Gbanwee otú ọ ga-esi egosi

Họrọ asụsụ

Gaa na menu nke abụọ

Gaa n'ebe e dere isiokwu ndị dị na ya

Gaa n'Isiokwu

Ndịàmà Jehova

Igbo

Jizọs Bụ Ụzọ, Eziokwu, na Ndụ

 ISI NKE 40

Jizọs Akụzie Gbasara Ịgbaghara Mmehie

Jizọs Akụzie Gbasara Ịgbaghara Mmehie

LUK 7:36-50

  • OTU NWAANYỊ A MA DỊ KA ONYE MMEHIE ETEE JIZỌS MMANỤ N’ỤKWỤ

  • JIZỌS EJIRI IHE ATỤ NKE ONYE JI ỤGWỌ KỤZIE BANYERE ỊGBAGHARA MMEHIE

Ihe ndị mmadụ na-eme mgbe ha nụrụ ihe Jizọs na-akụzi ma ọ bụ hụ ihe ndị ọ na-eme dịcha iche iche. Ọ bụ otú obi onye ọ bụla dị na-ekpebi ihe ọ na-eme. Ihe gosiri na ihe a bụ eziokwu bụ otu ihe mere mgbe Jizọs gara n’ụlọ otu nwoke na Galili. Nwoke ahụ bụ onye Farisii aha ya bụ Saịmọn. Ọ kpọrọ Jizọs ka ọ bịa rie ihe n’ụlọ ya. O nwere ike ịbụ na ihe mere o ji kpọọ ya n’ụlọ ya bụ ka ya lerugodị onye a na-arụ ọtụtụ ọrụ ebube anya. Jizọs nabatara òkù ahụ ọ kpọrọ ya otú ahụ o sikwa nabata nke ndị ọnaụtụ na ndị mmehie kpọrọ ya. Ọ ga-abụ na o lere ya anya ka ohere o nwere ike iji kwusaara ndị bịara ebe ahụ ozi ọma.

Ma, mgbe Jizọs ruru ebe ahụ, a nabataghị ya otú ndị Juu si anabata ndị ọbịa. Okporo ụzọ Palestaịn dị uzuzu uzuzu. Ụkwụ na-ekporo onye si na ya gaa ije ọkụ, na-adịkwa uzuzu uzuzu. N’ihi ya, ọ bụ omenala ndị Juu ibu ụzọ jiri mmiri oyi saa onye ọbịa ụkwụ. O so n’otú ha na-esi eleta ndị ọbịa. Ihe ọzọ ha na-emekarịkwa iji nabata onye ọbịa bụ isutụ ya ọnụ. Ma, a saghị Jizọs ụkwụ, o nweghịkwa onye sutụrụ ya ọnụ. Ihe ọma ọzọ a na-emere onye ọbịa bụ ite ya mmanụ n’isi. Ma, emekwaraghị Jizọs otú ahụ. Oleezi otú e si nabata ya?

Ndị niile a kpọrọ òkù nọdụrụ n’oche, nri amalite. Ka ha nọ na-eri nri, otu nwaanyị na-esoghị ná ndị a kpọrọ oriri ahụ ji nwayọọ bata ebe ahụ. Ọ bụ nwaanyị “a maara n’obodo ahụ na ọ bụ onye mmehie.” (Luk 7:37) Mmadụ niile bụ ndị mmehie, mana nwaanyị a na-ebi ndụ rụrụ arụ. Ọ ga-abụ na ọ bụ onye akwụna. O nwere ike ịbụ na nwaanyị a anụla ihe ndị Jizọs kụzirila, nụkwa òkù ahụ Jizọs kpọrọ ka ‘ndị niile e boro ibu dị arọ bịakwute ya iji nweta ume.’ (Matiu 11:28, 29) Ọ ga-abụ na ihe ndị Jizọs kụziri nwaanyị a nụrụ, nakwa ihe ndị ọ hụrụ Jizọs mere, mere o ji chọwa Jizọs, chọtazie ya ugbu a.

