK 10:32-45 LUK 18:31-34

  • JIZỌS EKWUGHACHI BANYERE ỌNWỤ YA

  • JIZỌS AGBAZIE NDỊOZI YA MGBE HA CHỌRỌ ỊBỤ NDỊ A MA AMA

Jizọs na ndị na-eso ụzọ ya ka nọ na njem ha. Ha si Peria gafere Osimiri Jọdan nke dị nso na Jeriko na-aga Jeruselem maka Ememme Ngabiga nke afọ 33. Ọtụtụ ndị ọzọ sokwa ha na-aga.

Jizọs nọ ndị na-eso ụzọ ya n’ihu n’ihi na ọ na-agasi ike ka o ruo n’oge maka Ememme Ngabiga ahụ. Ma, ụjọ na-atụ ndị na-eso ụzọ ya. N’oge gara aga mgbe Lazarọs nwụrụ, Jizọs achọọ isi Peria gaa Judia, Tọmọs gwara ndịozi ibe ya, sị: “Ka anyị onwe anyị gaakwa, ka anyị wee soro ya nwụọ.” (Jọn 11:16, 47-53) O doro anya na ọ dị ize ndụ ịga Jeruselem. Ọ bụ ya mere ndị na-eso ụzọ ya ji na-atụ ụjọ.

Ma, Jizọs kwadebere ha maka ihe na-aga ime. Ọ kpọpụrụ ha iche ma gwa ha, sị: “Lee! Anyị na-agbago Jeruselem, a ga-enyefe Nwa nke mmadụ n’aka ndị isi nchụàjà na ndị odeakwụkwọ, ha ga-amakwa ya ikpe ọnwụ, ha ga-enyefekwa ya n’aka ndị mba ọzọ ka ha were ya mee ihe ọchị, pịakwa ya ihe ma kpọgide ya n’osisi, n’ụbọchị nke atọ, a ga-akpọlite ya.”—Matiu 20:18, 19.

Nke a bụ nke ugbo atọ Jizọs na-agwa ndịozi ya banyere ọnwụ ya na mbilite n’ọnwụ ya. (Matiu 16:21; 17:22, 23) Ma na nke ụgbụ a, o kwuru na a ga-akpọgbu ya n’elu osisi. Ha nọ na-ege ya ntị, ma ha aghọtaghị ihe okwu ya pụtara. Ọ ga-abụ na ha na-atụ anya mgbe a ga-eweghachi alaeze Izrel ka ha soro Jizọs chịwa ma na-enweta otuto na nsọpụrụ.

Nne Jems na Jọn bụ́ Salomi so ná ndị ahụ so Jizọs na-aga Jeruselem. Jizọs gụrụ Jems na Jọn aha pụtara “Ụmụ Égbè Eluigwe,” n’ihi otú ihe si anụ ha ọkụ n’obi. (Mak 3:17; Luk 9:54) O teela ndịozi abụọ a chọwara ịbụ ndị a ma ama n’Alaeze Kraịst. Nne ha makwa. Ọ gakwuuru Jizọs, kpọọrọ ya isiala ma rịọwa ya arịrịọ. Jizọs sịrị ya: “Gịnị ka ị chọrọ?” Nwaanyị ahụ asị ya: “Kwuo ka ụmụ m ndị ikom abụọ a nọdụ ala, otu onye n’aka nri gị, otu onye n’aka ekpe gị, n’alaeze gị.”—Matiu 20:20, 21.

Nke bụ́ eziokwu bụ na ọ bụ Jems na Jọn ka ọ na-arịọchitere arịrịọ a. Ebe ọ bụ na Jizọs agwabuola ha na a ga-eji ya eme ihe ọchị, taakwa ya ahụhụ, ọ gwaziri ha, sị: “Unu amaghị ihe unu na-arịọ. Ùnu pụrụ ịṅụ iko nke m na-aga ịṅụ?” Ha sịrị ya: “Anyị pụrụ ịṅụ ya.” (Matiu 20:22) Ma, ọ ga-abụ na ha aghọtabeghị ụdị ahụhụ ha ga-ata tupu ha eketa Alaeze Kraịst.

Jizọs gwaziri ha, sị: “Unu ga-aṅụ iko m, ma ọ bụghị m na-eme ka a nọdụ n’aka nri m na n’aka ekpe m, kama ọ dịịrị ndị Nna m kwadebeere ya.”—Matiu 20:23.

Mgbe ndịozi iri ndị ọzọ nụrụ ihe a Jems na Jọn rịọrọ, iwe were ha. O nwere ike ịbụ na Jems na Jọn rụsiri ụka ike mgbe ahụ ndịozi nọ na-arụrịta ụka gbasara onye ga-akacha ukwuu n’ime ha. (Luk 9:46-48) Ma hà rụsiri ụka ike mgbe ahụ ma ọ̀ bụ na ha arụsighị, ihe a ha rịọrọ gosiri na ndịozi ahụ niile ebidobeghị werewe onwe ha ka ndị dị ala otú ahụ Jizọs kụziiri ha.

Jizọs bịaziri dozie okwu a biliterenụ. Ọ kpọrọ ndịozi iri na abụọ ahụ ma jiri obi ọma nye ha ndụmọdụ. Ọ sịrị ha: “Unu maara na ndị e weere na ha bụ ndị na-achị ndị mba ọzọ na-eme ha ka ọ̀ bụ ha nwe ha, ndị ukwu ha na-achịkwa ha n’aka ike. O kwesịghị ịdị otú ahụ n’etiti unu; kama onye ọ bụla nke na-achọ ịbụ onye ukwu n’etiti unu aghaghị ịbụ onye na-ejere unu ozi, onye ọ bụla nke na-achọkwa ịbụ onye mbụ n’etiti unu aghaghị ịbụ ohu nke mmadụ niile.”—Mak 10:42-44.

Jizọs gwaziri ha ihe o mere nke ha kwesịrị iṅomi. Ọ sịrị: “Nwa nke mmadụ bịara, ọ bụghị ka e jeere ya ozi, kama ka o jee ozi, ka o nyekwa mkpụrụ obi ya ka ọ bụrụ ihe mgbapụta n’ọnọdụ ọtụtụ mmadụ.” (Matiu 20:28) Kemgbe ihe dị ka afọ atọ, Jizọs nọ na-ejere ndị ọzọ ozi. Ọ ka ga-emekwa nke kanụ, ya bụ, ịnwụchitere ụmụ mmadụ ọnwụ. O kwesịrị ịna-agụ ndị na-eso ụzọ Jizọs agụụ iwetu onwe ha ala na ịna-ejere ndị ọzọ ozi otú ahụ Jizọs na-eme, kama ịchọ ịbụ ndị a ma ama.