Ohi ku Ubáyíbu

 Eko nɛ Ujisɔsi je oyeeyi ku nu gwɛɛya a, ó lɛ alɛɛcɛ nōo hayi kpaakpa a hɛta. (Umátiyu 20:28) Ohigbu ɛnyā a, Ubáyíbu hi Ujisɔsi ka “Ohɔ́nyɛtá kú ɛcɛ.” (1 Ujɔ́ni 4:​14) Ó klla kahinii: “O ŋmá ɛgiyí nū ofōōfūnū ā nēé nya ɔ̄cɛ tá glá á, ipú odúúdú ɛcɛ nyā ó lɛ ɔ̄cɛ ɔhá dúú nɛ̄ Ɔwɔicō fu nōo nya alɔ tá glá ŋ́.”​—Úklɔ́ kú Ācotɛ̄hɔ̄ 4:12.

 Ujisɔsi “gekwú ohígbū ɛjɛ̄ɛ̄jī ācɛ” nōo kpɔtuce ɔ a. (Ācɛ Uhíbru 2:9; Ujɔ́ni 3:16) Igbihaajɛ “Ɔwɔicō kwú [Ujisɔsi] ú héyī ŋmá ɔlékwū,” ó kē le cigbihi gā ɔkpanco gā kwu piya alelekwu otɛhɔ. (Úklɔ́ kú Ācotɛ̄hɔ̄ 3:15) Ohigbu ɛnyā, Ujisɔsi “lɔfú nyā ācɛ nēe gē yɛ iyē nū ga ɛgiyí Ɔwɔicō ā tá eko dóódu glá, ɛ́gɛ́nɛ̄ ó yēeyī eko dóódu cɛ́ɛ́ kóō yɔ̄ ī gbɔ̄ɔkɔ lɛ Ɔwɔicō ohígbū uwā ā.”​—Ācɛ Uhíbru 7:25.

Ɔdiya nɛ alɔ cɛgbá Ujisɔsi kóō gbɔɔkɔ kwɛyi alɔ a?

 Ɛjɛɛji alɔ wɛ ācɛ ō biya íne. (Ācɛ Uróm 3:23) Íne ō biya lɛ alɔ kɔ ŋma ɛgiyi Ɔwɔico klla ya ku alɔ bēē kwū. (Ācɛ Uróm 6:​23) Amáŋ Ujisɔsi wɛ “ɔ̄cokɛ́pɔ̄” lɛ ācɛ nōo kpɔtuce ikwū ku nu a. (1 Ujɔ́ni 2:1) Ó gē gbɔɔkɔ kwɛyi uwa, gē da Ɔwɔico kóō po ɔkɔ ō gba ku uwa klla je íne néē biya a ya uwa ɛhi ohigbu ikwū ku nu. (Umátiyu 1:21; Ācɛ Uróm 8:34) Ɔwɔico gē po ɔkɔ ō gba ku Ujisɔsi nyā ohigbu kóō cɛtɔha mla ococɛ ku nu. Ɔwɔico tu Ujisɔsi ɛhɔ wa ipu ɛcɛ nyā “o yá ɛ́ɛ́ kóō lɛ ɛcɛ nyatá nɛ̄ n.”​—Ujɔ́ni 3:17.

Ō kpɔtuce Ujisɔsi foofunu géē ya ku alɔ le hɛta?

 Ehee. Naana nɛ alɔ cɛgbá ō kpɔtuce Ujisɔsi o ya ɛɛ ku alɔ lɛ ohɛta a, ó lɛ aɔdā ɔhá nɛ alɔ cika ya duu. (Úklɔ́ kú Ācotɛ̄hɔ̄ 16:30, 31) Ubáyíbu kahinii: “Abɔ̄ nɛ̄ ɔkpíyē nɛ̄ ó lɛ alelékwū ŋ́ gekwú ā, ɛ́gɔ́ɔmā nɛ̄ ɛlā Ɔwɔicō ō cɛ̄ nɛ̄ ó lɛ úklɔ́ ŋ́ kwú lɛ dúú á.” (Ujɛ́mīsi 2:26) O ya ɛɛ ku alɔ le hɛta a, alɔ cika ō:

•   Nwu ɛlā lɛyikwu Ujisɔsi mla Adā nu nɛ ō wɛ Ujehofa a.​—Ujɔ́ni 17:3.

•   Ya ku ɔtu nɛ alɔ kpoce uwa a kóō lɛ ɔfu.​—Ujɔ́ni 12:44; 14:1.

•   Mafu ku alɔ kpɔtuce uwa ŋma lɛ ō lɛyitaajɛ lɛ íne ku uwa. (Ulúku 6:46; 1 Ujɔ́ni 2:17) Ujisɔsi nwu ka ó wɛ oduudu ācɛ nōo gē hi anuɔ ka “Óndú” a gáā lɛ ohɛta a ŋ, amáŋ “ācɛ nēe gē yá ɔdā nɛ̄ Ádā um, nōo yɔ̄ ɔkpáncō ā, tíne ā” foofunu​—Umátiyu 7:21.

•   Gɔbu yɔ i mafu ɔtu okpoce ipu āhɔ̄ olɔnɔ. Ujisɔsi lɛ ɛlā nyā teyi peee eko nɛ ó kahinii: “Ɔ̄cɛ nōo lɛ ɔtūlé jāā ga ámōōmɛ ā nēé géē nyatá á.”​—Umátiyu 24:13.