Ohi ku Ubáyíbu

 Ehee. Ubáyíbu i da alɔ ka ije wɛ ɔdobɔbi ŋ. Ubáyíbu i klla da alɔ ka ije wɛ ohutu ku ɛjɛɛji ɔdobɔbi ŋ duu. Ɛlā nɛ ācɛ alɛwa gē ka kahinii: “Ije wɛ ohutu ku ɛjɛɛji ɔdobɔbi a” wɛ ɛlā nōo yɔ ipu Ubáyíbu. Amáŋ ó wɛ ɛgɔɔma nɛ Ubáyíbu ka ɔ yiili a ŋ. Ubáyíbu kahinii: “Ihɔtu ku ije ō ya wɛ ohutu ku ɛjɛɛji ɔdobɔbi a.” a—1 Utímōti 6:10, King James Version.

•  Ɔdi nɛ Ubáyíbu ka lɛyikwu ije a?

•  Ɔdiya ɛɛ nɛ Ubáyíbu pi alɔ ahɔ̄ lɛyikwu ihɔtu amāŋ unwu ku ije ō ya a?

•  Ɛgɛnyá nɛ alɔ gáā lɛ itene ŋma ukɔ́ ku Ubáyíbu lɛyikwu ije a?

•  Aɔgba ku Ubáyíbu lɛyikwu ije

 Ɔdi nɛ Ubáyíbu ka lɛyikwu ije a?

 Ubáyíbu da alɔ ka ije gē “gbō ɔ̄cɛ ɛyí” ɔdaŋ ku alɔ bi ɔ le yuklɔ ɔwɛ olɔhi. (Ɔ̄cokóītá 7:12) Ubáyíbu klla gē cɛtra ācɛ nōo gē nwula abɔ amāŋ je ɛhi lɛ ācɛ ɔhá a duu. Ɛhi nyā kē lɔfu wɛ ije.—Aíita 11:25.

 Naana kpɔ a, Ubáyíbu pi alɔ ahɔ̄ lɛyikwu ō lɛ ije piya ɔdā aflɛyi ipu oyeeyi ku alɔ. Ó kahinii: “Aá lɛ iyī aá tū cíí ŋmá ihɔtū kú ije ō yá. Ɔdā nɛ̄ aá lɛ ā kóō jɛ̄ aá eyī.” (Ācɛ Uhíbru 13:5) Ɛlā ō nwu a wɛ ka alɔ bi ije le yuklɔ ɔwɛ okpaakpa, alɔ i klla cika ō na ije inya ŋ duu. Ikɔkɔ ɔɔma, ɔdā nɛ alɔ lɛ a cika ō jɛ alɔ eyī. Aɔdā nɛ alɔ cɛgbá nu ɔkwɔɔkwɛyi a wɛ ɔdole, ili ō le wiiye mla ɛga nɛ alɔ géē lā.—1 Utímōti 6:8.

 Ɔdiya ɛɛ nɛ Ubáyíbu pi alɔ ahɔ̄ lɛyikwu ihɔtu amāŋ unwu ku ije ō ya a?

 Ācɛ nōo gē ya unwu ɔdā i gáā lɛ ɛga ipu Ajɔɔcɛ ku Ɔwɔico amāŋ lā oyeeyi opiyoo gla ŋ. (Ācɛ Ɛ́fēsɔsi 5:5) Ɔdā éyi nōo ya a wɛ ka unwu ɔdā ō ya wɛ ɛcí ō pa amāŋ ɛ̄gbā ō gba ojibo amāŋ ɛ̄gbā ō gba ku ɛkɛmgbɛ. (Ācɛ Ukólōsi 3:5) Ɔdā ɔmpa nōo ya a wɛ ka unwu ɔdā ō ya gē ya ku ācɛ kóō ya ɔdobɔbi o ya ɛɛ kéē lɛ ɔdā néē yɔ i dɔka a. Ɔkpá ku Aíita 28:20 kahinii: “É géē yá ɔ̄cɛ ō hágágā kú ije ō lɛ italā piíí.” É gē má ojama ō ya ɔdobɔbi bɛɛka ō kɛmgbɛ ba ɔcɛ, ō hɛ ācɛ ije lé, ō kwu ācɛ uwi amāŋ ŋmo ɔcɛ.

 Ɔdaŋ ku ihɔtu amāŋ unwu ije i ya ku ɔcɛ kóō lɛ uce ō ya obɔbi ŋ naana, ó lɛ unwalu ɛyɛɛyɛyi nōo gē ta ɔ ɔkwu. Ubáyíbu kahinii: “Ācɛ nēe ge yá unwū ije nɛ̄ɛ̄nɛ̄hi fíyɛ́ aɔ́dā ɔhá ā ge gwōtū ipú ɛdɔ kú unwalu kú ínōbīya ɛyɛ́ɛyɛ́yí a. Ācɛ ōhī tínē ije nɛ̄ɛ̄nɛ̄hi jāā gbéeko nēe nyɛ̄ɛ̄ ŋmá ɛlɔ̄ɔwɔicō”—1 Utímōti 6:9.

 Ɛgɛnyá nɛ alɔ gáā lɛ itene ŋma ukɔ́ ku Ubáyíbu lɛyikwu ije a?

 Ɔdaŋ ku alɔ i ya ɔdobɔbi ohigbu ije ŋ, alɔ géē lɛ ojilima, alɔ gē lɛ otabɔ ŋma ɛgiyi Ujehofa klla ta eyī olɔhi ku nu. Lɛ ācɛ nōo gē ceyitikwu o ya ɔdā nōo he Ɔwɔico ɔtu a, Ɔwɔico cokonu lɛ uwa kahinii: “Ń gáā leyī gwū aá bónū ŋ́, ń kē gáā cīgbīhi kwu aá gbóógbóō ŋ́.” (Ācɛ Uhíbru 13:5, 6) Ó da alɔ kahinii: “É géē hɔ́hā ce ɔ̄cɛ ɔkwɛ̄yi, ó klla í jɔ́ɔnyɛ kú oyēeyī nɛ̄hi.”—Aíita 28:20.