Gbanwee otú ọ ga-esi egosi

Họrọ asụsụ

Gaa na menu nke abụọ

Gaa n'ebe e dere isiokwu ndị dị na ya

Gaa n'Isiokwu

Ndịàmà Jehova

Igbo

Akwụkwọ M nke Akụkọ Bible

Akụkọ nke 34: Ụdị Ihe Oriri Ọhụrụ

Akụkọ nke 34: Ụdị Ihe Oriri Ọhụrụ

Ị̀ PỤRỤ ịkọ ihe ndị a na-atụtụrụ n’ala? O yiri mmiri kpụkọrọ akpụkọ. Ọ dị ọcha, dị gịrịgịrị, ma dị peke peke. Ma ọ bụghị mmiri kpụkọrọ akpụkọ; ọ bụ ihe a na-eri eri.

Ebe ụmụ Izrel na-ekpokọta mana

O ruwo naanị ihe dị ka otu ọnwa kemgbe ụmụ Izrel hapụrụ Ijipt. Ha nọ n’ọzara. E nwere ihe oriri dị nta n’ebe ahụ, n’ihi ya, ha malitere ime mkpesa, sị: ‘Ọ gaara adị anyị mma ma a sị na Jehova gburu anyị n’Ijipt. Ma ọ́ dịghị ihe ọzọ, anyị nwere ihe oriri niile anyị chọrọ n’ebe ahụ.’

N’ihi ya, Jehova sịrị: ‘M ga-eme ka nri si n’eluigwe zoo dị ka mmiri.’ Jehova mekwara otú ahụ. N’ụtụtụ echi ya, mgbe ụmụ Izrel hụrụ ihe ọcha nke a daranụ, ha malitere ịjụ onwe ha, sị: ‘Gịnị bụ ihe a?’

Mozis sịrị ha: ‘Nke a bụ nri Jehova nyere unu ka unu rie.’ Ụmụ Izrel kpọrọ ya MANA. Ọ na-atọ ka iberibe achịcha e ji mmanụ aṅụ mee.

‘Onye ọ bụla ga-atụtụrụ ókè ọ ga-erichali,’ ka Mozis gwara ha. Nke a bụ ihe ha na-eme kwa ụtụtụ. Ma mgbe anyanwụ dịwara ọkụ, mana nke fọdụrụ n’ala na-agbaze.

Mozis gwara ha ọzọ, sị: ‘Ọ dịghị onye ga-edebe mana ụfọdụ ruo echi.’ Ma ụfọdụ n’ime ụmụ Izrel egeghị ntị. Ị̀ ma ihe merenụ? N’echi ya, mana nke ha debere gbara ikpuru, ọ malitekwara isi ísì!

Ma, ọ dị otu ụbọchị n’izu mgbe Jehova gwara ha ka ha na-achịkọta mana okpukpu abụọ. Ọ bụ n’ụbọchị nke isii. Jehova gwara ha ka ha na-edebe ụfọdụ ya ruo echi ya, n’ihi na ọ gaghị eme ka mana ọ bụla daa n’ụbọchị nke asaa. Mgbe ha debere mana ruo ụbọchị nke asaa, ọ dịghị agba ikpuru, ọ dịghịkwa esi ísì! Nke a bụ ọrụ ebube ọzọ!

N’afọ niile ahụ ụmụ Izrel nọrọ n’ọzara, nri Jehova nọ na-enye ha bụ mana.

Ọpụpụ 16:1-36; Ọnụ Ọgụgụ 11:7-9; Joshua 5:10-12.



Ajụjụ

  • Na foto a, gịnị ka ndị a na-atụtụ n’ala, gịnị ka a na-akpọ ya?
  • Olee ntụziaka Mozis nyere ụmụ Izrel banyere ịtụtụrụ mana?
  • Gịnị ka Jehova gwara ụmụ Izrel ka ha mee n’ụbọchị nke isii, ọ̀ bụkwa n’ihi gịnị?
  • Olee ọrụ ebube Jehova rụrụ mgbe e debere mana ahụ ruo n’ụbọchị nke asaa?
  • Ogologo oge hà aṅaa ka Jehova ji mana zụọ ụmụ Izrel?

Ajụjụ ndị ọzọ

  • Gụọ Ọpụpụ 16:1-36 na Ọnụ Ọgụgụ 11:7-9.

    Gịnị ka Ọpụpụ 16:8 na-egosi banyere mkpa ọ dị anyị ịkwanyere ndị a họpụtara n’ọgbakọ ùgwù? (Hib. 13:17)

    N’ọzara, olee otú e si na-echetara ụmụ Izrel kwa ụbọchị na ndụ ha dabeere n’ebe Jehova nọ? (Ọpụ. 16:14-16, 35; Deut. 8:2, 3)

    Olee ihe Jizọs sịrị na mana ahụ na-anọchi anya ya, oleekwa otú anyị si erite uru site ‘n’achịcha a nke sitere n’eluigwe’? (Jọn 6:31-35, 40)

  • Gụọ Joshua 5:10-12.

    Afọ ole ka ụmụ Izrel riri mana, oleekwa otú nke a si nwalee okwukwe ha, gịnịkwa ka anyị pụrụ ịmụta site n’akụkọ a? (Ọpụ. 16:35; Ọnụ Ọgụ. 11:4-6; 1 Kọr. 10:10, 11)