Ọ bịara n’akụkụ Jizọs ma gbunye ikpere n’ala. Anya mmiri si nwaanyị ahụ n’anya na-atasa n’ụkwụ Jizọs, ya ewerekwa ntụtụ isi ya na-ehicha anya mmiri ahụ tasara Jizọs n’ụkwụ. O jikwa nwayọọ sutụ Jizọs ọnụ n’ụkwụ ma were mmanụ na-esi ísì ụtọ o ji bịa tee ya n’ụkwụ. Saịmọn nọ na-ele ihe nwaanyị a na-eme, ma obi adịghị ya mma. Ọ nọ na-ekwu n’ime obi ya, sị: “A sị na nwoke a bụ onye amụma, ọ gaara ama onye na-ebitụ ya aka, marakwa ụdị nwaanyị ọ bụ, na ọ bụ onye mmehie.”—Luk 7:39.

Jizọs matara ihe Saịmọn nọ na-eche n’obi ya. Ọ sịrị ya: “Saịmọn, enwere m ihe m ga-agwa gị.” Saịmọn zara ya, sị: “Onye Ozizi, kwuwe!” Jizọs sịrị ya: “Mmadụ abụọ ji otu onye na-agbazinye mmadụ ego ụgwọ; otu onye ji ụgwọ narị mkpụrụ ego dinarịọs ise, ma onye nke ọzọ ji iri ise. Mgbe ha na-enweghị ihe ọ bụla ha ga-eji kwụọ ụgwọ ha ji, ọ gbaghaara ha abụọ kpamkpam. Ònye n’ime ha ga-ahụ ya n’anya karị?” Saịmọn zara ajụjụ ahụ ka onye obi ya na-adịghị n’ihe ọ na-aza. Ọ sịrị: “Echere m na ọ bụ onye ahụ ọ gbaghaara ego ka ukwuu kpamkpam.”—Luk 7:40-43.

Jizọs kwetara ihe ọ zara. Jizọs lere nwaanyị ahụ anya ma gwa Saịmọn, sị: “Ị̀ hụrụ nwaanyị a? Abatara m n’ụlọ gị; i nyeghị m mmiri ka m saa ụkwụ. Ma nwaanyị a ji anya mmiri ya dee ụkwụ m, jirikwa ntutu isi ya hichaa ha. I susughị m ọnụ; ma malite n’oge awa m batara nwaanyị a ahapụghị iji nwayọọ susuo ụkwụ m ọnụ. I teghị isi m mmanụ; ma nwaanyị a tere ụkwụ m mmanụ na-esi ísì ụtọ.” Jizọs hụrụ na nwaanyị a ejirila obi ya niile chegharịa ná ndụ rụrụ arụ ọ na-ebi. N’ihi ya, Jizọs sịrị: “Ana m asị gị, a gbagharawo ya mmehie ya n’agbanyeghị na ha dị ọtụtụ, n’ihi na o gosiri ịhụnanya dị ukwuu; ma onye a gbaghaara ihe dị nta, na-egosi ịhụnanya dị nta.”—Luk 7:44-47.

Ọ bụghị na Jizọs na-anabata omume rụrụ arụ. Kama, Jizọs gosiri na ya ghọtara otú ọ na-adị ndị mere mmehie dị oké njọ, ha egosikwa na o wutere ha ma bịakwute Kraịst ka ha nwee ike inwere onwe ha. Chegodị otú ihe ọzọ Jizọs kwuru ga-esi mee ka obi zuo nwaanyị ahụ ike. Jizọs sịrị ya: “A gbagharawo gị mmehie gị. . . . Okwukwe gị azọpụtawo gị; lawa n’udo.”—Luk 7:48, 50.

GỤKWUO GBASARA YA

Chineke Ò Nwere Ike Ịgbaghara Anyị Mmehie Anyị?

Chineke ọ̀ na-agbaghara mmehie ndị dị oké njọ? Gịnị ka anyị ga-eme ka Chineke hụ anyị n’anya?

“Jehova Gbaghaara Unu Kpamkpam”

Chineke na-eji obi ya niile agbaghara ndị mmehie chegharịrịnụ. Oleezi otú anyị kwesịrị isi na-emeso ndị ọzọ ihe. Gịnị mere o ji dị oké mkpa ka anyị na-agbaghara ndị ọzọ?