Gbanwee otú ọ ga-esi egosi

Họrọ asụsụ

Gaa na menu nke abụọ

Gaa n'ebe e dere isiokwu ndị dị na ya

Gaa n'Isiokwu

Ndịàmà Jehova

Igbo

Jizọs Bụ Ụzọ, Eziokwu, na Ndụ

 ISI NKE 51

E Gburu Mmadụ n’Otu Ememme Ncheta Ọmụmụ

E Gburu Mmadụ n’Otu Ememme Ncheta Ọmụmụ

MATIU 14:1-12 MAK 6:14-29 LUK 9:7-9

  • HERỌD ENYE IWU KA E GBUPỤ JỌN ONYE NA-EME BAPTIZIM ISI

Ndịozi Jizọs nọ na Galili na-ekwusa ozi ọma. Ma, onye bu ụzọ gwa ndị mmadụ banyere Jizọs enwereghị onwe ya ikwusa ozi ọma otú ahụ ha na-ekwusa. Onye ahụ bụ Jọn Onye Na-eme Baptizim. Ọ ka nọ n’ụlọ mkpọrọ kemgbe ihe fọrọ obere ka ọ bụrụ afọ abụọ ugbu a.

Jọn kwuru n’ezoghị ọnụ na ọ dị njọ Eze Herọd Antipas ịkpọrọ nwunye nwanne ya nwoke bụ́ Filip lụwa. Herọd gbara nwunye mbụ ya alụkwaghịm, lụwazie Herodias. N’Iwu Mozis, bụ́ nke Herọd sịrị na ya na-eso, ndị si otú a lụọ na-akwa iko, iwu akwadoghịkwa ya. N’ihi ihe a Jọn kwuru, Herọd nyere iwu ka a tụba ya n’ụlọ mkpọrọ. Ikekwe, ọ bụ Herodias gwara ya ka ọ tụọ Jọn mkpọrọ.

Herọd amaghị ihe ọ ga-eme Jọn n’ihi na ndị mmadụ ‘weere Jọn dị ka onye amụma.’ (Matiu 14:5) Ma, Herodias anaghị eche ihe a ga-eme ya eche. O “buuru Jọn iwe n’obi.” Ọ nọdị na-achọ ihe ya ga-eme ka e gbuo ya. (Mak 6:19) N’ikpeazụ, o nwetara ohere ọ na-achọ achọ kemgbe.

Obere oge tupu e mee Ememme Ngabiga nke afọ 32, Herọd mere nnukwu ememme iji cheta ụbọchị ọmụmụ ya. Ndị niile ọkwá ha dị elu n’ọchịchị Herọd, ndị isi agha, nakwa ụmụ amaala a ma ama na Galili bịachara ememme ahụ. Mgbe a na-eme ememme ahụ, a kpọpụtara Salomi, nwa Herodias mụtaara di mbụ ya bụ́ Filip, ka ọ bịa gbaa egwú. Egwú ọ gbara tọgburu ndị bịara ememme ahụ atọgbu.

Egwú ahụ nwa ahụ a mụtaara Filip gbara tọrọ Herọd ezigbo ụtọ nke na ọ sịrị ya: “Rịọ m ihe ọ bụla ị chọrọ, m ga-enyekwa gị ya.” Ọ ṅụdịrị iyi, sị: “Ihe ọ bụla ị rịọrọ m, m ga-enye gị ya, ruo ọkara nke alaeze m.” Ma, tupu Salomi ekwuo ihe ọ bụla, ọ pụrụ gaa jụọ nne ya, sị: “Gịnị ka m ga-arịọ?”—Mak 6:22-24.

Ụdị ohere a ka Herodias nọ na-achọ kemgbe. Ọ zara nwa ya ozugbo, sị: “Isi Jọn onye na-eme baptizim.” Salomi egbughị oge bịaghachi gwa Herọd ihe ọ chọrọ ka o meere ya. Ọ sịrị ya: “Achọrọ m ka i bunye m isi Jọn Onye Na-eme Baptizim ozugbo n’efere dị mbadamba.”—Mak 6:24, 25.

Ihe a ọ rịọrọ wutere Herọd nke ukwuu. Mana, ndị bịara ememme ahụ nụrụ nkwa ahụ o kwere Salomi. Ọ ga-eme ya ihere ma ọ bụrụ na o mezughị nkwa ahụ o kwere n’agbanyeghị na ọ ga-eme ka o gbuo onye aka ya dị ọcha. N’ihi ya, Herọd zipụrụ ndị nche ya ka ha gaa n’ụlọ mkpọrọ gbute isi Jọn. O teghị aka ndị nche ahụ eburu isi Jọn n’efere lọghachi. Herọd bunyere ya Salomi, Salomi ebunye ya nne ya.

Mgbe ndị na-eso ụzọ Jọn nụrụ ihe merenụ, ha bịara buru ozu Jọn gaa lie, gazie kọọrọ Jizọs ihe merenụ.

Ka e mechara, mgbe Herọd nụrụ banyere Jizọs, na ọ na-agwọ ndị mmadụ ọrịa, na-achụpụkwa ha ndị mmụọ ọjọọ, egwu tụwara ya. Ọ nọ na-eche ma Jizọs a na-eme ihe ndị a ọ̀ bụ Jọn Onye Na-eme Baptizim ‘e si ná ndị nwụrụ anwụ kpọlite.’ (Luk 9:7) N’ihi ya, Herọd Antipas nọ na-achọsi ike otú ọ ga-esi hụ Jizọs. Ma, ihe o kwo na-achọ ịhụ ya abụghị ka o gee ntị n’ozi ọma ya. Kama, ọ chọrọ ịhụ ya iji mara ma ihe a ya na-eche ọ̀ bụ eziokwu ka ọ bụ na ọ bụghị.

GỤKWUO GBASARA YA

Gịnị Mere Ndịàmà Jehova Anaghị Eme Ememme Ncheta Ụbọchị Ọmụmụ?

Lee ihe anọ mere Chineke anaghị anabata ememme ụbọchị ọmụmụ.